ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން ޓެރަރިސްޓު ހަމަލާ ދިން އިރު، އެމަނިކުފާނަށް ދެމުންދިޔަ ސެކިޔުރިޓީ ބްރީޗްވި ގޮތުގެ ޕާލިމަންޓަރީ އެންކުޔަރީއަށް ހާޒިރުކުރާ މީހުން ދޭ މައުލޫމާތަކާ ގުޅިގެން އެ މީހުންނާމެދު އެއްވެސް ފިޔަވަޅެއް ނޭޅުމަށް ރައްޔިތުންގެ މަޖިލީހުން މިއަދު އިލްތިމާސްކޮށްފި އެވެ.
ނަޝީދަށް ދިން ހަމަލާއާގުޅޭ ހާއްސަ މައްސަލަ ދިރާސާ ކުރުމަށްފަހު މަޖިލީހުގެ ސަލާމަތީ ހިދުމަތްތަކާބެހޭ (241) ކޮމިޓީން ނިންމީ ހަމަލާދިން އިރު ރައީސް ނަޝީދަށް ދެމުންދިޔަ ސެކިޔުރިޓީ ބްރީޗުވި ގޮތުގެ އިންކުޔަރީއެއް، ބޭރުގެ މާހިރުންގެ އެހީތެރިކަމާއެކު އެންމެ ފުޅާމިނެއްގައި ހެދުމަށެވެ.
ތާރީހުގައި ފުރަތަމަ ފަހަރަށް ކޮމިޓީ މެދުވެރިކޮށް މަޖިލީހުން ކުރިއަށް ގެންދާ އިންކުޔަރީއަށް ސަލާމަތީ ހިދުމަތްތަކުގެ އިތުރުން ކަމާގުޅޭ އެހެން މުއައްސަސާތައް ހާޒިރުކޮށް ދަނީ މައުލޫމާތު ސާފު ކުރަމުންނެވެ.
އަދި ކަމާގުޅޭ ކުރީގެ އަދި މިހާރުގެ މާހިރުންގެ ލަފާއާއި އިރުޝާދު ވެސް ކޮމިޓީން ދަނީ ހޯދަމުންނެވެ.
އެކަމާ ގުޅިގެން މަޖިލީހުން މިއަދު ނެރުނު ކުރު ބަޔާނެއްގައި ބުނީ ސަލާމަތީ ހިދުމަތްތަކާ ބެހޭ (241) ކޮމިޓީން ހިންގާ އިންކުޔަރީއަށް ހާޒިރުކުރާ ފުލުހުންނާއި ސިފައިންގެ އިތުރުން ދައުލަތުގެ އެއްވެސް މުވައްޒަފަކު ދޭ މައުލޫމާތަކާ ގުޅިގެން އެމީހެއްގެ ވަޒީފާއަށް އަސަރުކުރާފަދަ އެއްވެސް ފިޔަވަޅެއް ނޭޅުމަށް އެ މަޖިލީހުގެ އެ މައްސަލަ ބަލާ ކޮމެޓީން އިލްތިމާސް ކުރާ ކަމަށެވެ.
ނަޝީދަށް ދިން ހަމަލާއާގުޅޭ ހާއްސަ މައްސަލަ ދިރާސާ ކުރުމަށްފަހު މަޖިލީހުގެ ސަލާމަތީ ހިދުމަތްތަކާބެހޭ (241) ކޮމިޓީން ނިންމީ ހަމަލާދިން އިރު ރައީސް ނަޝީދަށް ދެމުންދިޔަ ސެކިޔުރިޓީ ބްރީޗުވި ގޮތުގެ އިންކުޔަރީއެއް، ބޭރުގެ މާހިރުންގެ އެހީތެރިކަމާއެކު އެންމެ ފުޅާމިނެއްގައި ހެދުމަށެވެ.
އެމްޑީޕީގެ ގިނަ މަޖިލިސް މެމްބަރުން ވެސް ހިމެނޭ ގޮތަށް ގިނަ މެމްބަރުން ގެންދަވަނީ އެ ހަމަލާއާ ގުޅިގެން ސަލާމަތީ ހިދުމަތްތަކަށް ފާޑުކިޔުން އަމާޒު ކުރަމުންނެވެ.
ޓެރަރިޒަމްގެ ހަމަލާއާ ގުޅިގެން ނަޝީދުގެ ފުރާނަ ސަލާމަތްކުރަން އޭޑީކޭ ހޮސްޕިޓަލުގެ ޑޮކްޓަރުންގެ ހާއްސަ ޓީމަކުން ގިނަ ސާޖަރީތައް ކުރުމަށްފަހު އެމަނިކުފާނު މިހާރު ވަނީ އިތުރު ފަރުވާއަށް ޖަރުމަނަށް ގެންދެވިފަ އެވެ.
ނަޝީދަށް ދިން ހަމަލާއާ ގުޅިގެން މިހާތަނަށް ހަތަރު މީހަކު ވަނީ ހައްޔަރު ކޮށްފަ އެވެ. އެއީ ބޮންގޮއްވާލުމުގައި އަމަލީގޮތުން ބައިވެރިވި ކަމަށް ތުހުމަތު ކުރެވޭ އަދުހަމް އަހުމަދުގެ އިތުރުން، މއ. ފޭރުގެ މުޖާޒް އަހްމަދު 21، އާއި ގއ. ކޮނޑޭ، ފޮޅޭމާ، ތަހުމީން އަހްމަދު، 32 އާއި ލ. ގަން، ދުންފިނިއުފާ، އަހްމަދު ފާތިހު އެވެ.
އެ ހަތަރު މީހުންނަކީ ވެސް ހަރުކަށި ފިކުރާ ގުޅުންއޮތް މީހުން ކަމަށް ބެލެވޭކަމަށް ފުލުހުން ބުނެފައިވެ އެވެ.
