ދިވެހިން ސިފައިންގެ ކޯސްޓްގާޑުގެ ބެލުމުގެ ދަށުގައި ތިބި ކަމަށް ބުނާ އިންޑިއާގެ ޓަމިލް ނާޑޫ ސްޓޭޓުގެ ސޫތުކުޅިއަށް ނިސްބަތްވާ 25 މަސްވެރިން ދޫކޮށްލުމަށް އެ ގައުމުގެ މައި ސަރުކާރުގެ އެހީތެރިކަމަށް އެދި އެ ސްޓޭޓުގެ ޗީފް މިނިސްޓަރު އެދިއްޖެ އެވެ.
އިންޑިއާގެ މަޝްހޫރު ނޫހެއް ކަމަށްވާ ދަ ހިންދޫގައި ޝާއިއުކޮށްފައިވާ ހަބަރެއްގައި ބުނެފައި ވަނީ، ރާއްޖޭގެ ކޯސްޓްގާޑުން ހައްޔަރުކުރި ސޫތުކުޅީގެ މަސްވެރިން މިނިވަންކުރުމަށް ބާރުއަޅައިދިނުމަށް އެދި ޓަމިލް ނާޑޫގެ ޗީފް މިނިސްޓަރު ވިޖޭ، އިންޑިއާގެ އެކްސްޓާނަލް އެފެއާޒް މިނިސްޓަރު ޖައިޝަންކަރަށް ސިޓީއެއް ފޮނުވާފައިވާ ކަމަށެވެ.
މި ސިޓީގައި ޗީފް މިނިސްޓަރު ވަނީ، ޑިޕްލޮމެޓިކް ވަސީލަތްތައް މެދުވެރިކޮށް ދިވެހި ސަރުކާރާއެކު މަޝްވަރާކޮށްގެން، އެ މަސްވެރިންނާއި ބޯޓުތައް ވީ އެންމެ އަވަހަކަށް މިނިވަންކޮށް އަނބުރާ ގައުމަށް ފޮނުވާލުމުގެ އިންތިޒާމު ހަމަޖައްސައިދިނުމަށް އެދިފަ އެވެ.
މި މައްސަލައާ ގުޅިގެން އެމްއެންޑީއެފްއިން މިހާތަނަށް ބުނެފައި ވަނީ، ރާއްޖޭގެ ކަނޑުގެ ސަރަހައްދުގައި ގަވާއިދާ ހިލާފަށް ވަދެ އުޅުނު ބޭރުގެ ތިން މަސްބޯޓު ސިފައިންގެ ބެލުމުގެ ދަށަށް ގެނެސްފައިވާ ކަމަށެވެ. ނަމަވެސް އެއީ ވަކި ގައުމަކަށް ނިސްބަތްވާ މަސްވެރިންތަކެއް ކަމަށް ސިފައިން ރަސްމީކޮށް ނުބުނެ އެވެ.
ރާއްޖޭގެ ސަރަހައްދަށް ގަވާއިދާ ހިލާފަށް ވަދެ އުޅުނު ތިން މަސް ބޯޓު އަތުލައިގެންފި
ރާއްޖޭގެ ސަރަހައްދަށް ގަވާއިދާ ހިލާފަށް ވަދެ އުޅުނު ބޭރުގެ ތިން މަސް ބޯޓު އަތުލައިގަތީ އެމްއެންޑީއެފް ކޯސްޓްގާޑާއި އެއާ ކޯ ގުޅިގެން ހިންގި އޮޕަރޭޝަނެއްގައި. އަރިއަތޮޅުގެ ހުޅަނގުން އަތުލައިގަތް މި ބޯޓުތައް މިހާރު މާލެ ސަރަހައްދަށް ގެނައުމުގެ މަސައްކަތް ދަނީ ކުރަމުން.
މިދިޔަ ހަފުތާގެ ހޯމަ ދުވަހުގެ ރޭ ހިންގި އޮޕަރޭޝަނެއްގައި މި ބޯޓުތައް އަތުލައިގަތީ އަރިއަތޮޅުގެ ހުޅަނގުން ގާތްގަނޑަކަށް 170 ނޯޓިކަލް މޭލު ބޭރުންނެވެ.
އާންމު އުސޫލެއްގެ ގޮތުން ގަވާއިދާ ހިލާފަށް ރާއްޖޭގެ އިގްތިސާދީ ސަރަހައްދަށް ވަންނަ މައްސަލަތަކުގައި އަތުލައިގަންނަ ބޭރުގެ މަސްވެރިން ގިނަ ދުވަސްތަކެއް ވަންދެން ބަންދުގައި ނުބައިތިއްބަ އެވެ. އާންމު އުސޫލެއްގެ ގޮތުން ދިވެހި ސަރުކާރުތަކުން ކުރާ ކަމަކީ އެ މީހުން ޑީޕޯޓުކޮށްލުމެވެ.
މިހެން ނަމަވެސް މި މައްސަލައިގައި އަދި އެމްއެންޑީއެފްގެ ބަހެއް ނުލިބޭތީ އެންމެ ފަހުން އަތުލައިގަތް މަސް ބޯޓުތަކުގައި ތިބި މީހުންނާ މެދު އަމަލުކުރާ ގޮތެއް ނޭނގެ އެވެ.
