ރައީސް މުހައްމަދު ނަޝީދު އަވަހާރަކޮށްލަން ދިން ހަމަލާއާ ގުޅިގެން ފުލުހުން ހިންގާ ތަހުގީގަށް މިހާތަނަށް ހޯދިފައިވާ ކުރިއެރުންތައް ރަނގަޅު ކަމަށް، ހޯމް މިނިސްޓަރު އިމްރާން އަބްދުﷲ މިއަދު ވިދާޅުވެއްޖެ އެވެ.
ނަޝީދަށް ހަމަލާދިން ކަމުގެ ތުހުމަތުގައި އިއްޔެ ދެ މީހުން ހައްޔަރު ކޮށްފައިވާއިރު މިއަދު ވަނީ އައިއީޑީ ގޮއްވާލިކަމަށް ތުހުމަތުކުރެވޭ މީހާ ވެސް ހައްޔަރު ކޮށްފަ އެވެ.
ފުލުހުންނަށް ތައުރީފުކޮށް މިނިސްޓަރު މިއަދު ކުރެއްވި ޓްވީޓެއްގައި ވިދާޅުވީ ޓެރަރިސްޓް ހަމަލާގެ ތަހުގީގު ކުރިއަށްދާ ގޮތާއި އެ ތަހުގީގުގައި މިހާތަނަށް ހޯދާފައިވާ ކުރިއެރުންތައް ރަނގަޅު ކަމަށެވެ.
"މިހާތަނަށް ލިބުނު ކުރިއެރުމުގައި ގިނަ ފުލުހުންގެ ހުނަރުވެރި މަސައްކަތުގެ އިތުރަށް ރައްޔިތުން ފޯރުކޮށްދިން މައުލޫމާތު ބޮޑު ދައުރެއް އަދާ ކުރޭ،" މިނިސްޓަރު ވިދާޅުވި އެވެ.
ނަޝީދަށް ދިން ހަމަލާގެ އެންމެ އިސް މީހާކަމަށް ތުހުމަތުކޮށް މިއަދު ހައްޔަރުކޮށްފައި ވަނީ ވ. ތިނަދޫ، އަހްމަދު އަދުހަމް އެވެ. އިއްޔެ ހައްޔަރު ކުރީ މއ. ފޭރުގެ މުޖާޒް އަހްމަދު 21، އާއި ގއ. ކޮނޑޭ، ފޮޅޭމާ، ތަހުމީން އަހްމަދު، 32 އެވެ.
މުޖާޒް ހައްޔަރުކުރީ އަލިކިލެގެފާނު މަގުގައި ހުރި ފެހިދޯދިގޭގެ ކުއްޔަށް ދީފައިވާ ބަޔަކުންނެވެ. އެ ސަރަހައްދުން ސައިކަލެއް ވެސް ވަނީ ފުލުހުންގެ ބެލުމުގެ ދަށަށް ގެންގޮސްފަ އެވެ.
ތަހުމީން ހައްޔަރުކުރީ ހުޅުމާލެ ރަބަރުގަސްމަގު ހަތަރު ނަމްބަރު ގޯޅީގައި ހުރި ތަނަކުންނެވެ.
އިއްޔެ ބޭއްވި ޕްރެސް ކޮންފަރެންސްގައި ޕްރޮސިކިއުޓާ ޖެނެރަލް ހުސައިން ޝަމީމް ވިދާޅުވީ އެ ދެ މީހުންނަކީ ހަރުކަށި ފިކުރާ ގުޅުން އޮތް ދެ މީހުން ކަމަށް މިހާތަނަށް ލިބިފައިވާ މައުލޫމާތުތަކުން ފެންނަ ކަމަށެވެ.
ހަމަލާގައި ރައީސް ނަޝީދުގެ ހަށިކޮޅަށް ބޮޑެތި ޒަހަމްތަކެއް ލިބިފައިވެ އެވެ. އަދި ފުރާނަ ސަލާމަތް ކުރަން ގިނަ ސާޖަރީތަކެއް ކުރުމަށްފަހު، މިހާރު އެ މަނިކުފާނުގެ ސިއްހީ ހާލުކޮޅު ރަނގަޅުވަމުން އަންނަ ކަމަށް އޭޑީކޭ ހޮސްޕިޓަލުން ވަނީ ބުނެފަ އެވެ.
