ލަންޑަން (މެއި 15) - އިނގިރޭސި އެފްއޭ ކަޕް ފައިނަލުގައި މިރޭ ޗެލްސީ ބަލިކޮށް ލެސްޓާ ސިޓީން ބޭއްވި އުފާފާޅުކުރުމުގެ ތެރޭގައި އެ ޓީމުގައި ހިމެނޭ މުސްލިމް ދެ ކުޅުންތެރިން ކަމަށްވާ ހަމްޒާ ޗޯދުރީ އާއި ވެސްލީ ފޮފާނާ ފަލަސްތީނުގެ ދިދައެއް ދައްކާލައިފި އެވެ.
ޗެލްސީ އަތުން 1-0 އިން ލެސްޓާ މޮޅުވިއިރު، މިއީ އެ ކްލަބްގެ ތާރީހުގައި އެފްއޭ ކަޕްގެ ޗެމްޕިއަންކަން ހޯދި ފުރަތަމަ ފަހަރެވެ. މެޗު ނިންމާލުމާ އެކު ލެސްޓާ ކުޅުންތެރިންގެ އުފާފާޅުކުރުންތައް ފެށިގެންދިޔަ އެވެ. އޭގެތެރެއިން ގިނަ ބައެއްގެ ސަމާލުކަން ހުއްޓުނީ ބަންގްލަދޭޝްގެ ދަރިކޮޅަށް ނިސްބަތްވާ ހަމްޒާ އާއި ފްރާންސްގެ ފޮފާނާ ފަލަސްތީނުގެ ދިދައެއް ވިހުރުވާލި ދިމާލަށެވެ.
އުމުރުން 20 އަހަރުގެ ފޮފާނާ އުފަންވީ ފްރާންސްގެ މުސްލިމް އާއިލާ އަކަށެވެ. ބަންގްލަދޭޝްގެ ދަރިކޮޅަށް ނިސްބަތްވި ނަމަވެސް ހަމްޒާ ކުޅެނީ އިންގްލެންޑް ގައުމީ ޓީމަށެވެ.
އިޒްރޭލުން ފަލަސްތީނާ ދެމުންދާ ހަމަލާތަކުގެ ސަބަބުން ފަލަސްތީނުގެ ހައްގުގައި މަޝްހޫރު އެކި ފުޓްބޯޅަ ކުޅުންތެރިން ވެސް އަންނަނީ އަޑުއުފުލަމުންނެވެ. އެ ކުޅުންތެރިންގެ ތެރޭގައި މެންޗެސްޓާ ސިޓީގެ ރިޔާދު މާރޭޒް އާއި މެންޗެސްޓާ ޔުނައިޓެޑްގެ ޕައުލް ޕޮގްބާ އަދި ލިވަޕޫލްގެ ސަޑިއޯ މާނޭ އާއި މުހައްމަދު ސަލާހު ހިމެނެ އެވެ.
މިރޭ އެފްއޭ ކަޕްގެ ފައިނަލަށް ފަހު ހަމްޒާ އާއި ފޮފާނާގެ ފަރާތުން މި ފެނުނު ކަންތައްތަކަށް ގިނަ ބަޔަކު އަންނަނީ ސޯޝަލް މީޑިއާގައި ތައުރީފުކުރަމުންނެވެ.
މީގެ 100 އަހަރު ކުރިން ފަލަސްތީން ދަރިކޮޅަށް ނިސްބަތްވާ ރެފިއުޖީ ބަޔަކު ޗިލީ އަށް ހިޖުރަކޮށް އެ ގައުމުގެ އުޒޯނޯ ސިޓީގައި އުފެއްދި ކްލަބް ޑިޕޯޓިވޯ ޕަލަސްޓީނޯ އަކީ އެންމެ ފުޅާކޮށް ފަލަސްތީނުގެ ހައްގުގައި މަސައްކަތްކުރާ ފުޓްބޯޅަ ކްލަބް އެވެ. ދާދި ފަހުން ވެސް ޗިލީ ލީީގުގެ މެޗެއްގެ ތެރެއިން އެ ޓީމުން ވަނީ ފަލަސްތީނުގެ ހައްގުގައި ޝުއޫރުފާޅުކޮށްފަ އެވެ.
ޗެލްސީގެ ވެރިޔާ ރަޝިއާގެ މަހުޖަނު ރޯމަން އަބްރަމޮވިޗަކީ އިޒްރޭލުގެ ރަށްވެއްސެކެވެ. އަބްރަމޮވިޗްގެ އިނގިރޭސި ވިލާތުގެ އިންވެސްޓް ވިސާ 2018 ވަނަ އަހަރު ހަމަވުމުން ވިސާ އާ ނުކޮށްދޭން އިނގިރޭސި ސަރުކާރުން ނިންމުމުން އިންގްލެންޑަށް ދެވޭނެ ގޮތެއް ނެތި އަބްރަމޮވިޗް އެންމެ ފަހުން ދިރިއުޅުން ބަދަލުކުރީ އިޒްރޭލަށެވެ.
އަބްރަމޮވިޗަށް އިންވެސްޓްމަންޓް ވިސާ ނުދޭން އިނގިރޭސި ސަރުކާރުން ނިންމީ އިނގިރޭސި ވިލާތާއި ރަޝިޔާއާ ދެމެދު ބޮޑު ޑިޕްލޮމެޓިކް މައްސަލައެއް އުފެދިފައިވާތީ އެވެ. އެއީ ރަޝިޔާގެ ކުރީގެ ޖާސޫސަށް އިނގިރޭސި ވިލާތުގައި ވިހަ ދިން މައްސަލައިގަ އެވެ.
