ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން ބޮން ގޮއްވާލުމުގެ ގަޑިއެއްހާ އިރު ކުރިން އަދުހަމް އަހުމަދު ރަޝީދު އެ ސަރަހައްދަށް ގޮސްފައިވާ ކަމަށާއި އަދި އޭގެ ދުވަސްކޮޅެއް ނަޝީދަށް ފާރަލާފައިވާ ކަމަށް ރައްޔިތުންގެ މަޖިލީހުގެ އިންކުއަރީ ރިޕޯޓުގައި މިއަދު ބުނެފި އެވެ.
އަދުހަމްއަކީ ނަޝީދު ކާރުކޮޅާ އަރާހަމަވިތަނާ ބޮން ގޮއްވާލަން ރިމޯޓަށް ފިއްތާލި މީހާ އެވެ. އޭރޭ ނަޝީދުގެ ޝެޑިއުލްގައި އޮތީ، ބަނޑޮހުގައި އޮތް ތަރާވީހަކަށް ވަޑައިގަތުމެވެ. އެމަނިކުފާނު ކެނެރީގެއިން ނުކުންނަވައި މަޖީދީމަގުގައި އޮތް ކާރުކޮޅާ ހިސާބަށް ވަޑައިގަންނަވަންދެން އަދުހަމް އަތަމާ ޕެލަސް ގޯޅިތެރޭގައި ހުންނަތަން ފެންނަ ވީޑިއޯއެއް ވެސް ފުލުހުން އާއްމުކޮށްފައިވެ އެވެ.
އައިއީޑީ ގޮއްވާލުމުގެ ގާތްގަނޑަކަށް އެއް ގަޑިއިރު ކުރިން، އެ އައިއީޑީ ގޮއްވާލި ކަމަށް ތުހުމަތު ކުރެވޭ އަދުހަމް އަހްމަދު ރަޝީދު އެ ސަރަހައްދަށް ގޮސްފައިވެ އެވެ. -- ރިޕޯޓް
ހަމަލާ ދޭން އައިއީޑީ ހަރުކުރި ސައިކަލް އެތަނުގައި ބެހެއްޓީ އެއް ދުވަސް ކުރިންނެވެ.
ރިޕޯޓުގައި ބުނީ ނީލޯފަރު ހިނގުމާއި މަޖީދީމަގާ ގުޅޭ ކަންމަތީގައި ސައިކަލް ޕާކުކުރީ މެއި ފަސް ވަނަ ދުވަހުގެ ރޭ 8:01 ގައި ކަމަށެވެ. އޭގެ ފަހުން ޖެހިގެން އައި ރޭ 8:27 ގައި ބޮން ގޮއްވާލަން ދެން ސައިކަލް ހުރި ގޮތަށް އެތަނުގައި ހުރީ ކަމަށް ރިޕޯޓުގައިވެ އެވެ.
އެކި ފަހަރު މަތިން ފާރަލި، ނީލޯފަރު މަގުގައި ވެސް ހަރަކާތްތެރިވި
ރިޕޯޓުގައި ބުނެފައިވާ ގޮތުގައި ރައީސް ނަޝީދަށް ހަމަލާދިނުމުގައި ބައިވެރިވެފައިވާ ކަމަށް ތުހުމަތު ކުރެވޭ މީހުން، އެއް ފަހަރަށް ވުރެ ގިނަފަހަރަށް ނީލޯފަރު ހިނގުމުގައި ހަރަކާތްތެރިވެ، ގ. ކެނެރީގެ ސަރަހައްދު ބަލާފައިވެ އެވެ.
އަދި ލޯކަލް ކައުންސިލް އިންތިހާބުގެ ކެމްޕޭން ދުވަސްވަރު، އެމްޑީޕީގެ ފަރާތުން ހުޅުމާލެ ދާއިރާއަށް ވާދަކުރެއްވި ރިޒްނާ ޒަރީރުގެ ކެމްޕޭން ޖަގައެއް ހުޅުވަން އެމަނިކުފާނު ވަޑައިގެން އުޅުއްވަނިކޮށް ދުރުގައި ތިބެގެން ބަޔަކު އެމަނިކުފާނުގެ ފޮޓޯ ނަގައި ހަރަކާތްތައް ބަލައި ހަދާފައިވާ ކަމަށް ރިޕޯޓުގައިވެ އެވެ.
ތިން މިލިއަން ޑޮލަރު ހުށަހަޅައި އެޑްވާންސް ދޭން މަޝްވަރާ!
ރިޕޯޓުގައި ބުނީ ނަޝީދު އަވަހާރަކޮށްލަން އުޅޭ ކަމުގެ މައުލޫމާތު އެމަނިކުފާނާ އަރިސް ބޭފުޅެއް ކަމަށްވާ ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބަށް ލިބިވަޑައިގަތީ ހަމަލާގެ ތިން ދުވަސް ކުރިން މެއި، ތިން ވަނަ ދުވަހެވެ. އޭނާގެ ރައްޓެއްސެއްގެ ފަރާތުން އެ މައުލޫމާތު ލިބިވަައިގަތުމާ އެކު ޑިފެންސް މިނިސްޓަރު މާރިޔާ ދީދީ އަށް އެންގެވި ކަމަށް ރިޕޯޓުގައިވެ އެވެ.
މާރިޔާއާ އެ ވާހަކަ އިލްޔާސް ހިއްސާކުރެއްވީ މެއި ހަތަރު ވަނަ ދުވަހު ފޯން ކޯލަކުންނެވެ. ހަމަލާދޭ މީހުންނަށް ހުށަހަޅާފައި ވަނީ ތިން މިލިއަން ޑޮލަރު ކަން މައުލޫމާތު ލިބިވަޑައިގެންފައި އޮތް ކަމަށް ވެސް އިލްޔާސް ވިދާޅުވި ކަމަށް ރިޕޯޓުގައިވެ އެވެ.
"ހަމަލާ ދޭ މީހުންނަށް ތިން މިލިއަން ޑޮލަރުގެ އަގެއް ހުށަހަޅާފައިވާ ކަމަށާއި އަދި އެޑްވާންސްގެ ގޮތުގައި އަގުގެ 50 އިންސައްތަ ދިނުމަށް މަޝްވަރާ ކުރަމުންދާ ކަމަށް އެ މައުލޫމާތު ދިން މީހާ ބުނެފައިވާ ކަމަށް ވެސް މެމްބަރު އިލްޔާސް ލަބީބު ޑިފެންސް މިނިސްޓަރު އަރިހުގައި ދެންނެވި އެވެ،" ރިޕޯޓުގައިވެ އެވެ.
