ކުރީގެ ރައީސް މުހައްމަދު ނަޝީދު އަވަހާރަކޮށްލަން ދިން ބޮމުގެ ހަލާގައި ޒަހަމްވެވަޑައިގެން އޭޑީކޭ ހޮސްޕިޓަލުގައި ފަރުވާ ހޯއްދަވަނިކޮށް އެތަނުގެ ތެރެއިން ބަޑިއެއް ފެނުނު މައްސަލައެއް ފެންމަތިވެއްޖެ އެވެ.
"އަދަދު" އަށް ޔަގީންވެފައިވާ ގޮތުގައި އޭޑީކޭ ހޮސްޕިޓަލުގެ ތެރެއިން ބަޑިއެއް ފެނުނީ ހޮސްޕިޓަލުގެ މުވައްޒަފަކަށް އެތަނުގެ ފާހަނައެއް ތެރެއިންނެވެ. އަދި ފެނުނީ ފިސްތޯލެއްކަން ވެސް އެނގިފައިވެ އެވެ.
ނަޝީދަށް ދިން ހަމަލާއާ ގުޅޭ ގޮތުން ފުލުހުން މިއަދު ބޭއްވި ނޫސްވެރިންގެ ބައްދަލުވުމެއްގައި އޭޑީކޭއިން ފެނުނު ބަޑިއާ ގުޅޭ ގޮތުން ސުވާލު ކުރުމުން ޗީޕް ސުޕްރިންޓެންޑެންޓް އޮފް ޕޮލިސް މުހައްމަދު ބަޝީރު އެ ވާހަކަ ދޮގެއް ނުކުރައްވަ އެވެ. އަދި ވިދާޅުވީ އެ މައްސަލައާ ގުޅޭ މައުލޫމާތު ބައްދަލުވުމަށް ނުގެންނެވޭ ކަމަށެވެ.
މި ނޫހުން އޭޑީކޭއަށް ގުޅުމުން މެނޭޖިން ޑައިރެކްޓަރު އަހުމަދު އައްފާލް ވިދާޅުވީ އެކަމާ ގުޅޭ ގޮތުން އެމްއެންޑީއެފް އަށް ގުޅުމަށެވެ. އެމްއެންޑީއެފް އަށް ގުޅުމުން އެ މައްސަލައިގައި މިހާތަނަށް އެއްވެސް މައުލޫމާތެއް ދީފައެއް ނުވެ އެވެ.
ރައީސް ނަޝީދަށް ބޮމުގެ ހަމަލާއެއްދީ އެމަނިކުފާނު ވަރަށް ބޮޑަށް ޒަހަމްކޮށްލުމާ ގުޅިގެން ސަލާމަތީބާރުތަކަށް ވަރަށް ބޮޑު ފާޑުކިޔުންތަކެއް ދަނީ އަމާޒުވަމުންނެވެ.
އެގޮތުން ނަޝީދަށް ހަމަލާ ދިނުމުގެ ކުރިން އެ މައުލޫމާތު ރައްޔިތުންގެ މަޖިލީހުގެ މެމްބަރެއްގެ ފަރާތުން ލިބިވަޑައިގެންނެވި ކަމަށް ޑިފެންސް މިނިސްޓަރު މާރިޔާ އަހުމަދު ދީދީއާ ވިދާޅުވުމުން، މައުލޫމާތު އެނގިހުރެމެ ހަމަލާ ނުހުއްޓުވުމުން އެކަމަށް ވަރަށް ގިނަ ބަޔަކު ފާޑުކިޔެވެ.
މި ހަމަލާގެ އިންޓެލިޖެންސް މައުލޫމާތު ފުލުހުންނަށް ވެސް ކުރިން ލިބިފައިނުވާ ކަމަށް ޕޮލިސް ކޮމިޝަނަރު މުހައްމަދު ހަމީދު ވިދާޅުވެފައިވެ އެވެ. އިންޓެލިޖެންސް މައްސަލައިގައި މިހާރު ހާއްސަ އޮޑިޓެއް ހިންގުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަނީ އަންގަވައިފަ އެވެ.
