ލަންޑަން (މާޗް 8) - އިނގިރޭސި އެފްއޭ ކަޕްގެ ގަދަ 16 ބުރުގައި ރޭ ކުޅުނު މެޗުތަކުން މޮޅުވެ، މެންޗެސްޓާ ސިޓީ، ޗެލްސީ އަދި އާސެނަލުން މުބާރާތުގެ ކުއާޓާ ފައިނަލުން ޖާގަ ހޯދައިފި އެވެ.
ސިޓީން ވަނީ ނިއުކާސަލް ޔުނައިޓެޑް އަތުން 3-1 އިން މޮޅުވެފަ އެވެ. ދެ ވަނަ ޑިވިޝަނުގެ ވްރެކްސަމް އަތުން ޗެލްސީން މޮޅުވީ އިތުރު ވަގުތުގެ ދެ ހާފު ކުޅެގެން 4-2 އިންނެވެ. އަދި، ތިން ވަނަ ޑިވިޝަނުގެ މެންސްފީލްޑް ޓައުން އަތުން އާސެނަލް ވަނީ 2-1 އިން ކުރިހޯދައިފަ އެވެ.
ނިއުކާސަލް ދަނޑުގައި އެ ޓީމުން ލީޑުނެގީ 18 ވަނަ މިނިޓްގައި ސަންޑްރޯ ޓޮނާލީ ދިން ބޯޅައަކުން ހާވީ ބާންސް ޖެހި ގޯލުންނެވެ. ސިޓީން ފުރަތަމަ ހާފު ނިމުމުގެ ކުރިން މެޗުގެ 39 ވަނަ މިނިޓްގައި ވަނީ އެއްވަރުކޮށްފަ އެވެ. މި ލަނޑު އެ ޓީމަށް ޖަހައިދިނީ ޖެރެމީ ޑޮކޫ ދިން ބޯޅައަކުން ސަވީނިއޯ އެވެ.
މެޗުން ސިޓީ މޮޅުވި ދެ ލަނޑު ވެސް ދެ ވަނަ ހާފުގައި ޖެހި މިސްރުގެ ފޯވާޑް އޮމަރު މާމޫޝް އެވެ.
ވްރެކްސަމް އިން ރޭ ޗެލްސީ ކައިރިން ލީޑުނެގީ ސޭމް ސްމިތު ޖެހި ގޯލުންނެވެ. އެކަމަކު، ވްރެކްސަމްގެ ގޯލްކީޕަރު އާތޫރު އޮކޮންކްވޯ އަތުން ބައިކޮޅަށް ވަން ގޯލަކުން ޗެލްސީން އެއްވަރުކުރި އެވެ. ވްރެކްސަމް އިން ދެ ވަނަ ފަހަރަށް ލީޑުނެގީ ކަލުމް ޑޮއިލް ޖެހި ލަނޑުންނެވެ. ޗެލްސީގެ ޖޯޝް އަޗެމްޕޮން ލަނޑު ޖަހައި، އެއްވަރުކުރުމުން މެޗު އިތުރު ވަގުތުގެ ދެ ހާފު ކުޅެން ޖެހުނެވެ.
އިތުރު ވަގުތުގެ ދެ ހާފަށް ދިޔައިރު، ވްރެކްސަމްގެ ޖޯޖް ޑޮބްސަން އަށް ވަނީ ރަތެއް ދައްކައިފަ އެވެ. ވްރެކްސަމްގެ ކުޅުންތެރިއަކު މަދުވުމުގެ ފައިދާނަގައި، އިތުރު ވަގުތުގެ ދެ ހާފުގެ ތެރޭގައި، ޗެލްސީގެ ދެ ލަނޑު ޖެހީ އަލެހަންދްރޯ ގާނާޗޯ އާއި ޖޮއާއޯ ޕެޑްރޯ އެވެ.
ސޯޅަ އަހަރުގެ ދެ ކުޅުންތެރިން ފުރަތަމަ އެގާރައިގައި ހިމަނައިގެން ކުޅުނު އާސެނަލަށް ފުރަތަމަ ހާފުގައި ލީޑުނަގައިދިނީ ނޯނީ މަޑުއޭކޭ އެވެ. ދެ ވަަނަ ހާފުގައި ބަދަލަކަށް ކުޅެން އެރި، ވިލް އެވާންސް ވަނީ ލަނޑު ޖަހައި، މޭންސްފީލްޑް އަށް އެއްވަރުކޮށްދީފަ އެވެ. އާސެނަލް މޮޅުކޮށްދިން ލަނޑު ޖެހީ ބަދަލަކަށް ކުޅެން އަރައި، އެބެރެޗީ އެޒޭ އެވެ.
