ޖުލައި 15 އިން ފެށިގެން ދެކުނު އޭޝިއާގެ ޓޫރިސްޓުންނަށް ރާއްޖޭގެ ބޯޑަރުތައް ހުޅުވާލަން ސަރުކާރުން މިއަދު ނިންމައިފި އެވެ.
ދެކުނު އޭޝިއާ ޓޫރިސްޓުންނަށް ބޯޑަރުތައް ބަންދުކުރީ، ރާއްޖެ ހިމެނޭ ގޮތަށް މި ސަރަހައްދުގެ ގިނަ ގައުމުތަކުގައި ކޮވިޑް ހާލަތު ގޯސްވުމާ ގުޅިގެން މެއި, އެއް ވަނަ ދުވަހު އެވެ.
މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް ސޯލިހު ވިދާޅުވީ މިއީ އެ ގައުމުތަކުގެ ކޮވިޑުގެ ހާލަތަށް ރިއާޔަތްކުރުމަށް ފަހު ނިންމި ނިންމުމެއް ކަމަށެވެ. އަދި މިހާރު އޮތް ހާލަތުން އެ ދުވަހުން ފެށިގެން ދެކުނު އޭޝިއާ މީހުންނަށް އާދެވޭނެ ކަމުގެ ޔަގީންކަން ދެއްވި އެވެ.
ވޯކް ވިސާ ހޯލްޑަރުންނަށް ރާއްޖެ އާދެވެނީ ކަނޑައެޅިފައިވާ ވަކި އުސޫލުތަކެއް ތެރެއިން 14 ދުވަހުގެ ކަރަންޓީނު މުއްދަތެއް ފުރިހަމަކުރާ ގޮތަށެވެ.
ޓޫރިޒަމް މިނިސްޓްރީން ބުނީ ދެކުނު އޭޝިއާ ޓޫރިސްޓުންނަށް ވިސާ ލިބޭނީ ނެގެޓިވް ޕީސީއާރް ނަތީޖާއެއް ހުށައެޅުމުން ކަމަށެވެ. ޓޫރިސްޓުން ކަރަންޓީނުވާކަަށް ނުޖެހޭނެ އެވެ.
ރާއްޖޭގެ ބޯޑަރުތައް ދެކުނު އޭޝިއާއަށް ހުޅުވާލުމަކީ އިގުތިސޯދަށް، ހާއްސަކޮށް ޓޫރިޒަމް ސިނާއަތަށް، ކުރިއެރުމެއް ލިބޭނެ ކަމަކަށެވެ. އެގޮތުން، ރާއްޖެއަށް ގިނަ އަދަދަކަށް އިންޑިއާއިން ޓޫރިސްޓުން އަންނަމުން ދިޔަ ދުވަސްވަރެއްގައި ބޯޑަރު ބަންދުކުރުމުން ޓޫރިޒަމް އަދަދުތަކަށް ވަނީ އަސަރުކޮށްފަ އެވެ.
ޓޫރިޒަމް އަދަދުތައް ދަށަށް ދިޔަ ނަމަވެސް، މި އަހަރުގެ ތެރޭގައި ރާއްޖެއަށް ބައި މިލިއަން ޓޫރިސްޓުން ޒިޔާރަތްކޮށްފި އެވެ. އަދި މިހާރުގެ ހާލަތުން އަހަރުގެ ތެރޭގައި ކަނޑައެޅި އެއް މިލިއަން ޓޫރިސްޓުންގެ އަމާޒަށް ވާސިލުވެވޭނެ ކަމުގެ ޔަގީންކަން މިއަދު ވެސް ސަރުކާރުން ދިނެވެ.
