ރާއްޖޭގައި ވެކްސިނޭޝަން ޓޫރިޒަމް ތައާރަފުކުރުމުގެ މަސައްކަތް ތާވަލާ އެއް ގޮތަށް މި އަހަރުގެ ފަހު ކުއާޓަރުގައި ފަށާނެ ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެ އެވެ.
ވެކްސިން ޓޫރިޒަމް ފެށުމުގެ ވާހަކަ އިއުލާންކުރީ މި އަހަރުގެ ފުރަތަމަ ކުއާޓަރުގެ ތެރޭގަ އެވެ. އަދި މިއީ ކޮވިޑް ބަލިމަޑުކަމުގެ ތެރޭގައި ރާއްޖެއަށް ޓޫރިސްޓުން އިތުރު ކުރުމަށާއި ޓޫރިޒަމް ޕްރޮޑަކްޓްތައް އިތުރު ކުރުމުގެ ބޭނުމުގައި ފަށާ ކަމެއްކަމަށް ޓޫރިޒަމް މިނިސްޓްރީން ވަނީ ބުނެފަ އެވެ.
ނަމަވެސް އެ ފަހުން ރާއްޖެ ވެސް ހިމެނޭ ގޮތަށް މުޅި ދުނިޔެއަށް ވެކްސިންގެ ތާށިކަމެއް އައިސް ވެކްސިން ޓޫރިޒަމް ފެށޭނެ ކަމާ މެދު ސުވާލު އުފެދުނެވެ. އަދި މުޅި ދުނިޔެއަށް ވެކްސިން ލިބުން ދަތިވެގެން އުޅޭ ދަނޑިވަޅެއްގައި މިކަން ފެށުމަކީ "އެތިކަލް" ކަމަކަށް ވެދާނެތޯ ގިނަ ބަޔަކު ސުވާލު ވެސް އުފެއްދި އެވެ.
ކޮވިޑާ ރާއްޖޭގެ ބޯޑަރު ބަންދުކުރުމަށްފަހު އަލުން ހުޅުވާލި ފަހުން އަހަރެއް ފުރުން ފާހަގަކުރަން ބޭއްވި ނޫސްވެރިންގެ ބައްދަލުވުމެއްގައި ވެކްސިން ޓޫރިޒަމް ފެށުމާ ގުޅޭގޮތުން ނޫސްވެރިޔަކު ސުވާލުކުރުމުން، މިނިސްޓަރު ވިދާޅުވީ ތާވަލާ އެއްގޮތަށް އެ މަސައްކަތް ކުރިޔަށް ދާނެ ކަމަށެވެ.
ނަމަވެސް އެ ތާރީހު ބިނާ ވަނީ ރާއްޖޭގެ ކޮވިޑް ވެކްސިނޭޝަން ކެމްޕެއިނުގެ ކާމިޔާބީއާ ކަމަށް ވިދާޅުވި އެވެ.
އެގޮތުން މިހާރު ކުރިޔަށްދާ ދުވެލީގައި ވެކްސިން ޖެހުމުގެ ކަންކަން ކުރިޔަށްދާ ނަމަ މި ހިނގާ އޯގަސްޓް މަހުގެ ނިޔަލަށް، ރާއްޖޭގެ ވެކްސިން ޖެހޭ އާބާދީގެ ބޮޑު ބަޔަކަށް ވެކްސިން ޖެހޭނެ ކަމުގެ ޔަގީންކަން ކަމާބެހޭ ފަރާތްތަކުން ދެއްވާފައިވާ ކަމަށް މިނިސްޓަރު ވިދާޅުވި އެވެ.
އަދި މިހާރު ރާއްޖެއަށް ވެކްސިންގެ ދަތިކަމެއް ނެތް ކަމަށާއި، އެ ލަނޑުދަނޑިއަށް ވާސިލުވެވޭނެ ކަމުގެ ފުރިހަމަ ޔަގީންކަން އެބައޮތް ކަމަށް ވިދާޅުވި އެވެ.
ކަމާބެހޭ އިދާރާތަކުން ހިއްސާކޮށްފައިވާ މައުލޫމާތައް ބަލާއިރު، މިހާތަނަށް ރާއްޖޭގެ އާބާދީގެ 50 ޕަސެންޓް ވެކްސިން ފުރިހަމަކޮށްފި އެވެ. އަދި ޓޫރިޒަމް ދާއިރާއަށް ބަލާ ނަމަ މި ޖުލައި މަހުގެ 13 އާ ހަމައަށް ރިސޯޓް މުވައްޒަފުންގެ 80 ޕަސެންޓް ވެކްސިން ފުރިހަމަކޮށްފި އެވެ.
އެއް ޑޯޒް ޖެހި މީހުންގެ އަދަދަށް ބަލާއިރު ރާއްޖޭގައި ދިރިއުޅޭ އާބާދީގެ 60 ޕަސެންޓަށް ވެކްސިން ޖަހައިފި އެވެ. އަދި ރިސޯޓްތަކުގައި މަސައްކަތް ކުރާ މުވައްޒަފުންގެ 97 ޕަސެންޓް ވަނީ އެއް ޑޯޒް ޖަހާފަ އެވެ.
އީދު ބަންދަށް ވެކްސިން ޖެހުން މެދުކަނޑާލި ނަމަވެސް، ކުރިޔެކޭ އެއް ގޮތަށް ވެކްސިން ޖެހުމުގެ ކަންކަން އަލްހާ އީދު އަދި މިނިވަންދުވަހުގެ ބަންދަށް ފަހު ފަށާނެ އެވެ.
ވެކްސިން ޓޫރިޒަމް ފަށާނީ އާބާދީގެ ބޮޑު އިންސައްތައަކަށް ވެކްސިން ފުރިހަމަކޮށްފައި ކަމަށް މިނިސްޓަރު ވިދާޅުވި ނަމަވެސް، އެއީ ކިހާ އިންސައްތައެއް ކަމެއް ކަނޑައަޅާފަ އެއް ނުވެ އެވެ.
އެކަމަކު ހެލްތް ޕްރޮޓެކްޝަން އެޖެންސީން ގެންގުޅޭ މިންގަނޑުން އާބާދީގެ ބޮޑު އިންސައްތަައަކަށް ވެކްސިން ޖެހުނު ކަމަށް ބަލަނީ 75 ޕަސެންޓް މީހުންނަށް ދެ ޑޯޒް ދެވުނީމަ އެވެ.
