ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން ދިން ޓެރަރިސްޓު ހަމަލާއާ ގުޅިގެން މަޖިލީހުން ހިންގަމުންދާ ޕާލިމަންޓަރީ އިންކުޔަރީއަށް ވަކިވަކި ސިފައިން ހާޒިރުނުކުރެވޭނެކަމަށް އެމްއެންޑީއެފުން ނިންމުމުން، ދިފާއީ ބާރުގެ އިސް ސަފަށް އެމަނިކުފާނު މިއަދު ރައްދު ދެއްވައިފި އެވެ.
ރާއްޖޭގައި ފުރަތަމަ ފަހަރަށް ޕާލިމަންޓްރީ އިންކުޔަރީއެއް ހަދަން މަޖިލީހުގެ މެމްބަރުން އިގުރާރުވެ، ސަލާމަތާއި ހިދުމަތްތަކާބެހޭ (241) ކޮމިޓީއަށް ބާރުދީގެން ކުރިއަށް ގެންދާ އިންކުޔަރީއަށް މައުލޫމާތު އެއްކޮށްފައިވާއިރު، އެކަމުގައި ކުރީގެ އަދި މިހާރުގެ މާހިރުންގެ ލަފާއާއި އިރުޝާދު ވެސް ވަނީ ހޯދައިފަ އެވެ.
އަދި އެކަމާ ގުޅުންހުރި ފަރާތްތަކާ ސުވާލުކުރާނީ އެ މައުލޫމާތުތައް ދިރާކުރުމަށްފަހު ކަމަށް އެ ކޮމިޓީގެ މުގައްރިރު މުހައްމަދު އަސްލަމް ވަނީ ވިދާޅުވެފަ އެވެ.
"އަދަދު"އަށް އެނގިފައިވާ ގޮތުގައި މައުލޫމާތު އެއްކުރުމުގެ މަރުހަލާ ނިންމައި، ކޮމިޓީން ވަނީ ހާޒިރުކުރަންޖެހޭ ފަރާތްތައް ފާހަގަކޮށް، އެ ފަރާތްތަކަށް އަންގަން ތައްޔާރުވެފައިވާއިރު، އެ ލިސްޓުގެ އެންމެ ކުރީގައި އޮތީ ސިފައިންނާއި ފުލުހުންނެވެ.
ކޮމިޓީން އެ ލިސްޓު އެކުލަވާލަމުން ދިޔަ ދަނޑިވަޅުގައި އެމްއެންޑީއެފުން އިއްޔެ ވަނީ އެކަން ނުކުރެވޭނެ ކަމަށް ބުނެ ވަރުގަދަ ބަޔާނެއް ނެރެފަ އެވެ.
އެ ދިގު ބަޔާނުގައި ބުނީ އެންކުޔަރީއަށް ސިފައިން އެއްބާރުލުން ދޭނެ ކަމަށެވެ. އެކަމަކު ޖަވާބުދާރީވާނީ ސިފައިންގެ މުއައްސަސާ އެވެ. ގާނޫނުއަސާސީގެ އިތުރުން ސިފައިންގެ ގާނޫނަށް ހަވާލާދީ އެމްއެންޑީއެފުން ބުނީ ވަކިވަކި ސިފައިން ކޮމިޓީއަށް ހާޒިރުކޮށް ސުވާލެއް ނުކުރެވޭނެ ކަމަށް ބުންޏެވެ.
އެކަމާ މަޖިލީހުގެ ފުލް ކޮންޓްރޯލް އޮންނަ އެމްޑީޕީގެ މެމްބަރުން ނުރުހުން ފާޅުކުރައްވަމުން ގެންދަވާއިރު، ނަޝީދު ވިދާޅުވީ ހަމަލާއާ ގުޅިގެން ދަށް ރޭންކުތަކުގައި ތިބި ސިފައިން ކަންކުރި ފުރިހަމަ ގޮތް ގެއްލުވާލުމަށް ސިފައިންގެ އިސް ސަފުން އެއްވެސް ނިންމުމެއް ނިންމައިގެން ނުވާނެ ކަމަށެވެ.
"އަޅުގަނޑު މަރާލުމަށް ބޮން ގޮއްވާލި ވަގުތު ކައިރީގައި ތިބި މޮޅު ކުދިންގެ ބަސް ނުބުނެވޭ ގޮތަށް ކަންކަން ނިންމުމަކީ ވަރަށް ބޮޑު ބޭއިންސާފެއް،" ހަމަލާގައި ލިބިވަޑައިގެންނެވި ޒަހަމްތަކަށް އިތުރު ފަރުވާ ހޯއްދެވުމަށް މިވަގުތު ޖަރުމަނުގައި ހުންނެވި ނަޝީދު ކުރެއްވި ޓްވީޓުގައި ވިދާޅުވި އެވެ.
ނަޝީދުގެ ވާހަކަފުޅަށް ތާއީދުކުރައްވައި މަޖިލީހުގެ ނައިބު ރައީސް އީވާ އަބްދުﷲގެ އިތުރުން އެމްޑީޕީގެ ގިނަ މެމްބަރުން ގެންދަވަނީ އެމަނިކުފާނުގެ ޓްވީޓު ރީޓްވީޓު ކުރައްވަމުންނެވެ.
ވަކިވަކި ސިފައިން މަޖިލީހަށް ހާޒިރު ނުކުރެވޭނޭ ކަމަށް ބުނެ އެ ބަޔާނުގައި ހަވާލާދީފައި އޮތް އެއް މާއްދާއަކީ ސިފައިންގެ ގާނޫނުގެ 24 ވަނަ މާއްދާ އެވެ. އެ މާއްދާގައި ބުނެފައި އޮންނަނީ ސިފައިންގެ މީހެއްގެ ހައިސިއްޔަތުން ލިބޭ މައުލޫމާތުތައް އެ މާއްދާގައި ބުނެފައިވާ ފަރާތްތަކަށް މެނުވީ ހާމަކޮށްގެން ނުވާނެ ކަމަށެވެ. އޭގެ ތެރޭގައި ރައްޔިތުންގެ މަޖިލީހެއް ނުހިމެނެ އެވެ.
އެހެންކަމުން ސިފައިންގެ ވަކިވަކި މީހުން މަޖިލީހަށް ހާޒިރުކުރި ނަމަވެސް ވަޒީފާގެ ހައިސިއްޔަތުން ލިބިފައިވާ މައުލޫމާތު ހާމަކުރުން އެ ގާނޫނު ހުއްދައެއް ނުކުރެ އެވެ.
ނަމަވެސް، އެކަމުގައި މަޖިލީހުގެ ހިޔާލުތަފާތެވެ.
މަޖިލީހަށް ވަކިވަކި ސިފައިން ހާޒިރުކޮށް ސުވާލުކުރެވިދާނޭ ކަމަށް މަޖިލީހުން ދެކެނީ ގާނޫނު އަސާސީއަށާއި މަޖިލީހުގެ ގަވާއިދާއި ކުރީގެ ސުޕްރީމް ކޯޓުން މަޖިލީހަށް ދީފައިވާ އިސްތިރާޝީ ލަފައަކަށް ބިނާކޮށެވެ.
2011، މާޗް 10 ވަނަ ދުވަހު ނެރެފައިވާ އެ އިސްތިޝާރީ ލަފާގައި ބުނެފައި އޮންނަނީ، ސިފައިންނާއި ފުލުހުންނާއި ސަރުކާރުގެ ނުވަތަ ދައުލަތުގެ މަގާމެއްގައި ހުރި މީހަކު ވިޔަސް މަޖިލީހަށް ހާޒިރުކޮށް ސުވާލުކުރުމަކީ މަޖިލީހަށް ލިބިގެންވާ ބާރެއް ކަމަށް ގާނޫނު އަސާސީ ގައި ބުނެފައި އޮންނަ ކަމަށެވެ.
