ގޭގޭގައި ޓޫރިސްޓުން ބައިތިއްބަން ހުއްދަދީ ހޯމްސްޓޭ ތައާރަފު ކުރި ނަމަވެސް، ރާއްޖޭގެ "ވަން އައިލެންޑް ވަން ރިސޯޓް" ކޮންސެޕްޓަކަށް ގެއްލުމެއް ނުވާނެ ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެ އެވެ.
ސަރުކާރުން ވަނީ ރާއްޖޭގޭ ޓޫރިޒަމް ޕްރޮޑަކްޓް ސިންދަފާތު (ޑައިވާސިފައި) ކުރުމުގެ ބޭނުމުގައި މީހުން ދިރިއުޅޭ ގެތަކުގައި ގެސްޓުން ބައިތިއްބަން ހޯމްސްޓޭ ޓޫރިޒަމް ތައާރަފުކުރަން ނިންމައިފަ އެވެ. އަދި މި އަހަރުގެ ނިޔަލަށް މިކަމަށް ބޭނުންވާ ގާނޫނުތަކާއި ގަވާއިދުތަކުގެ މަސައްކަތް ނިމި ހޯމްސްޓޭއަށް ފުރުސަތު ދެވޭތޯ އަންނަނީ މަސައްކަތް ކުރަމުންނެވެ.
ނަމަވެސް ރާއްޖެއަށް ހޯމްސްޓޭ ތައާރަފުކުރުމާ ދެކޮޅު ފަރާތްތަކުން ވަނީ މިއީ ރާއްޖޭގެ އަގުބޮޑު ޓޫރިޒަމް ޕްރޮޑަކްޓަށް ގެއްލުން ވާނެ ކަމެއްގެ ގޮތުގައި ސިފަކޮށްފަ އެވެ. އޭގެ އިތުރުން މިއީ ރާއްޖޭގެ އިޖުތިމާއީ މިންގަނޑުތަކަށް ފެތޭ ކަމެއްގެ ގޮތުގައި ނުފެންނަ ކަމަށް ބުނެ މިކަން ތައާރަފު ކުރުމާ ދެކޮޅު މީހުން ވެސް އެބަ ތިއްބެވެ.
މިކަމާ ދެކޮޅު މީހުންގެ ކަންބޮޑުވުންތަކަށް ރައްދު ދެއްމުން، ކޮވިޑަށްފަހު ރާއްޖޭގެ ބޯޑަރުތައް އަލުން ހުޅުވާލުމަށް އަހަރެއް ފުރުމާ ގުޅިގެން ބޭއްވި ނޫސްވެރިންގެ ބައްދަލުވުމެއްގައި މައުސޫމް ވިދާޅުވި ގޮތުގައި، ހޯމްސްޓޭ ތައާރަފުކުރިޔަސް އެންމެ އިސްކަމެއް ދޭނީ ރާއްޖޭގެ "ވަން އައިލެންޑް ވަން ރިސޯޓް ކޮންސެޕްޓް" ހިމާޔަތްކުރާށެވެ.
ރާއްޖޭގެ ތަފާތު ރިސޯޓް ކޮންސެޕްޓަށް އަލިއަޅުވާލައްވަމުން މައުސޫމް ވިދާޅުވީ، މި ބަލިމަޑުކަމުގެ ތެރޭގައި ވެސް ރާއްޖޭގެ ޓޫރިޒަމްގެ ކާމިޔާބަކަށްވީ މި ކޮންސެޕްޓް ކަމަށެވެ. އަދި ރާއްޖޭގެ ޓޫރިޒަމް ޕްރޮޑަކްޓް ސިންދަފާތު ކުރި ނަމަވެސް، ރާއްޖޭގެ ފަތުރުވެރިކަމުގެ އެންމެ އަގު ބޮޑު ޖަވާހިރު ކަމުގައިވާ ރިސޯޓް ޕްރޮޑަކްޓް "އޮފު" ކުރާނެ ކަމަށް އޭނާ ވިދާޅުވި އެވެ.
"އަޅުގަނޑުމެން ކޮންމެ ގޮތަކަށް ޓޫރިޒަމް ޑައިވާސިފައި ކުރި ނަމަވެސް ވަން އައިލެންޑް ވަން ރިސޯޓް ކޮންސެޕްޓް ފުރިހަަމަޔަށް ހިމާޔަތްކުރާނެ. އޭގެ އޮފުކަން އަޅުގަނޑުމެން އިތުރަށް އޮފު ކުރާނެ. ވަން އައިލެންޑް ވަން ރިސޯޓް ކޮންސެޕްޓްގަ ތަފާތު މޮޅެތި ރިސޯޓްތައް އަދިވެސް އަންނާނެ" ޓޫރިޒަމް މިނިސްޓަރު ޑރ. އަބްދުﷲ މައުސޫމް
މި ނޫސްވެރިންގެ ބައްދަލުވުމުގައި މޯލްޑިވްސް އެސޯސިއޭޝަން އޮފް ޓޫރިޒަމް އިންޑްސްޓްރީޒް (މަޓީ)ގެ ޗެއާޕާސަންގެ ނައިބު ސަލާހް ޝިހާބު ވިދާޅުވީ އޭނާގެ ނަޒަރުގައި ރާއްޖޭގެ ޓޫރިޒަމް ޕްރޮޑަކްޓް ފުޅާކޮށް ގެސްޓުންނަށް ލިބޭ "ޗޮއިސް" އިތުރު ކުރަން ތާއީދު ކުރައްވާ ކަމަށެވެ. އަދި މަންޒިލެއް ފުރިހަމަ ވާން ހުރިހާ ވައްތަރެއްގެ ޓޫރިޒަމް ބޭނުންވާ ކަމަށާއި ސިންދަފާތު ކުރުމުގެ ތެރެއިން ރިސޯޓްތަކަށް "ޑައިވާސިފިކޭޝަން އިމްޕެކްޓް" ބޮޑު ވާނެ ކަމަށް ދެކެވަޑައިނުގަންނަވާ ކަމަށް ވިދާޅުވި އެވެ.
"އަޅުގަނޑަކަށް ހިޔެއް ނުވޭ މައިގަނޑު އަޅުގަނޑުމެންގެ އިންޑްސްޓްރީގެ މި ގެންގުޅޭ ޕްރޮޑަކްޓްތަކަށް ނުރައްކަލެއް ވާވަރަށް ޑައިވާސިފިކޭޝަން އިމްޕެކްޓެއް އޮންނާނެ ހެނެއް. އަޅުގަނޑުގެ އަމިއްލަ ވިސްނުން ގަބޫލުކުރާ ގޮތް. އަނެއްހެން ގައުމެއްގެ އެ ޑެސްޓިނޭޝަން ފުރިހަމަ ވުމަށް ބޭނުންވާ ހުރިހާ ވައްތަރެއްގެ ޓޫރިޒަމެއް" ޝިހާބް ވިދާޅުވި އެވެ.
އެހެން ނަމަވެސް މިއީ ރާއްޖެއަށް އަލަށް ތައާރަފު ކުރެވޭ ކަމަކަށް ވާތީ އާއި މިހާރު ވެސް ގިނަ ޕްރޮޑަކްޓްތަކެއް ހުރި އިރު ހޯމްސްޓޭ ތައާރަފު ކުރުމުގެ ކުރިން ފުންކޮށް ވިސްނަން ޖެހޭ އޭނާ ވިދާޅުވި އެވެ. އަދި މި ނިންމުން ނިންމަން ޖެހޭނީ ރައްޔިތުންނާ ގުޅިގެން ރަށު ކައުންސިލުން ކަމަށް އޭނާ ފާހަގަކުރެއްވި އެވެ.
ޝިހާބްގެ ވާހަކަތަކާއި ގުޅިގެން މައުސޫމް ވަނީ ހޯމްސްޓޭ ތައާރަފު ކުރުމުގެ ކަންކަން ކުރާނީ އިންތަކާއި މިންތަކުގެ ތެރެއިން އުސޫލުތައް ކަނޑައެޅިގެން ކަމަށް ދެއްވާ ޔަގީންކަން ތަކުރާރު ކުރައްވައިފަ އެވެ. އަދި އެކަމުގައި ކައުންސިލްތަކުގެ ބައިވެރިވުން ފުރިހަމައަށް އޮންނާނެ ކަމުގެ ޔަގީންކަން ވެސް މައުސޫމް އެރުވި އެވެ.
