ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ދިން ޓެރަރިސްޓު ހަމަލާއާ ގުޅިގެން ރާއްޖޭގެ ތާރިހުގައި ހިންގި ފުރަތަމަ ޕާލިމަންޓްރީ އިންކުއަރީއަށްފަހު ނެރުނު ރިޕޯޓުގައި ފާހަގަކޮށްފައިވާ މައްސަލަތައް ހައްލުކުރަން ސަރުކާރުން އަވަސް ފިޔަވަޅުތައް ނާޅައިފިނަމަ، ރައްޔިތުންނަށް ބޮޑެތި ގެއްލުންތަކެއް ލިބޭނެކަމުގެ އިންޒާރު ނަޝީދު ދެއްވައިފި އެވެ.
ނަޝީދު އަވަހާރަކޮށްލަން ދިން ޓެރަރިސްޓު ހަމަލާއާ ގުޅިގެން ރާއްޖޭގެ ތާރީހުގައި ފުރަތަމަ ފަހަރަށް މުޅި މަޖިލިސް އިގުރާރުވެގެން މަޖިލީހުގެ ސަލާމަތީ ހިދުމަތްތަކާބެހޭ (241) ކޮމިޓީގެ ރިޕޯޓް މަޖިލީހުން ފާސްކޮށްފައިވަނީ ހުކުރު ދުވަހުގެ ފަތިހުގެ ވަގުތުގަ އެވެ.
އެ ރިޕޯޓްގައި ހަމަލާ ހިނގައިދިޔަ ގޮތާއި، އެކަމުގައި އިހުމާލުތަކެއްވެފައިވޭތޯ އާއި މިފަދަ ކަންކަން ތަކުރާރުވިޔަ ނުދިނުމަށްޓަކައި އެޅިދާނެ ފިޔަވަޅުތަކާ ހިމަނާފައިވެ އެވެ.
ގާތްގަނޑަކަށް 270 ސަފުހާގެ ރިޕޯޓުގައި ނަޝީދަށް ހަމަލާ ދިނުމުގެ ކުރިންނާއި ހަމަލާދިން ދުވަހު އަދި އޭގެ ފަހުން ކަން ހިނގާފައިވާ ގޮތުގެ ވަރަށް ތަފްސީލީ މައުލޫމާތުތައް ވެސް ހިމަނައިފައިވެ އެވެ.
ރިޕޯޓްގައި ސަރުކާރުގެ މުއައްސަސާތަކުގައި ހުރި ދޯދިޔާ ގިނަ ކަންކަން ފާހަގަކޮށްފައިވާއިރު، އިންޓެލިޖެންސްއާ ގުޅޭ ގޮތުން އޮތް ނިޒާމީ ބާގަނޑާއި އެމްއެމްޑީއެފްގެ އެތެރޭގައި ހުރި ފުށުއެރުންތަކާއި ސަލާމަތީ ކަންކަން ފުރިހަމަނުވެ ހުރިކަން ފާހަގަކޮށް، އެކަންކަން ހައްލުކުރުމަށް ލަފާތައް ދިނެވެ.
އެ ރިޕޯޓުން ސަރުކާރަށް ހުށަހެޅި 45 ލަފާ ފުރިހަމައަށް އަމަލުކޮށް، ނަޝީދަށް ދެވުނު ފަދަ ހަމަލާއެއް ތަކުރާރުވިޔަ ނުދިނުމަށްޓަކައި އަވަސް ފިޔަވަޅުތައް އެޅުމަށް މަޖިލިސް މެމްބަރުން ވަނީ ސަރުކާރަށް ގޮވާލައިފަ އެވެ.
އެ ރިޕޯޓު ރައީސް އިބްރާހިމް މުހައްމަދު ސޯލިހަށް މިހާރު އަރުވާފައިވާއިރު، މަޖިލީހުގެ ރައީސަށް އެ ރިޕޯޓު ރަސްމީކޮށް އެރުވުމަށް މިއަދު މެންދުރު އޮންލައިންކޮށް ބޭއްވި ރަސްމިއްޔާތުގައި ވާހަކަ ދައްކަވަމުން 241 ކޮމިޓީގެ މުގައްރިރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވީ އާއްމުކުރި ރިޕޯޓުގައި އުނިކޮށްފައިވާ ބައިތަކާ އެކީގައި ކޮމިޓީއަށް ހޯދުނު ލިޔެކިޔުންތަކާއި ބައްދަލުކުރި ފަރާތްތަކުގެ ޔައުމިއްޔާތައް ވެސް އެ ދެ ބޭފުޅުންގެ އިތުރުން އުއްތަމަ ފަނޑިޔާރަށް އަރުވާނެ ކަމަށެވެ.
އެގޮތުން، އެ ރިޕޯޓުގެ އިތުރުން ތިން ވޮލިއުމްގެ މައްޗަށް 3،000 އަށް ވުރެ ގިނަ ސަފުހާގެ ޔައުމިއްޔާ އާއި އިތުރު 500 ގަނޑުގެ ލިޔެކިޔުންތައް ހިމެނޭ ކަމަށް އަސްލަމް ވިދާޅުވި އެވެ.
އެ އިންކުއަރީގެ ފުރިހަމަ ރިޕޯޓު މިއަދު ރައީސް ސޯލިހަށް އަރުވާފައިވާއިރު، އެ ރިޕޯޓުގައި ފާހަގަކޮށްފައިވާ ކަންކަން އިސްލާހުކުރުމަށް އަޅަންޖެހޭ ފިޔަވަޅުތައް އަޅުއްވަން ފެއްޓެވިކަމަށް ރައީސްއާ ހަވާލާ ދެއްވައި އަސްލަމް ވިދާޅުވި އެވެ.
އެ ހަމަލާގައި ލިބިވަޑައިގެންނެވި ޒަހަމްތަކަށް ފަރުވާ ހޯއްދަވަން މިވަގުތު އިނގިރޭސިވިލާތުގައި ހުންނެވި، ނަޝީދު ވިދާޅުވީ މި ހަމަލާއަކީ އެމަނިކުފާނަށް އަމާޒުކޮށް ދިން ހަމަލާއެއް ނަމަވެސް، އެއީ މުޅި ގައުމާއި ދިވެހި ރައްޔިތުންގެ ސަލާމަތާއި ރައްކާތެރިކަމާ ގުޅިފައިވާ މައްސަލައެއް ކަމަށެވެ.
ރައްޔިތުންގެ ސަލާމަތާއި ރައްކާތެރިކަމުގެ އިތުރުން، ގައުމުގެ މިނިވަންކަމާއި އިސްތިގުލާލު ކަށަވަރުކުރުމުގައި 241 ކޮމިޓީން އަދާކުރަންޖެހޭ ދައުރަށް އިޝާރާތް ކުރައްވަމުން ނަޝީދު ވިދާޅުވީ އިންކުއަރީގެ މަސައްކަތް ފުރަތަމަ ފަށައިގެންއިރު، ވަކިވަކި ސިފައިން ހާޒިރުކުރުމާމެދު ޝައްކުތަކެއް އުފެދުނު ކަމަށެވެ.
ނަމަވެސް، އެއީ ސުވާލެއް ވެސް އުފެދެންޖެހޭ ކަމެއް ނޫން ކަމަށް އެމަނިކުފާނު ވިދާޅުވި އެވެ.
"ކޮމިޓީ ބޭނުންވާ ގޮތަކަށް އެކަން ގެންދެވޭނެ. އެއީ އެހެން މީހަކަށް އެކަމާ ސުވާލުވެސް ކުރެވޭނެ ކަމެއް ނޫން. ކޮންމެ މުއައްސަސާއެއްގެ ކޮންމެ ބޭފުޅަކު ހާޒިރުކޮށްގެން ކޮމިޓީން ބޭނުންވާ ކޮންމެ ސުވާލެއް އެ ބޭފުޅަކާ ކުރެވޭނެ،" ނަޝީދު ވިދާޅުވި އެވެ.
އެ ރިޕޯޓުން ފާހަގަކޮށްފައިވާ މައްސަލަތަކަށް އަވަސް ފިޔަވަޅު އެޅުއްވުމަށް ރައީސް ސޯލިހަށް މިއަދު ވެސް ގޮވާލައްވަމުން، ނަޝީދު ވިދާޅުވީ އެކަމަށް ފަސްޖެހިވަޑައިގެންފިނަމަ، ރައްޔިތުންނަށް ވެސް ބޮޑެތި ގެއްލުންތައް ވާނެ ކަމަށެވެ.
އެގޮތުން، އެންމެ ބޮޑު ގެއްލުމެއް ލިބޭނީ ޓޫރިޒަމަށް ބަރޯސާވެފައިވާ ރާއްޖޭގެ އިގުތިސޯދަށް ކަން އެމަނިކުފާނު ފާހަގަކުރެއްވި އެވެ.
ނަޝީދު ވިދާޅުވި ގޮތުގައި ރާއްޖޭގެ ގުދުރަތީ ރީތިކަމުގެ އިތުރުން ގައުމުގެ އަމާންކަމަށް ޓޫރިޒަމް ސިނާއަތް ބަރޯސާވެފައިވާއިރު، ފަސޭހަކަމާއެކީ ރާއްޖޭގެ ސިޔާސީ ލީޑަރުންނަށް ހަމަލާދެވޭ ތަނެއްގެ ގޮތުގައި ދުނިޔެއަށް ފެނިއްޖެނަމަ، އޭގެ އަސަރު ކުރާނީ ވަޒީފާތަކަށާއި އާމްދަނީ އަށެވެ.
"އަޅުގަނޑު ރައީސުލްޖުމްހޫރިއްޔާގެ އަރިހުން އެދެން އެ މައްސަލަތައް އަވަހަށް ބައްލަވާށޭ. ކުޑަކޮށްވެސް ފަހަތަށް ޖެހިވަޑައިނުގަންނަވައި. ބައްލަވަންޖެހިވަޑައިގަންނަވާ ކަންކަން އަވަހަށް ބައްލަވާށޭ،" ރައީސް އެކަން ކުރައްވާނެކަމަށް ޝައްކު ނުކުރައްވާކަން ފާހަގަކުރައްވަމުން ނަޝީދު ވިދާޅުވި އެވެ.
އެ ރިޕޯޓުގައި ހިމެނިފައިވާ ރެކަމެންޑޭޝަންތަކުގެ މައްޗަށް ޝަރީއަތް ކުރުމުގެ އުސޫލުތަކާއި ހަމަތަކަށް ވެސް ބައްޓަންކޮށް ދެއްވުމަށް ނަޝީދު މިއަދު ވަނީ އުއްތަމަ ފަނޑިޔާރުގެ އަރިހުން އެދިވަޑައިގެންފަ އެވެ.
