ކަރަންޓީނު ނުވެ ދަތުރުކުރަން ދިން ލުއިތަކުގެ ތެރޭގައި މޮނިޓަރިންގައި ނެތް ރަށަކުން 18 އަހަރު ނުފުރޭ ކުދިންނަށް ޕީސީއާރް ނެގެޓިވް ނަތީޖާއެއް ހުށައަޅައިގެން ކަރަންޓީނު ނުވެ ދަތުރުކުރަން ހުއްދަ ދީފި އެވެ.
ކޮވިޑާ ގުޅިގެން އަޅާފައިވާ ލުއިތައް އިއުލާންކުރަން ބޭއްވި ނޫސްވެރިންގެ ބައްދަލުވުމުގައި ވެކްސިން ނުޖެހޭތީ 18 އަހަރު ނުފުރޭ ކުދިން ކަރަންޓީނު ވާން ޖެހޭނެ ކަމަށް ހާމަ ކުރި އެވެ. އެއީ ވެކްސިން ޖެހުމުން ލިބޭ ރައްކާތެރިކަން އެ އުމުރުފުރާގެ ކުދިންނަށް ނެތުމާއި، ކުޑަކުދިންގެ ފަރާތުން އެހެން މީހުންގެ ގަޔަށް ބަލި ފެތުރުމުގެ ފުރުސަތު ބޮޑުވާތީ ކަމަށް ހެލްތް ޕްރޮޓެކްޝަން އެޖެންސީގެ ތަރުޖަމާނު ޑރ. ނަޒްލާ ރަފީގް ވިދާޅުވި އެވެ.
މި ނިންމުމަށް ގިނަ ބަޔެއްގެ ފާޑުކިޔުން އަމާޒުވި އެވެ. އަދި އީދު ބަންދާ ދިމާކޮށް ދަތުރުކުރަން ލުއި ދިން ކަމަށް ބުނާއިރު، އެކީ ދަތުރުކުރާ ކުދިން ކަރަންޓީނު ވާން ޖެހޭތީ ސުވާލު އުފެއްދި އެވެ.
ނޫސްވެރިންގެ ބައްދަލުވުމުގައި އެހެން ބުނި ނަމަވެސް، ފަހުން ދަތުރު ލުއިތަކާއި ގުޅިގެން ގެޒެޓު ކުރި އިއުލާނުގައި ވަނީ މޮނިޓަރިންގައި ނެތް ރަށްރަށަށް ކަރަންޓީނު ނުވެ އެކުގައި ދަތުރުކުރާ ކުދިންނަށް ދެވޭނެ ކަމަށެވެ. ބޭނުންވަނީ 72 ގަޑި އިރު ނުވާ ޕީސީއާރް ނެގެޓިވް ނަތީޖާއެކެވެ. އަދި އެންމެނަށް އޮންނަ އުސޫލުގެ ތެރެއިން ހާލުބެލުން ޕޯޓަލް މެދުވެރިކޮށް ރަޖިސްޓްރީ ކުރަން ޖެހެ އެވެ.
މިއަދުން ފެށިގެން މާލެ ސަރަހައްދުގެ މޮނިޓަރިން ހާލަތު އުވާލާފައިވާތީ، މި ލުއިތަކުގެ ތެރެއިން މާލެ ސަރަހައްދުން ވެސް މިކަންކަން ފުރިހަމަކޮށްގެން ވެކްސިން ޖަހާފައިވާ މީހުންނާއި އެކު ކުޑަކުދިންނަށް ދަތުރުކުރެވޭނެ އެވެ.
