ދިވެހި ސަރުކާރުން އެދިގެން މި ހިނގާ އޮކްޓޯބަރު 22، އަށް އިންޑިއާއަށް ދައްކަންޖެހޭ 30 ބިލިއަން ރުޕީސްގެ ކަރަންސީ ސްވޮޕު އެ ގައުމުން ރަސްމީކޮށް ރޯލްއޯވާކޮށްދީފި އެވެ.
އެ ކަރަންސީ ސްވޮޕަކީ، އޮކްޓޯބަރު، 2024، ގައި ނެގި 400 މިލިއަން ޑޮލަރުގެ ކަރަންސީ ސްވޮޕު މިދިޔަ އޭޕްރީލް މަހު ދިވެހި ސަރުކާރުން އަނބުރާ ދެއްކި ދުވަހު ބޭނުން ކުރަން ފެށި 30 ބިލިއަން ރުޕީސްގެ ކަރަންސީ ސްވޮޕެކެވެ.
2024 އިން 2027 އަށް އެކުލަވާލާފައިވާ މި އޮނިގަނޑުގެ ދަށުން، އިންޑިއާ ރޫޕީޒް ބޭނުންކޮށްގެން ހިންގާ މި ކަރަންސީ ސްވޮޕް އިންތިޒާމުގައި އިންޓްރެސްޓް ރޭޓާއި އެހެނިހެން ޝަރުތުތަކަށް ބޮޑެތި ލުއިތަކެއް ވަނީ ދީފައި ކަމަށް އެ ގައުމުން ބުންޏެވެ.
އިންޑިއާއިން ބުނީ 2012 ވަނަ އަހަރު މި އިންތިޒާމު ފެށީއްސުރެ، އިންޑިއާގެ މަރުކަޒީ ބޭންކުން ވަނީ ޖުމްލަ 1.1 ބިލިއަން އެމެރިކާ ޑޮލަރަށް ވުރެ ގިނަ އަދަދެއްގެ އެހީތެރިކަން ކަރަންސީ ސްވޮޕްގެ ދަށުން ރާއްޖެއަށް ފޯރުކޮށްދީފައި ކަމަށެވެ.
އިންޑިއާގެ 'ނެއިބަހުޑް ފަސްޓް' ސިޔާސަތާއި 'މަހާސާގަރް' ތަސައްވުރުގެ ދަށުން ދިވެހިރާއްޖެއަށް ދެނީ ވަރަށް ހާއްސަ އިސްކަމެއް ކަމަށާއި ގާތް އަދި އިތުބާރު ހުރި ބައިވެރިއެއްގެ ގޮތުގައި އިންޑިއާއިން ދެމިއޮންނާނީ ރާއްޖެއާއެކު އޮންނަ ގުޅުން އިތުރަށް ބަދަހިކުރުމަށް ކަމަށް އެ ގައުމުން ބުންޏެވެ.
އިންޑިއާއިން ކަރަންސީ ސްވޮޕު ރޯލްއޯވާކޮށްދިންއިރު، މިދިޔަ ސެޕްޓެމްބަރުގައި ދިވެހި ސަރުކާރުން ވަނީ އިންޑިއާއަށް ދައްކަންޖެހޭ 50 މިލިއަން ޑޮލަރު ދައްކައިފަ އެވެ. އެ ފައިސާ ދައްކަންޖެހުނީ، ދަރަނި ދެއްކުން ފަސްކޮށްދޭން އެދުނު އެދުންތައް ފެއިލްވުމުންނެވެ.
އެ ދަރަނި ދައްކަންޖެހުމުން ރިޒާވް ހުސްވެ، އަސާސީ ބޭނުންތަކަށް ހަރަދު ކުރަން ވެސް ފައިސާ ނުހުންނާނެ ކަމަށް އެމްޑީޕީގެ ޗެއާޕާސަން ރައީސް މުހައްމަދު ނަޝީދު ވަނީ ވިދާޅުވެފަ އެވެ. އޭގެ ފަހުން ރިޒާވް "ދަށްވެފައި ހުރި" ކަމަށް ރައީސް މުހައްމަދު މުއިއްޒު ވެސް ވަނީ އިއުތިރާފްވެވަޑައިގެންފަ އެވެ.
އެންމެ ފަހުގެ ރިޒާވު ނަމްބަރުތަކުން ދައްކާ ގޮތުގައި މިދިޔަ މަސް ނިމުނުއިރު ޖުމްލަ ރިޒާވު 547.8 މިލިއަން ޑޮލަރަށް އަދި ބޭނުންކުރެވޭ ރިޒާވު ވަނީ 169.7 މިލިއަން ޑޮލަރަށް ތިރިވެފަ އެވެ. ނިމުނު މަހަކީ މި އަހަރުގެ ތެރޭގައި ރިޒާވު އެންމެ ދަށްވީ މަހެވެ.
