މޯލްޑިވްސް މާކެޓިން އަދި ޕީަބްލިކް ރިލޭޝަން ކޯޕަރޭޝަންސް (އެމްއެމްޕީއާރްސީ) އިން ވަގަށް ނެގި 1.3 ބިލިއަން ރުފިޔާގެ ތެރެއިން ބައެއް ފައިސާ ލިބިވަޑައިގަތް ކަމަށް ބުނާ ލިސްޓުގައި ކުރީގެ ނައިބު ރައީސް އަބްދުﷲ ޖިހާދާއި ބަންޑާރަ ނައިބު މުހައްމަދު އަނިލް އާއި ޕްރޮސެކިއުޓާ ޖެނެރަލް މުހްތާޒް މުހްސިންގެ ނަން އޮތް ކަން ހާމަވެއްޖެ އެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އުފައްދަވާފައިވާ އެސެޓް ރިކަރަވަރީ ކޮމިޝަނުން ރައްޔިތުންގެ މަޖިލީހަށް ދިން ރިޕޯޓު މިއަދު މަޖިލީހުގެ ކޮމެޓީއަކުން އާންމުކުރިއިރު ދައުލަތުން ވަގަށް ނެގި ފައިސާ ލިބުނު ކަމަށް ބުނާ 280 މީހެއްގެ ނަން އޭގައި ހިމެނެ އެވެ.
އެ ލިސްޓުގައި އޮތް ގޮތުން ނަމަ ކުރީގެ ނައިބު ރައީސް އަދި ފިނޭންސް މިނިސްޓަރު އަބްދުﷲ ޖިހާދުގެ މައްސަލައިގެ ތަހުގީގު މައުލޫމާތު އެއްކުރުމުގެ މަރުހަލާގައި އުޅޭއިރު ތުހުމަތު ކުރަނީ 200،000 ރުފިޔާ ލިބިވަޑައިގަތް ކަމަށެވެ. ބަންޑާރަ ނައިބު މުހައްމަދު އަނިލްގެ ނަން ލިސްޓުގައި އޮތްއިރު، ތުހުމަތު ކުރަނީ 608،400 ރުފިޔާ ލިބިވަޑައިގަތް ކަމަށެވެ. މުހްތާޒަށް ތުހުމަތުކުރާ ފައިސާގެ އަދަދެއް ނެތެވެ.
ހިޔާނާތުގެ ފައިސާ ލިބުނު މީހުންގެ ތެރެއިން 42 ޕަސެންޓު ނުވަތަ 119 މީހުންނަކީ ދައުލަތުގެ އެކިއެކި މަގާމުތަކުގައި ކުރިން ތިއްބެވި ނުވަތަ މިހާރު ވެސް ތިއްބެވި ބޭފުޅުންނެވެ.
އޭގެ ތެރޭގައި ދައުލަތުގެ ތިން ބާރުގެ ގޮތުގައި ހުންނެވި ރައީސުލްޖުމްހޫރިއްޔާ، ނައިބު ރައީސް، ރައްޔިތުންގެ މަޖިލީހުގެ ރައީސް އާއި އެ މަޖިލީހުގެ މެންބަރުންނާއި ކެބިނެޓުގެ ވަޒީރުންނާއި ކޯޓުތަކުގެ ފަނޑިޔާރުންނާއި މިނިވަން މުއައްސަސާތަކުގެ ވެރިންނާއި ދައުލަތުގެ ކުންފުނިތަކުގެ ވެރިންނާއި ފުލުހުންނާއި ސިފައިން ހިމެނެ އެވެ.
މައްސަލަ ދިރާސާ ކޮމިޓީގެ ސަބް ކޮމިޓީން ރޭ މަޝްވަރާކުރުމަށްފަހު އަށް ހުށަހެޅުމަކާއެކު އެކުވާލި ރިޕޯޓު ވަނީ އިއްތިފާގުން ފާސްކޮށްފަ އެވެ. އޭގެ ތެރޭގައި ލިސްޓް އާންމުކުރުން ހިމަނާފައިވާއިރު، އެކަން ހާމަކޮށްފައިވަނީ މިއަދު ކުރިއަށްދިޔަ ސަލާމަތީ ހިދުމަތްތަކާބެހޭ ކޮމިޓީ އާއީ ޖުޑީޝިއަރީ ކޮމިޓީގެ ޖޮއިންޓް ކޮމިޓީގެ މުގައްރިރު އިމްތިޔާޒު ފަހުމީ އެވެ.
