ކުރީގެ ރައީސް މުހައްމަދު ނަޝީދު ދިރިއުޅުއްވާ ގެކޮޅު ކައިރިން އެއްޗެއް ގޮއްވާލައި ދިން ހަމަލާ މިހާތަނަށް ލިބުނު މައުލޫމާތާއި ހޯދުންތަކަށް ބަލައި ތަހުގީގު ކުރަމުން އަންނަނީ އެމަނިކުފާނަށް އަމާޒުކުރި ޓެރަރިސްޓު ހަމަލާއެއްގެ ގޮތުގައި ކަަމަށް ފުލުހުން ދެންމެ ބުނެފި އެވެ.
ރައްޔިތުންގެ މަޖިލީހުގެ ރައީސް, ނަޝީދަށް ހަމަލާދިނީ މަޖީދީ މަގުގައި އޮތް ކާރުކޮޅަށް އަރާވަޑައިގެންނެވުމަށް ކެނެރީގެއިން ނުކުމެވަޑައިގެންނެވި ތަނުން ސައިކަލެއް ގޮއްވާލައިގެންނެވެ. އެމަނިކުފާނުގެ ހަށިކޮޅަށް ލިބިވަޑައިގަތް އަނިޔާތަކަށް އޭޑީކޭގައި އަންނަނީ ފަރުވާ ދެމުންނެވެ.
މިހާތަނަށް ގިނަ ސާޖަރީތަކެއް ކޮށްފައިވާ އިރު އަދިވެސް މުހިއްމު ސާޖަރީއެއް ކުރިއަށް އެބައޮތް ކަމަށް އެ ހޮސްޕިޓަލުން ބުންޏެވެ.
މި ހާދިސާއާ ގުޅޭ ގޮތުން ފުލުހުން ދެންމެ ނެރުނު ބަޔާނުގައި ބުނީ ތަހުގީގު ކުރަނީ ވަރަށް ސީރިއަސް މައްސަލައެއްގެ ގޮތުގައި، އިސްކަންދީގެން ކަމަށެވެ. ތަހުގީގު ދާއިރާ އިން ފޮރެންސިކްސްގެ ތެރެއިން އެ ސާވިސްގައި ހުރި ހުރިހާ ވަސީލަތެއް ބޭނުންކުރަމުން އަންނަ ކަމަށް ވެސް ފުލުހުން ބުންޏެވެ.
ނަޝީދު: އެމަނިކުފާނަށް ދިން ހަމަލާގައި އަނިޔާވެވަޑައިގެން އޭޑީކޭގައި އަންނަނީ ފަރުވާ ދެމުން. -- ފޮޓޯ/ މަޖިލިސް
މި ތަހުގީގަށް އޮސްޓްރޭލިއަން ފެޑެރަލް ޕޮލިސްގެ ދެ ބޭފުޅަކު ވަޑައިގަތުމަށް ވަނީ ހަމަޖެހިފަ އެވެ. އަދި ޔޫއެންއޯޑީސީގެ ފަރާތުން ދިވެހިރާއްޖޭގައި މިވަގުތު ތިއްބެވި އިނގިރޭސި ފަންނީ 2 ބޭފުޅެއްގެ އެހީތެރިކަން ތަހުގީގަށް ފޯރޮކޮށްދެމުން އެބަދާ ކަމަށް ފުލުހުން ބުންޏެވެ.
އެ ހާދިސާ ހިނގި ވަގުތު އެ ސަރަހައްދުން ޝައްކުވާ އެއްވެސް ފާހަގަކުރެވިފައިވާ ނަމަ މައުލޫމާތު، 9704000 އަށް ހިއްސާކޮށްދޭން ފުލުހުން އެދެ އެވެ. މިގޮތަށް ފޯރުކޮށްދޭ މައުލޫމާތުގެ ރައްކާތެރިކަން ހިފަހައްޓައިދޭނެ ކަމުގެ ޔަގީންކަން ވެސް ފުލުހުން ދިނެވެ.
ބޮމުގެ ހަމަލާއާ ގުޅިގެން މާލެތެރެ ބެލެހެއްޓުން ފުލުހުންނާއި ސިފައިން ގުޅިގެން ވަނީ ވަރުގަދަކޮށްފަ އެވެ. އެ ހަމަލާގައި ނަޝީދުގެ އިތުރުން ފަސް މީހަކަށް އަނިޔާވި އެވެ. އެކަމަކު އެއްވެސް މީހަކަށް ސީރިއަސް ގެއްލުމެއް ނުލިބެ އެވެ.
