ރާއްޖެ އާއި އިޒްރޭލާ ދެމެދު ވައިގެ ދަތުރުފަތުރު ކުރުމަށް ހަމަޖެހިފައިވާ ކަމަށް ބުނެ ފަތުރަމުން އަންނަ ވާހަކަތައް ސަރުކާރުން މިއަދު ދޮގުކޮށްފި އެވެ.
އަންނަ ސެޕްޓެމްބަރު މަހުން ފެށިގެން ރާއްޖެއަށް ސީދާ ދަތުރުތައް ފެށުމަށް ހަމަޖެހިފައިވާ ކަމަށް ކަމީނޯސް ނަމަކަށް ކިޔާ އިޒްރޭލުގެ ޓްރެވަލް ކުންފުންޏަކާ ހަވާލާދީ ބޭރުގެ ބައެއް ނޫސްތަކުން ވަނީ ބުނެފަ އެެވެ.
އިޒްރޭލުން ރާއްޖެއަށް އަންނަން ޖެހެނީ ސީޝެލްސް ނޫނީ ދުބާއީ މަގުން ކަމަށްވާއިރު، އަންނަ ސެޕްޓެމްބަރު މަހުގެ ހަ ވަނަ ދުވަހުން ފެށިގެން އޮކްޓޯބަރު މަހުގެ ހަތަރަކާ ދެމެދު ފަސް ފްލައިޓު ބާއްވާނެ ކަމަށް އެ ކުންފުނީގެ އޮފިޝަލު ބުނެފައިވެ އެވެ.
ރިސޯޓް ޕެކޭޖުތަކާއެކު ދެކޮޅު ޓިކެޓުގެ އަގުތައް ކަނޑައަޅާފައިވާއިރު، އެ ދަތުރުތަކަށް ބޭނުންކުރަނީ ސީޝެލްސްގެ ގައުމީ އެއާލައިން، އެއާ ސީޝެލްސްގެ މަތިންދާ ބޯޓެއް ކަމަށް ވެސް ވަނީ ހާމަކޮށްފަ އެވެ.
ނަމަވެސް، ޓްރާންސްޕޯޓް މިނިސްޓްރީން މިއަދު ނެރުނު ބަޔާނެއްގައި ބުނީ އެއީ ހަގީގަތާ ހިލާފު އެއްވެސް އަސާސެއް ނެތް ވާހަކަތަކެއް ކަމަށެވެ.
އަދި ރާއްޖެ އާއި އިޒްރޭލާ ދެމެދު ވައިގެ ދަތުރުފަތުރު ކުރުމާ ގުޅޭގޮތުން މިހާތަނަށް އެއްވެސް ވަރަކަށް މަޝްވަރާކުރެވި، އެއްވެސް އެއާލައިނަކަށް ހުއްދަ ދެވިފައިވާ ނުވާ ކަމަށް މިނިސްޓްރީން ބުނެފައިވެ އެވެ.
"ދިވެހި ސަރުކާރުން މިފަދަ ހުއްދައެއް ދިނުމަށް ވިސްނާފައި ނުވާ ކަމަށާއި، އަދި އިޒްރޭލާ ދެމެދު ވައިގެ ދަތުރުފަތުރު ކުރުމާގުޅޭ އެއްބަސްވުމެއްގައި ސޮއި ކުރުމަށް ނިންމާފައިނުވާ ވާހަކަ މައުލޫމާތަށްޓަކައި ދަންނަވަމެވެ،" އެ ބަޔާނުގައި ބުންޏެވެ.
ރާއްޖެ އާއި އިޒްރޭލުން 1965 ގައި އިބްރާހިމް ނާސިރުގެ ބޮޑުވަޒީރުކަމުގައި ސިޔާސީ ގުޅުން ގާއިމްކުރި އެވެ. އެކަމަކު ޕްރެޝަރު ބޮޑުވެ 1974 ވަނަ އަހަރުން ފެށިގެން އެ ގުޅުން އޮތީ ސަސްޕެންޑްކޮށްފަ އެވެ. ރާއްޖޭން ވަނީ 2014 ވަނަ އަހަރުން ފެށިގެން އިޒްރޭލުގެ އުފެއްދުންތައް އެތެރެކުރުން މަނާކޮށްފަ އެވެ.
ނަމަވެސް، އިޒްރޭލު ޓޫރިސްޓުން ރާއްޖެއަށް ޒިޔާރަތް ކުރުމަށް ހުރަހެއް ނެތް އިރު، މިދިޔަ އޭޕްރީލް މަހާ ހަމައަށް މިއަހަރު 1،400 އެއްހާ އިޒްރޭލު ފަތުރުވެރިން ރާއްޖެއަށް އައިސްފައިވެ އެވެ.
މިދިޔަ މެއި މަހުގެ ތެރޭގައި އިރުމަތީ ގުދުސްގެ މައްސަލަ އަނެއްކާވެސް ހޫނުވެ، އިޒްރޭލުން ގާޒާއަށް ބޮން އަޅައި ދިން ހަމަލާތަކުގައި ފަލަސްތީނުގެ އެތައް ރައްޔިތުންނެއް ވަނީ މަރުވެފަ އެވެ. އެ އުދުވާނު ހުއްޓާލުމަށް ގޮވާލައި، ރާއްޖޭގެ އެކި ކަންކޮޅުތަކުން ރައްޔިތުން ނުކުމެ ވަނީ އިޒްރޭލާ ދެކޮޅަށް އަޑުއުފުލައިފަ އެވެ.
