ބޯ ވިއްސާރަ އާއި ވައިގަދަވެ، ހޯރަފުށީ އެއާޕޯޓަށް ލިބުނު ބޮޑު ގެއްލުމުގެ ސަބަބުން އެއާޕޯޓުގެ އޮޕަރޭޝަންތައް އަލުން ފަށަން ދެތިން ދުވަސް ނަގާނެ ކަމަށް ރީޖަނަލް އެއާޕޯޓްސް ކޮމްޕެނީގެ މެނޭޖިން ޑިރެކްޓަރު މުހައްމަދު ރިޒްވީ މިއަދު ވިދާޅުވެއްޖެ އެވެ.
އުތުރުގެ އަތޮޅުތަކަށް މި ދުވަސްވަރު މޫސުން ގޯސްވެގެން އުޅެނީ އަރަބި ކަނޑުގައި އުފެދިގެން އުޅޭ ތޫފާނު "ޓައުޓޭ"ގެ ސަބަބުންނެވެ. މި ތޫފާނޫ މިހާރު ރާއްޖެއާ ދުރަށް މިސްރާބު ޖަހާފައިވާއިރު، މާދަމާއިން ފެށިގެން މޫސުން ރަނގަޅުވާނެ ކަމަށް މެޓް އޮފީހުން ލަފާކުރެ އެވެ.
ތޫފާނުގެ ސަަބަބުން އުތުރުގެ ރަށްތަކަށް ބޯކޮށް ވާރޭވެހި، ވައިގަދަވުމުގެ އިތުރުން ގިނަ ރަށްތަކަށް އުދަ އެރި އެވެ. އޭގެ ތެރެއިން އެންމެ ބޮޑަށް އުދަ އެރި ރަށްތަކުގެ ތެރޭގައި ހޯރަފުށި ހިމެނެ އެވެ. ހޯރަފުށި އެއާޕޯޓަކީ އެ ރަށު ފަޅުތެރެއިން ބައެއް ހިއްކައިގެން ތަރައްގީކޮށްފައިވާ އެއާޕޯޓެކެވެ.
ސޯޝަލް މީޑިއާގައި އާއްމުވެފައި ހުރި ވީޑިއޯތަކާއި ފޮޓޯތަކުން ފެންނަނީ މުޅި އެއާޕޯޓުގެ ރަންވޭ ފެނުއަޑީގައި އޮތް މަންޒަރެވެ. އަދި އެއާޕޯޓުގެ ވެއިޓިން އޭރިއާ އަދި އެހެން ބައެއް ސްޓްރަކްޗާތަކަށް ގެއްލުން ލިބި، ބިއްލޫރިގަނޑު ވަނީ ވެއްޓިފަ އެވެ.
ގެއްލުމުގެ އަގު އިނގޭނީ އެސެސްމަންޓަށް ފަހު، ހިދުމަތް ފަށަން ދެތިން ދުވަހެއް ނަގާނެ
ހޯރަފުށި އެއާޕޯޓަށް ލިބުނު ގެއްލުމާ ގުޅިގެން ރީޖަނަލް އެއާޕޯޓްސްގެ ރިޒްވީ "އަދަދު" އަށް ވިދާޅުވީ ވިއްސާރައިގެ ސަބަބުން ބޮޑު ގެއްލުމެއް ލިބުނު ކަމަށެވެ. ނަމަވެސް ސީދާ ގެއްލުންވީ އަދަދެއް ބުނަން އަދި މާ އަވަސް ކަމަށް އޭނާ ވިދާޅުވި އެވެ.
"ވަރަށް ބޮޑު ގެއްލުމެއް އެއާޕޯޓަށް ލިބުނު. އެކަމަކު ލިބުނު ގެއްލުމުގެ އަގު އިނގޭނީ ޓެކްނިކަލް ޓީމެއް ގޮސް އެސެސްމަންޓް ހެދުމުން" ރިޒްވީ ވިދާޅުވި އެވެ.
އޭނާ ވިދާޅުވި ގޮތުގައި އެންމެ ބޮޑު ގެއްލުމެއް ލިބުނީ އެއާޕޯޓުގެ ވަށައިގެން އޮންނަ ޝޯލައިންއަށެވެ. އަދި ބައެއް އިމާރާތްތަކަށް ވެސް ގެއްލުންތައް ލިބިފައިވާ ކަމަށް ވިދާޅުވި އެވެ.
ރީޖަނަލް އެއާޕޯޓްސް ކުންފުނިން އަންނަނީ ވީހާވެސް އަވަހަކަށް އެއާޕޯޓަށް ލިބުނު ގެއްލުން ބަލަން ޓީމެއް ފޮނުވުމުގެ މަސައްކަތް ކުރަމުންނެވެ. އަދި މޫސުން ތަންދިންހާ އަވަހަކަށް އެ ޓީމު ހޯރަފުއްޓަށް ދާނެ އެވެ.
މޫސުން ގޯސްވުމުގެ ސަބަބުން ހޯރަފުށީ އެއާޕޯޓުން ހިދުމަތް ދިނުން އިއްޔެ އިން ފެށިގެން ވަނީ ހުއްޓާލައިފަ އެވެ. އަދި އަލުން ދަތުރުތައް ފެށޭނެ ތާރީހެއް އިނގޭނީ ޓެކްނިކަލް ޓީމުން ހަދާ އެސެސެމަންޓަށް ފަހު ކަމަށް ރިޒްވީ ވިދާޅުވި އެވެ.
"ދެތިން ދުވަހެއް ވަރު ނަގާނެ ކަމަށް ބެލެވެނީ" ރިޒްވީ ވިދާޅުވި އެވެ.
ހޯރަފުށި އެއާޕޯޓަކީ މިހާތަނަށް ރާއްޖޭގައި އެންމެ ކުރު މުއްދަތެއްގެ ތެރޭގައި ތަރައްގީކުރި އެއާޕޯޓެވެ. ނަމަވެސް އެއާޕޯޓް ތަރައްގީކުރަން ފެށުމާ އެކު ތިމާވެށި ހިމާޔަތްކުރަން ގޮވާލާ ޖަމިއްޔާތަކާއި މީހުންގެ ނުރުހުން އަމާޒު ވި އެވެ.
އެއާޕޯޓަށް ވިއްސާރައިގެ ސަބަބުން ލިބުނު ގެއްލުމާ ގުޅިގެން އެ ފަރާތްތަކުން އަންނަނީ އަނެއްކާވެސް އެ ކަންބޮޑުވުންތައް ފާޅުކުރަން ފަށައިފަ އެވެ.
