ރައްޓެހިވެގެން އުޅުނު އަންހެން ކުއްޖާގެ ފޮޓޯތައް ލީކުކުރާނެ ކަމަށާއި ގްރޫޕެއް ފޮނުވައި ރޭޕްކުރާނެ ކަމުގެ އިންޒާރުތައް ދެމުންދާތާ ނުވަ މަސްވެ، 17 އަހަރުގެ ކުއްޖަކު ނަފްސާނީ ބައްޔަށް ހުށަހެޅިފައިވާ ކަމަށް އާއިލާ އިން ބުނެފި އެވެ.
ފުލުހުންނަށް މި މައްސަލަ މިދިޔަ އަހަރުގެ ސެޕްޓެމްބަރު މަހުގެ ތެރޭގައި ރިޕޯޓްކޮށްފައި ވިޔަސް އެކަށީގެންވާ ފިޔަވަޅެއް ނޭޅި އަންހެން ކުއްޖާއަށް ތަކުރާރުކޮށް އިންޒާރު ދެމުންދާ ކަމުގެ ކަންބޮޑުވުން އާއިލާ އިން ވަނީ ސޯޝަލްމީޑިއާގައި ފާޅުކޮށްފަ އެވެ. މިއާއެކު ގިނަ ބައެއްގެ ނުރުހުން މި މައްސަލައިގައި އަމާޒުވުމުން ފުލުހުން މިއަދު ބުނީ މައްސަލައިގެ ތަހުގީގަށް ހެއްކާއި ގަރީނާ ލިބިފައިވާ ކަމަށެވެ.
ފުލުހުން އާއްމުކުރި މައުލޫމާތުން އެނގެނީ ސެޕްޓެމްބަރު މަހު ހުށަހެޅި މައްސަލައިގެ ތަހުގީގު އަދިވެސް ނުނިމޭ ކަމެވެ.
"މައްސަލަ ޕްރޮސިކިއުޓާ ޖެނަރަލްގެ އޮފީހަށް ދައުވާކުރުމަށް ފޮނުވުމަށްޓަކައި ކުރަން ޖެހޭ އެންމެ ފަހުގެ މަސައްކަތްތައް ކުރަމުންދަނީ،" އޮފިޝަލް ވިދާޅުވި އެވެ.
މީޑިއާތަކަށް ފުލުހުން މި މެސެޖް ފޮނުވީ، އަންހެން ކުއްޖާއަށް ތަކުރާރުކޮށް ބްލެކްމެއިލްކުރަމުންދާ މައްސަލަ ހައްލު ނުވެގެން ސޯޝަލްމީޑިއާގައި އެ ވާހަކަ ލިޔެ ކަންބޮޑުވުންފާޅުކުރަމުން ދާތީ ނޫސްވެެރިއަކު ކުރި ސުވާލަކާ ގުޅިގެންނެވެ.
އޮފިޝަލް ވިދާޅުވި ގޮތުގައި އަންހެން ކުއްޖާގެ ރައްކާތެރިކަން ކަށަވަރުކޮށް، ބޭނުންވާ އެހީތެރިކަން ފޯރުކޮށްދިނުމަށް އަޅަންޖެހޭ ފިޔަވަޅުތައް ވަނީ އަޅައިފަ އެވެ.
ސޯޝަލްމީޑިއާގައި އެ ކުއްޖާގެ ދައްތައަކު ވަނީ މި މައްސަލަ ދިގުލައިގެންދާތީ ނުރުހުންފާޅުކޮށްފަ އެވެ. އޭނާ ޓްވިޓާގައި ހިއްސާކޮށްފައިވާ ފޯނު ކޯލް ރިކޯޑިންތަކާއި ޗެޓްގެ ސްކްރީން ޝޮޓުތަކުން އެނގޭ ގޮތުގައި ފުލުހުންނަށް ހުށަހެޅި މައްސަލަ އަނބުރާ ނެގުމަށް ވެސް އަންހެން ކުއްޖާއަށް ވަނީ އިންޒާރުދީފަ އެވެ.
ބްލެކްމެއިލް ކުރަމުންދާ އުމުރުން 24 އަހަރުގެ މީހާއާ، އަންހެން ކުއްޖާ ރުޅިވި ހިސާބުން އިންޒާރުތައް ދޭން ފެށި ކަމަށާއި، ބައެއް ފޮޓޯތައް ވެސް ލީކްކޮށްލާފައިވާ ކަމަށް ދައްތަ ބުނެފައިވެ އެވެ. އަދި އެ ކުއްޖާ މާލެ އަތުވެއްޖެ ނަމަ ގްރޫޕެއް ލައްވައި ރޭޕްކުރާނެ ކަމުގެ އިންޒާރު ވެސް ދީފައިވާ ކަމަށް އޭނާ ބުންޏެވެ.
މި އިންޒާރުތައް ކެނޑިނޭޅި ލިބެމުންދާތީ ނަފްސާނީ ގޮތުން ވެސް އެ ކުއްޖާއަށް އެތައް އަސަރެއްކޮށްފައިވާ ކަމަށް ދައްތަ ބުނެފައިވެ އެވެ.
"ކުއްޖާގެ އަބުރު ވަނީ ނަގާލާފައި، އޭނާ ވަނީ ޑިޕްރެޝަންއަށް ގޮސްފައި،" ދައްތަ ބުނެފައިވެ އެވެ.
އޭނާ ބުނި ގޮތުގައި، އެ ކުއްޖާގެ ފޭކް ސޯޝަލް މީޑިއާ އެކައުންޓްތައް ހަދައިގެން ވެސް ބަދުނާމު ކުރުމަށް އެ މީހާ ދަނީ މަސައްކަތް ކުރަމުންނެވެ. އަދި، އެކި ނަންބަރުތަކުން ގުޅައި، ހަޑިހުތުރު ބަހުން އިންޒާރު ދެމުންދާ ކަމަށެވެ.
"ކައިވެނި ކުރިޔަސް، އުފަލުގައި ދުވަހަކު ވެސް ނޫޅެވޭނެ ކަމުގެ އިންޒާރު ވަނީ ދީފައި،" ދައްތަ އާންމުކުރި ސްކްރީން ޝޮޓުތަކުން އެނގެ އެވެ.
މި މައްސަލަ ތަހުގީގު ނުނިމި، ނުވަ މަސް ވެގެން ގޮސްފައިވާއިރު، މިހާތަނަށް ފިޔަވަޅެއް އެޅިފައިނުވާތީ ގިނަ ބަޔަކު ވަނީ ކަންބޮޑުވުން ފާޅުކޮށްފަ އެވެ.
