ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން މެއި 6، ގައި ބޮން ގޮއްވާލި މައްސަލައިގައި އެމަނިކުފާނުގެ ބަޔާނެއް ހޯދުމަށް އެދިފައިވާނެ ކަމަށާއި މިހާތަނަށް ބަޔާނެއް ލިބިފައިނުވާ ކަމަށް ފުލުހުން ރޭ ބުނުމުން އެކަމަށް ޅެން ބައިތަކުން ނަޝީދު ޖަވާބު ދެއްވައިފި އެވެ.
ނަޝީދު މިއަދު ކުރެއްވި ޓްވީޓެއްގައި ބަޔާން ނުދެއްވި ސަބަބާ ގުޅޭގޮތުން ސީދާ އެއްޗެއް ވިދާޅެއް ނުވެ އެވެ. ވިދާޅުވި ބަހަކީވެސް އަދި ބަޔާނަކަށް ވެސް ދައްކަން އޮތީ އެމަނިކުފާނުގެ "ޖާނާއި ހިތާ މޭ" ކަމަށެވެ.
"ޝާއިއު ވިދާޅުވާ ފަދައިން ހިތާ މޭ ހިބައިން ލިޔެ ދިނީމާވެސް ނުވީ ނޫންތޯ؟،" ޕޮލިސް ކޮމިޝަނާ މުހައްމަދު ހަމީދު ޓެގް ކުރައްވައި ނަޝީދު ކުރެއްވި ޓްވީޓުގައި ލިޔުއްވާފައިވެ އެވެ.
ނަޝީދު ޓްވީޓް ކުރެއްވީ ބައިތުގެ އެއްބައެވެ. ފުރިހަމަ ބައިތު ތިރީގައި އެ ވަނީ އެވެ.
"ހިތާއި މޭ ހިބައިން ދިނީމާ ނުވީހޭ؟
ފިތާއި ހިތުގެ ހިތި ނާތުލާ ނުވީހޭ"
ފުލުހުން ރޭ ބޭއްވި ޕްރެސް ކޮންފަރެންސްގައި އެސިސްޓަންޓް ކޮމިޝަނާ އޮފް ޕޮލިސް މުހައްމަދު ރިޔާޒު ވިދާޅުވީ ނަޝީދުގެ ބަޔާނެއް މިހާތަނަށް ނަގާފައިނުވާ ކަމަށާއި ބަޔާނެއް ދެއްވުމަށް ދަތިފުޅު ނަމަ ލިޔުމަކުން ނަމަވެސް ބަހެއް ދެއްވުމަށް އެދިފައިވާނެ ކަމަށެވެ.
ނަޝީދަށް ހަމަލާ ދިނީ ފަންޑުކޮށްގެންކަން ބެލެވެން ނެތް ކަމަށް ފުލުހުން ބުނެފައިވެ އެވެ.
އެސިސްޓަންޓް ކޮމިޝަނާ އޮފް ޕޮލިސް ރިޔާޒު ވިދާޅުވީ ހަމަލާ ދިނުމަށް ބޭނުންވާ ސައިކަލު ފަދަ ތަކެތި ގަތުމުގެ އިތުރުން ހަމަލާ ދިނީތީވެ އިނާމެއްގެ ގޮތުން ފައިސާ ދީފައިވާކަން މިހާތަނަށް ބެލެވެން ނެތް ކަމަށެވެ.
