ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ބޮމެއް ގޮއްވާލުމުން ލިބިވަޑައިގަތް ޒަހަމްތަކަށް އޭޑީކޭގައި ފަރުވާ ހޯއްދަވަނިކޮށް، އެ ހޮސްޕިޓަލުގެ ފާހާނާއެއްގެ ތެރޭގައި ސިފައިންގެ މީހަކު ފިސްތޯލައެއް ބޭއްވި މައްސަލަ ތަހުގީގު ކުރަން ފަށައިފި އެވެ.
މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް)ގެ ސްޕޯކްސްޕާސަން، މޭޖަ ޖެނެރަލް އިބްރާހިމް އާޒިމް މިރޭ "އަދަދު"އަށް ވިދާޅުވީ ފާހާނާގައި ފިސްތޯލައެއް ބޭއްވިފައި ވަނީ ސިފައިންގެ މީހެއްގެ އަތުން ކަަމަށެވެ.
"މިކަމާ ގުޅިގެން އޭނާ ވަނީ ޑިއުޓީތަކުން އެއްފަރާތް ކުރެވިފައި،" އާޒިމް ވިދާޅުވި އެވެ.
އޭނާ ވިދާޅުވި ގޮތުގައި މިލިޓަރީ ޕޮލިހުން އެ މައްސަލަ ބެލި އެވެ. އެއަށް ފަހު އިތުރަށް ތަހުގީގު ކުރަން ފުލުހުންނަށް ހުށަހަޅާފައިވާ ކަމަށް އާޒިމް ވިދާޅުވި އެވެ.
"އަދަދު" އަށް ޔަގީންވެފައިވާ ގޮތުގައި އޭޑީކޭ ހޮސްޕިޓަލުގެ ތެރެއިން އެ ފިސްތޯލަ ފެނުނީ އެތަނުގެ މުވައްޒަފަކަށެވެ.
ނަޝީދަށް މި މަހުގެ ހަ ވަނަ ދުވަހުގެ ރޭ ހަމަލާދިނީ ދިރިއުޅުއްވާ ކެނެރީގެއިން ބޮޑީގާޑުންނާ އެކު ހިންގަވާފައި މަޖީދީމަގުގައި އޮތް ކާރުކޮޅަށް އަރާ ވަޑައިގަންނަވަން އުޅުއްވަނިކޮށެވެ. ރޭޒާ ފުއްތަކެއް އަޅާފައިވާ އައިއީޑީއެއް ގޮއްވާލުމުން ނަޝީދުގެ ހަށިކޮޅަށް ފުން ޒަހަމްތަކެއް ލިބިވަޑައިގަތެވެ. ފުރާނަ ސަލާމަތްކުރެއްވުމަށް އޭޑީކޭގައި ގިނަ ސާޖަރީތަކެއް ކުރެއްވުމަށް ފަހު އިތުރު ފަރުވާ އަށް މިހާރު ހުންނެވީ ޖަރުމަނުގަ އެވެ.
އެމަނިކުފާނު އޭޑީކޭގައި ފަރުވާ ހޯއްދެވި އިރު ހޮސްޕިޓަލާއި މުޅި އެ ސަރަހައްދު އަދި މާލޭގެ ސެކިއުރިޓީ ލެވެލް އޮތީ އެންމެ މަތިކޮށްފަ އެވެ. އެއީ، އެންމެ ހައި ރިސްކު ބޭފުޅާގެ ސަލާމަތީ ކަންކަން ވަރުގަދައަށް ބަލަހައްޓަނިކޮށް ޓެރަރިސްޓް ހަމަލާއެއް އަމާޒުވުމުންނެވެ.
އޭޑީކޭ ހޮސްޕިޓަލުގެ ފާހާނާއެއްގެ ތެރެއިން ފިސްތޯލައެއް މި ފެނުނީ، ބޮމުގެ ހަމަލާއަކުން ނަޝީދު ޒަހަމްކޮށްލުމާ ގުޅިގެން ސަލާމަތީބާރުތަކަށް ވަރަށް ބޮޑު ފާޑުކިއުންތަކެއް އަމާޒުވެފައި ވަނިކޮށެވެ. އެމަނިކުފާނަށް ހަމަލައެއް ދޭން އުޅޭކަމުގެ މައުލޫމާތު ލިބިވަޑައިގަތް ކަން ޑިފެންސް މިނިސްޓަރު މާރިޔާ ދީދީ އަށް އެންގެވި ކަމަށް މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބް ވިދާޅުވެފައިވެ އެވެ.
އެކަމަކު މިނިސްޓަރު މާރިޔާ މި ތުހުމަތަށް މާގިނަ ވާހަކަ ދައްކަވައިފައެއް ނުވެ އެވެ.
ފައިސާ ހުށަހަޅައި ނަޝީދު އަވަހާރަކޮށްލަން އުޅުނު ކަމަށް އިލްޔާސަށް ލިބިވަޑައިގަތް މައުލޫމާތާ ގުޅިގެން ތަހުގީގަށް ފުލުހުން ވަނީ އޭނާގެ ބަޔާނެއް ނަގައިފަ އެވެ.
ފުލުހުންނާއި ސިފައިން ބުނެފައި ވަނީ ހަމަލާގެ އިންޓެލިޖެންސް ލިބިފައި ނުވާ ކަމަށެވެ. އިންޓެލިޖެންސް މައްސަލައިގައި މިހާރު ހާއްސަ އޮޑިޓެއް ހިންގުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަނީ އަންގަވައިފަ އެވެ.
