ކޮވިޑް ހާލަތު އިންތިހާއަށް ގޯސްވެ ސިއްހީ ހިދުމަތްތެރިންނަށް ޖެހިފައިވާ މި ދަނޑިވަޅުގައި ދިވެހިރާއްޖޭގެ ގައުމީ ޔުނިވާސިޓީ (އެމްއެންޔޫ)ގެ ނަރުސްކަން ދަސްކުރާ ދަރިވަރުން ހިލޭސާބަހަށް ހިދުމަތަށް ނުކުމެއްޖެ އެވެ.
ރާއްޖޭގައި ކޮވިޑުގެ ތިންވަނަ ރާޅެއް އައިސް ރެކޯޑް އަދަދަކަށް ބަލި ފެތުރޭތީ ސިއްހީ ދާއިރާއިން ހިދުމަތްތެރިން ނުކުތުމަށް ސަރުކާރުން ގޮވާލީ މި މަހުގެ ކުރީކޮޅު އެވެ. އެ ގޮވާލުމަށް އިޖާބަދީ އެމްއެންޔޫގައި ކިޔަވާ 136 ނަރުހަކު އަންނަނީ ކޮވިޑް ފެސިލިޓީތަކުގައި ހިދުމަތް ދެމުންނެވެ.
އެމްއެންޔޫގެ ދަރިވަރުންނާއި ސްޓާފުން އަންނަނީ މި ބަލިމަޑުކަން ރާއްޖެއިން ފެނުނު ދުވަހުން ފެށިގެން އިމާޖެންސީ ރެސްޕޮންސްގައި ވޮލަންޓިއަރުންގެ ގޮތުގައި ހަރަކާތްތެރިވަމުންނެވެ.
އެ ޔުނިވާސިޓީން ބުނީ މާޗު 2020 ވަނަ ދުވަހުން ފެށިގެން މިއަދާ ހަމައަށް އެމްއެންޔޫގެ 1026 ދަރިވަރުންނާއި 323 މުވައްޒަފުން ހިމެނޭ ގޮތަށް 1349 މީހުން ވޮލިންޓިއާ ކުރި ކަމަށެވެ. އަދި މާލެ އާއި އަތޮޅުތަކުގެ އިމާޖެންސީ ސެންޓަރުތަކާއި ޓާސްފޯސްތަކުގައި ފްރަންޓްލައިން އެހީތެރިންގެ ގޮތުގައި ބައިވެރިވި އެވެ.
އެމްއެންޔޫގެ ވޮލިންޓިއަރުންގެ ތެރެއިން އެންމެ ގިނަ އަދަދެއްގެ ދަރިވަރުންނާއި މުވައްޒަފުން ހަރަކާތްތެރިވީ ކާބޯ ތަކެތި ފޯރުކޮށް ދިނުމުގަ އާއި އެހެނިހެން ގޮތްގޮތުން ހިލޭ ސާބަހަށް މަސައްކަތްކޮށް ދިނުމުގަ އެވެ. އެ މަސައްކަތުގައި ޔުނިވާސިޓީގެ 402 ދަރިވަރަކާއި 52 މުވައްޒަފަކު ހަރަކާތްތެރިވި އެވެ.
ދެން އެންމެ ގިނަ ވޮލިންޓިއަރުން ހަރަކާތްތެރިވީ މާލެ އާއި އަތޮޅުތަކުގެ ހޮސްޕިޓަލްތަކުގެ ނަރުހުންނާއި މުވައްޒަފުންނާއި ކްލިނިކްތަކާއި އަދި މެޑިކަލް ޓީމްތައް ކޮވިޑް-19 ތައްޔާރުވުމަށް ތަމްރީން ދިނުމުގަ އެވެ. އެ މަސައްކަތުގައި 370 ދަރިވަރުންނާއި 12 މުވައްޒަފުން ހަރަކާތްތެރިވި އެވެ.
