ރައްޔިތުންގެ މަޖިލީހަށް ނުރައްކަލެއް އޮތް ކަމަށް ރޭ ލިބުނު މައުލޫމާތަކާ ގުޅިގެން އެމްއެންޑީއެފްއިން އެ ތަނުގެ ސަލާމަތީ ކަންކަން ވަރަށް ވަރުގަދަކޮށްފި އެވެ.
އިއްޔެ ރައްޔިތުންގެ މަޖިލީހުގެ އާ ދައުރު ފެށި ޖަލްސާ ކުރިއަށް ދިޔައިރު ގިނަ އަދަދެއްގެ ސިފައިންނާއި ފުލުހުންނާ މަގު ބަންދުކޮށްގެން ހަރަކާތްތެރިވި އެވެ. މިއަދު ވެސް އެގޮތަށް ސިފައިންނާއި ފުލުހުން ހަރަކާތްތެރިވަމުންދެ އެވެ.
އެމްއެންޑީއެފްގެ މީޑިއާ އޮފިޝަލް މޭޖަރ އިބްރާހިމް އާޒިމް ވިދާޅުވި ގޮތުގައި މަޖިލީހަށް ތްރެޓެއް އޮތް ކަމަށް ރޭ ވަނީ މައުލޫމާތެއް ލިބިފަ އެވެ. އެހެންވެ، މަޖިލިސް އިމާރާތާއި ވަށައިގެންވާ ސަރަހައްދުގެ ސެކިއުރިޓީ މަތިކޮށްފައިވާ ކަމަށެވެ.
"މި ވަގުތު ހާލަތަށް ބަލާ ސެކިއުރިޓީގެ ކަންކަން ދަނީ ދަމަހައްޓަމުން،" މޭޖާ އިބްރާހިމް އާޒިމް ވިދާޅުވި އެވެ.
ރައްޔިތުންގެ މަޖިލީހަށް ނުރައްކަލެއް އޮތް ކަމަށް ރޭ މައުލޫމާތެއް ލިބިފައިމިވަނީ، މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކުރި ހަމަލާއާ ގުޅިގެން ހަރުކަށި ފިކުރުގެ މީހުންނާ ދެކޮޅަށް ބޮޑެތި ބަހުސްތައް ކުރެވެމުންދާ ދަނޑިވަޅެއްގަ އެވެ. އަދި، ރައީސް ނަޝީދުގެ ސެކިއުރިޓީ ބްރީޗުވި ގޮތް ބެލުމަށް މަޖިލީހުން ތަހުގީގެއް ފެށުމަށް ތައްޔާރުވަމުންދާ ވަގުތެއްގަ އެވެ.
މަޖިލީހުގެ ސެކިއުރިޓީ ވަރުގަދަކޮށްފައިވާއިރު، އެ މަޖިލިސް ގޮއްވާލަން ޖެހޭ ކަމަށް ފޭސްބުކްގައި މީހަކު ކޮމެންޓްކުރި މައްސަލައެއް ފުލުހުން ތަހުގީގު ކުރަން ވަނީ ފަށާފަ އެވެ.
މަޖިލީހުގެ އިއްޔެގެ ޖަލްސާ ކުރިއަށްދަނިކޮށް ރާއްޖެޓީވީގެ ފޭސްބުކް ލައިވަށް ފިރިހަނަކު ކޮމެންޓް ކޮށްފައިވަނީ "ތި މަޖިލިސް ގޮއްވާލަންވީ،" ކަމަށް ބުނެ އެވެ.
އެކަން އެންމެ ފުރަތަމަ ސަމާލު ކަމަށް ގެންނެވީ އުނގޫފާރު ދާއިރާގެ މެންބަރު މުހައްމަދު ވަހީދެވެ. އޭނާ ވަނީ ޓްވިޓާގައި އެކަން ހިއްސާ ކުރައްވައި މައްސަލަ ބަލައިދިނުމަށް އެދިވަޑައިގެންފަ އެވެ.
އޭގެފަހުން މިއަދު ރައްޔިތުންގެ މަޖިލީހުން ވެސް ވަނީ މައްސަލަ ފުލުހަށް ހުށަހަޅާފަ އެވެ. މަޖިލީހުގެ ނައިބު ރައީސް އީވާ އަބްދުﷲ ވިދާޅުވީ، އެ ކޮމެންޓްގެ މައްސަލަ މަޖިލީހުން ރަސްމީކޮށް ފުލުހަށް ހުށަހަޅާފައިވާނެ ކަމަށެވެ.
އެކަމާ ގުޅިގެން "އަދަދު"ން ފުލުހުންނާ ސުވާލު ކުރުމުން ބުނީ އެ ކޮމެންޓްގެ މައްސަލަ ފުލުހުންގެ ސަމާލު ކަމަށް އައިސްފައިވާ ކަމަށާއި މައްސަލައާ ގުޅޭ ގޮތުން ބަލަންޖެހޭ ކަންކަން ބަލަމުން ގެންދާ ކަމަށެވެ.
ފުލުހުންގެ މީޑިއާ އޮފިޝަލް ވިދާޅުވީ ޓެރަރިޒަމަށް ހިތްވަރު ލިބޭ ގޮތަށް ތަންތަނަށާއި މީހުންނަށް ގެއްލުން ދޭނެ ކަމަށް ސޯޝަލް މީޑިއާ އާއި އަދިވެސް އެހެނިހެން ގޮތް ގޮތުން ދޭ އިންޒާރުތަކަކީ ސީރިއަސް މައްސަލަތަކެއްގެ ގޮތުގައި ބަލައި ފިޔަވަޅު އަޅަމުން ގެންދާނެ މައްސަލަތަކެއް ކަމަށެވެ.
