ބޮލުގައި އަތް އަޅާލައިގެން، ގޮސް ހުސްވެ ސުހެއިލް އެ ހުރީ އޭނާގެ އެތައް ބުރަ މަސައްކަތަކުން ހޯދި ފައިސާކޮޅު އަނދައިގެން ދިޔުމުންނެވެ.
"އެއީ ވަރަށް ބުރަކޮށް މަސައްކަތް ކުރާ މީހެއް، ގައުމުގައި ތިބި އޭނާގެ އާއިލާގެ މީހުން ދިރިއުޅުން ރަނގަޅު ކުރުމަށް އަބަދުވެސް ފައިސާ ހޯދައިގެން ފޮނުވޭތީ އޭނާ ބަލާނެ،" ހއ. ހޯރަފުށިން ވާހަކަ ދެއްކި މީހަކު ބުންޏެވެ.
ހޯރަފުށީގައި އިއްޔެ ސުހައިލް ދިރިއުޅޭ ރޯށަނީއާގޭގައި އަލިފާނުގެ ހާދިސާއެއް ހިނގި އެވެ. އޭނާ ފައިސާ ރައްކާކޮށްގެން ގެންގުޅޭ ފޮށީގައި އަލިފާނުގެ އަސަރުކުރިއިރު އޭގައި ބޮޑިއަކަށް ރައްކާކޮށްފައި ހުރި ފައިސާތަކުގެ ބައެއް ވަނީ އަނދައިގެން ގޮސްފަ އެވެ.
އެއީ، އޭނާ ރައްކާކޮށްގެން ގެންގުޅުނު 5،340 ރުފިޔާ އެވެ. ގިނައީ 100 އިގެ ނޫޓެވެ.
އޭނާ އެކަނި ދިރިއުޅެމުންދާ އެ ގޭގައި އަލިފާން ހިފި ގޮތެއް ސާފެއް ނުވެ އެވެ. އެއީ ބަޔަކު ގަސްދުގައި ކުރި ކަމެއް ކަމަށް ބަޔަކު ތުހުމަތު ކުރާއިރު، މައްސަލަ މިހާރު ފުލުހުން ގެންދަނީ ތަހުގީގު ކުރަމުންނެވެ.
"މައްސަލަ މިދަނީ ތަހުގީގު ކުރަމުން،" ފުލުހުންގެ މީޑިއާ އޮފިޝަލް ވިދާޅުވި އެވެ.
ހޯރަފުށީ ކައުންސިލްގެ ނައިބު ރައީސް އަހުމަދު އިމްދާހް، "އަދަދު" އަށް ވިދާޅުވި ގޮތުގައި، އެ ހާދިސާގައި އެ ގޭގެ ހިފާ ގެންގުޅޭ ބައެއް ތަކެއްޗަށް ވެސް ވަނީ ގެއްލުންވެފަ އެވެ.
"ރޭޑިއޯ ވެސް ބާލީސް ވެސް އެނދުވެސް ފަންކާ ވެސް ވަނީ ވަރަށް ބޮޑަށް އަނދާފައި،" އޭނާ ވިދާޅުވި އެވެ.
ހާދިސާއިން ލިބުނު ފުން ހިތާމަ އާއި މާޔޫސްކަމުގައި ސުހެއިލް ހުއްޓައި އެކަން ސޯޝަލް މީޑިއާގައި ގިނަ ބައެއްގެ ސަމާލު ކަމަށް އަޔެވެ. އޭނާގެ ބުރަ މަސައްކަތުން ހޯދި ފައިސާތައް އަނދައި، އެކަމާ ހިތާމަކުރަމުންދާ މަންޒަރު ފެންނަ ފޮޓޯތައް ސޯޝަލް މީޑިއާގައި އާންމުވި އެވެ. އެއާއެކު، އޭނާއަށް އެހީވުމަށާއި އެ ފައިސާތައް އަނބުރާ އޭނާއަށް ލިބޭނެ ގޮތެއް ހޯދައިދިނުމަށް ގިނަ ބަޔަކު އެދެމުން ދިޔަ އެވެ.
"އޭނާއަށް އެހީވާން ޖެހޭ، އެ ފައިސާތައް އަނބުރާ ލިބޭނެ ގޮތެއް ސަރުކާރުން ހަދައިދޭނެ ކަމަށް އުއްމީދު ކުރަން،" އާންމުވި ފޮޓޯތަކަށް މީހަކު ކޮމެންޓް ކޮށްފައިވެ އެވެ.
ހިތްދަތިކަމުގައި ހުރި ސުހެއިލަށް މިހާރު ވަނީ ހިތްހަމަޖެހުމެއް ލިބިފަ އެވެ. މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ޑެޕިއުޓީ މެނޭޖާ މުހައްމަދު ނާސިހް ވިދާޅުވި ގޮތުގައި، ފައިސާ ބަދަލު ކުރަން ފޯމު ހުށަހެޅުމުން ގައިޑްލައިނާ އެއްގޮތްވާ ގޮތުގެ މަތީން އެ ފައިސާތައް ބަދަލު ކޮށްދޭނެ އެވެ. އެކަމަށް އިތުރު ފީއެއްވެސް ނުނަގާނެ ކަމަށް އޭނާ ވިދާޅުވި އެވެ.
ހަލާކުވެފައިވާ ނުވަތަ އުނިކަމެއް ލިބިފައިވާ ނޫޓާއި ފައިސާ ފޮއްޗަށް ބަދަލުދިނުމާބެހޭ ގަވައިދު ބުނާ ގޮތުން އަލިފާނުގެ ހާދިސާއަކުން ނުވަތަ ގުދުރަތީ ހާދިސާއަކުން ހަލާކުވެފައިވާ ނުވަތަ އުނިކަމެއް ލިބިފައިވާ ނޫޓެއް ނުވަތަ ފައިސާފޮއްޗެއްގެ އުނިވެފައިވާ ބައި އެކީގައި ނެތިގެން ގޮސްފައިވާ ކަމަށް އޮތޯރިޓީއަށް ގަބޫލުކުރެވޭ ވަރުގެ ހެކި ލިބިފައިވާ ނަމަ، އެ ނޫޓެއް ނުވަތަ ފައިސާފޮއްޗެއްގެ ސިއްކައިގެ އަގު ދެވޭނެ އެވެ.
ބިދޭސީ މީހާގެ ފައިސާތައް އަނދާފައި: ބަދަލުގައި އާ ފައިސާތަކެއް ދެނީ-- ފޮޓޯ: ސޯޝަލް މީޑިއާ
