ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ދިން ހަމަލާގައި ހައްޔަރުކޮށްފައިވާ ފަސް މީހެއްގެ ބަންދުގެ މުއްދަތު އިތުރުކޮށްފި އެވެ.
ފުލުހުން ބުނީ އެ ހަމަލާއާ ގުޅިގެން ހައްޔަރުކުރި މުޖާޒް އަހްމަދާއި ތަހުމީން އަހްމަދާއި އަދުހަމް އަހްމަދު ރަޝީދުގެ ބަންދަށް ކްރިމިނަލް ކޯޓުން 30 ދުވަސް އިތުރުކޮށްފައިވާ ކަމަށެވެ. އެ މައްސަލައިގައި ހައްޔަރުކުރި ފާތިހުގެ ބަންދަށް މި މަހުގެ 20ގައި ވަނީ 15 ދުވަސް އިތުރުކޮށްފަ އެވެ.
މި މީހުންގެ ފަހުން ހަމަލާގެ ތުހުމަތަށް ހައްޔަރުކުރި ނ. މަނަދޫ ނޫރީގެ އަލީ ހައިޝަމް، 27ގެ ބަންދަށް 15 ދުވަސް ވަނީ އިތުރުކޮށްފަ އެވެ.
ނަޝީދަށް އަމާޒުކުރި ހަމަލާގައި ކުރިން ހައްޔަރުކުރި މީހުންނާއި ފަހުން ހައްޔަރުކުރި މީހުންނާ އެކު ޖުމްލަ އަށް މީހެއްގެ މައްޗަށް ތުހުމަތުކޮށް ތަހުގީގު އެބަދެ އެވެ. މީގެ ތެރެއިން އަދުހަމަކީ ބޮން ގޮއްވާލި ކަމަށް ތުހުމަތު ކުރެވޭ މީހާ އެވެ. ތަހުމީނަކީ ސައިކަލުގެ ވެރި މީހާ އެވެ. ދެން ތިބި މީހުން ހަމަލާއާ ގުޅެނީ ކޮން ގޮތަކުންކަން ފުލުހުން އަދި ހާމައެއް ނުކުރެ އެވެ.
މި ހަމަލާއާ ގުޅިގެން ފުލުހުން ބޭއްވި ޕްރެސް ކޮންފަރެންސްތަކުގައި އާއްމުކޮށްފައިވާ ގޮތުގައި ހައްޔަރުކޮށްފައިވާ ބައެއް މީހުންނަކީ ވެސް ހަރުކަށި ފިކުރުމުގެ މީހުން ކަމަށް ތުހުމަތު ކުރެވެ އެވެ. ނަމަވެސް މިހާތަނަށް ޓެރަރިސްޓު އެއްވެސް ނެޓުވޯކަކާ ހައްޔަރު ކުރި މީހުންނާ ގުޅުމެއް އޮތްކަން ތަހުގީގަށް އެނގިފައި ނެތް ކަމަށް ފުލުހުން ބުންޏެވެ.
ނަޝީދަށް ހަމަލާދިނީ މިދިޔަ މަހުގެ ހަ ވަނަ ދުވަހުގެ ރޭ ގެކޮޅުން ނުކުމެވަޑައިގެން ކާރުކޮޅަށް އަރާވަޑައިގަންނަވަން އުޅުއްވަނިކޮށެވެ. އެ ހަމަލާގެ ގެއްލުން ބޮޑު ކުރުމަށް ބޮމުގެ ތެރެއަށް ހުރީ ބެއަރިން ބޯލްސް ނުވަތަ ރޭޒަރު ފުށް އަޅައިފަ އެވެ. އޭގެ 11 ދަގަނޑު ބޯޅަ ނަޝީދުގެ ހަށިކޮޅުން ޑޮކްޓަރުން ނެންގެވި އެވެ.
ނަޝީދުގެ އިތުރުން އެ ހަމަލާގައި އެމަނިކުފާނުގެ ތިން ބޮޑީގާޑުންނާއި މަގުމަތިން ދިޔަ ދިވެއްސަކާއި އިނގިރޭސިވިލާތުގެ މީހަކަށް އަނިޔާވި އެވެ.
އިތުރު ފަރުވާއަށް ނަޝީދު މިވަގުތު ހުންނެވީ ޖަރުމަނުގަ އެވެ.
