ދުނިޔޭގެ އެންމެ ބޮޑު ސީޕްލޭން އޮޕަރޭޓަރު ޓްރާންސް މޯލްޑިވިއަން އެއާވޭސް (ޓީއެމްއޭ)ގައި އޮތް ބެއިން ކެޕިޓަލްގެ މެޖޯރިޓީ ހިއްސާ އެމެރިކާގެ ޕްރައިވެޓް އިކުއިޓީ ފާމް، ކާލައިލް ގްރޫފަށް ވިއްކާލައިފި އެވެ.
ބެއިންއިން ޓީއެމްއޭގެ މެޖޯރިޓީ ހިއްސާ އެމެރިކާގެ ބްލެކްސްޓޯން ގްރޫޕުން ގަތީ، 2017 ވަނަ އަހަރު ޗައިނާގެ ޓެމްޕަސް ގްރޫޕާ ގުޅިގެން ހިންގި 500 މިލިއަން ޑޮލަރުގެ މުއާމަލާތެއްގަ އެވެ. ބެއިންއިން މި މުއާމަލާތް ފައިނޭންސް ކުރީ ކާލައިލް އާއި ބައެއް އެހެން ހެޖް ފަންޑުތަކުން ލޯނު ނަގައިގެންނެވެ.
ޓީއެމްއޭގެ ހިއްސާ ވިއްކާލަން ބެއިންއަށް މަޖުބޫރިވީ ކޮވިޑް ބަލިމަޑުކަމުގެ ތެރޭގައި ޓީއެމްއޭގެ އޮޕަރޭޝަންތައް ހުއްޓުމަކަށް އައިސް ކްރެޑިޓަރުންނަށް މި ލޯނުތައް އަދާނުކުރެވިގެންނެވެ.
މި މުއާމަލާތައް ފަހު ކާލައިލްގެ އިތުރުން ހެޖް ފަންޑް މެނޭޖްކުރާ ކިންގް ސްޓްރީޓް ކެޕިޓަލް މެނޭޖްމަންޓާއި ޑެވިޑްސަން ކެމްޕްނާ ކެޕިޓަލް މެނޭޖްމަންޓް އެލްޕީން ވަނީ ޓީއެމްއޭގެ ހިއްސާދާރަކަށް ވެފަ އެވެ. ބެއިން އަދި ޓެމްޕަސް ގްރޫޕުގެ މައިނޯރިޓީ ހިއްސާ ޓީއެމްއޭގައި ދެންވެސް އޮންނާނެ އެވެ.
މި މުއާމަލާތާ ގުޅޭ ހިސާބުތައް އާންމުކޮށްފައެއް ނުވެ އެވެ. ނަމަވެސް، މައުލޫމާތު އެނގޭ ފަރާތަކާ ހަވާލާދީ ރޮއިޓާސް ނޫހުގައި ރިޕޯޓްކޮށްފައިވާ ގޮތުގައި، ކާލައިލްއިން ޓީއެމްއޭގެ މެޖޯރިޓީ ގަންނަން އެއްބަސްވީ ޓީއެމްއޭގެ 300 މިލިއަން ޑޮލަރުގެ ދަރަނި ރީސްޓްރަކްޗާ ކުރަން އެއްބަސްވެގެންނެވެ. ބެއިންއިން ޓީއެމްއޭ ގަންނަން ހިންގި މުއާމަލާތުގެ އެންމެ ބޮޑު ކްރެޑިޓަރަކީ ކާލައިލް އެވެ.
ކާލައިލްއިން ބުނީ މެޖޯރިޓީ ހިއްސާދާރަކަށްވީ ނަމަވެސް ކުންފުނީގެ މެނޭޖްމަންޓް ޓީމަށް ބަދަލު ނުގެންނާނެ ކަމަށެވެ. ނަމަވެސް ކުންފުނީގެ އާ ހިއްސާދާރުންގެ މަންދޫބުންނާ އެކު ޓީއެމްއޭގެ ބޯޑު އަލުން އެކުލަވާލާނެ އެވެ. އަދި މި ބޯޑުގައި ޓީއެމްއޭގެ ފައުންޑިން ޕާޓްނަރުންގެ ތެރޭގައި ހިމެނޭ ލާސް އެރިކް ނީލްސެން ހުންނާނެ އެވެ.
ޓީއެމްއޭ ގަންނަން ހިންގި މުއާމަލާތާ ގުޅިގެން ކާލައިލްގެ މެނޭޖިން ޑިރެކްޓަރު އިއަން ޖެކްސަން ބުނީ، ރާއްޖޭގައި ވެކްސިނޭޝަން ޕްރޮގްރާމަ ކުރިޔަށް ދާނަމަ 2022 ވަނަ އަހަރުގެ ތެރޭގައި އާންމު ހާލަތަށް އެޅޭނެ ކަމަށް އުއްމީދު ކުރެވޭ ކަމަށެވެ. އަދި އެހާތަނަށް ބައިނަލްއަގްވާމީ ދަތުރުފަތުރުތައް ވެސް އާންމު ހާލަތަށް އެޅޭނެ ކަމަށް ބެލެވެ އެވެ.
ކާލައިލް ގްރޫޕުގެ ދަށުގައި ހުރި މުދަލުގެ އަގު 245 ބިލިއަން ޑޮލަރަށް އަރަ އެވެ. އަދި ޓީއެމްއޭގެ މުއާމަލާތް ހިންގި އެ ކުންފުނީގެ ގްލޯބަލް ކްރެޑިޓް ޔުނިޓުގެ މެނޭޖްމަންޓުގެ ދަށުގައި ހުރި މުދަލުގެ އަގު 59 ބިލިއަން ޑޯލަރަށް އަރަ އެވެ.
ރާއްޖޭގައި 1989 ވަނަ އަހަރު އޮޕަރޭޝަންތައް ފެށި ޓީއެމްއޭ (އޭރު ހަމިންބާޑް އައިލެންޑް ހެލިކޮޕްޓާސް)އަކީ ރާއްޖޭގެ ޓޫރިޒަމުގެ ކުރިއެރުމުގައި މުހިއްމު ރޯލެއް އަދާކުރި، އަދި ޓޫރިޒަމުން އެންމެ ބޮޑު މާލީ މަންފާއެއް ލިބުނު ކުންފުންޏެކެވެ. ހެލިކޮޕްޓަރުން ހިދުމަތް ފެށި މި ކުންފުނީގައި މިއަދު 56 މަތިންދާބޯޓު އޮވެ އެވެ.
