ކޮވިޑް ބަލިމަޑުކަމުގެ ތެރޭގައި ރާއްޖެއަށް ކުރިމަތިވި އިގުތިސޯދީ ކާރިސާގެ ތެރޭގައި އިގުތިސޯދު ހިފަހައްޓަން ބޭންކް އޮފް މޯލްޑިވްސް (ބީއެމްއެލް)އިން މުހިންމު ދައުރެއް އަދާކުރި ކަމަށް އެ ބޭންކުގެ ސީއީއޯ އަދި މެނޭޖިން ޑިރެކްޓަރު ޓިމް ސޯޔާ މިއަދު ވިދާޅުވެއްޖެ އެވެ.
ބީއެމްއެލްގެ އަހަރީ އާންމު ޖަލްސާގައި ވާހަކަ ދައްކަވަމުން ސޯޔާ ވިދާޅުވި ގޮތުގައި އިގުތިސޯދު ހީނަރުވެ ނުދިނުމަށާއި ވިޔަފާރިތަކަށް އެހީވުމަށް ބޭންކުން މަސައްކަތް ކުރީ ދުރާލާ ސްޓްރެޓަޖީއެއް އެކުލަވާލައިގެން، އެ ސްޓްރެޓްޖީއާ އެއްގޮތަށެވެ.
މައިގަނޑު ހަތަރު ކަމެއްގެ މައްޗަށް އެކުލެވޭ މި ސްޓްރެޓެޖީގެ ސަބަބުން މިހާރު ބޭންކުގެ ހާލަތު އޮތީ ކުރިން އަހަރުގެ މި ދުވަސްވަރު އޮތް ހާލަތަށް ވުރެ ރަނގަޅު ހާލަތެއްގައި ކަމަށް ސޯޔާ ފާހަގަކުރެއްވި އެވެ. މި ސްޓްރްޓެޖީގައި ހިމެނެނީ:
- މެދުކެނޑުމެއްނެތި ބޭންކިން ހިދުމަތް ދިނުން
- ލޯން ދެއްކުން ފަސްކޮށްދިނުމާއި ސަރުކާރުގެ ލޯން ސްކީމްތައް މެނޭޖްކުރަން އެހީތެރިވެދިނުން. މީގެ ތެރޭގައި އީއައިބީ ކޮވިޑް-19 ރިކަވަރީ ލޯނާއި ދާދި ފަހުން ފެށުނު އިކޮނޮމިކް ސްޓިމިއުލަސް ލޯނު ހިމެނޭ
- ލިކުއިޑިޓީ ޕްރެޝަރު ކުޑަކުރުމަށްޓަކައި ބޭރުން ފަންޑިން ހޯދުން. މާލީ އިދާރާތަކާ ގުޅިގެން ފަންޑިންގެ ގޮތުގައި ގާތްގަނޑަކަށް 90 މިލިއަން ޑޮލަރު ހޯދުނު.
- އެކަށޭނަ އަދަދަކަށް ބޭރު ފައިސާގެ ރިޒާވް ދެމެހެއްޓުމަށްޓަކައި މަސައްކަތް ކުރުން.
"މިއަދު އަޅުގަނޑުމެން މިތިބީ މިދިޔަ އަހަރުގެ މިހިސާބުގައި އަޅުގަނޑުމެން ތިބި ހާލަތަށް ވުރެ ރަނގަޅު ހާލަތެއްގައި. އަދި މި އަޑިގަނޑުން އަޅުގަނޑުމެން އަރައިގަންނާނަން. ކުރިއަށް އޮތް ތަނުގައިވެސް އަޅުގަނޑުމެންނަށް އުދަނގޫތަކާ ކުރިމަތިވާނެ. މިއާއެކުވެސް ދެމެހެއްޓެނެވި ކުރިއެރުމަކަށް މިކަންކަމުން އަރައިގަތުމުގެ ހިތްވަރު އެބަހުރި." ބީއެމްއެލްގެ ސީއީއޯ އަދި އެމްޑީ ޓިމް ސޯޔާ
ސޯޔާ އިތުރަށް ވިދާޅުވީ ކުރިޔަށް އޮތް ދުވަސްތަކުގެ ތެރޭގައި ބޭންކުގެ އާ ޕްރޮޑަކްޓްތަކާއި ހިދުމަތްތައް އިއުލާންކޮށް، ބީއެމްއެލްގެ ޕްރޮޑަކްޓް ޕޯޓްފޯލިއޯ ފުޅާކުރާނެ ކަމަށެވެ.
