ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދަށް އަމާޒުކޮށް ރޭ 8:30 ހާއިރު ދިން ބޮމުގެ ހަމަލާއާ ގުޅިގެން އޭޑީކޭގައި ފަރުވާދެމުން އަންނައިރު އެމަނިކުފާނު އޮޕަރޭޝަން ތިއޭޓަރުން އަދިވެސް ނުނެރޭ ކަމަށް އާއިލާ އިން މިއަދު ބުނެފި އެވެ.
އާއިލާ އިން "އަދަދު"އަށް ވާހަކަ ދެއްކެވި ބޭފުޅަކު ވިދާޅުވީ ނަޝީދު ހަށިކޮޅަށް ލިބިފައިވާ އަނިޔާގެ ފުރިހަމަ ތަފްސީލެއް އަދި އެނގިވަޑައިނުގަންނަވާ ކަމަށެވެ. ސާޖަރީތަކަށް ރޭ ތިއޭޓަރަށް ވެއްދި ގޮތަށް އަދި ނުނެރޭ ކަމަށް ވިދާޅުވި އެވެ.
ސޯޝަލްމީޑިއާގައި ނަޝީދުގެ ގާތް ބޭފުޅުން ވިދާޅުވަމުން ގެންދަވަނީ ސައިކަލުގައި ގޮއްވާލުމުން ބުރައިގެންދިޔަ އެތިކޮޅުތަކުން ލިބިވަޑައިގަތް އަނިޔާތައް ސީރިއަސް ކަމަށެވެ. އެމަނިކުފާނުގެ ފުއްމާޕެއަށް ވެސް ގެއްލުން ލިބުނު ކަމަަށް ބުނަމުން އައި ނަމަވެސް އާއިލާ އަދި ރަސްމީ އެއްވެސް އިދާރާއަކުން އަދި އެމަނިކުފާނުގެ ހާލުކޮޅާ ބެހޭ ގޮތުން ވާހަކައެއް ނުދައްކަ އެވެ.
"ތިއޭޓަރުން އަދި ނުނެރޭ. ގެއްލުންތަކުގެ ތަފްސީލް އެނގޭނީ ޑޮކްޓަރުންނަށް، އެއްޗެއް ބުނާކަށް އަދި ނޭނގެ،" އާއިލާ އިން ވާހަކަ ދެއްކެވި ބޭފުޅާ ވިދާޅުވި އެވެ.
ނަޝީދުގެ ހާލުކޮޅާ ގުޅޭ ގޮތުން އޭޑީކޭ އިން ކުރި ޓުވީޓެއްގައި ބުނީ މިހާތަނަށް ގިނަ ސާޖަރީތަކެއް ކޮށްފައިވާ ކަމަށާއި މުހިއްމު ޕްރޮސީޖާއެއް އަދިވެސް ކުރިއަށް އެބައޮތް ކަމަށެވެ. ސާޖަރީތައް ކުރަނީ ސްޕެޝަލިސްޓް ޓީމަކުންނެވެ.
ނަޝީދުގެ ހާލުކޮޅާ ގުޅޭ ގޮތުން "އަދަދު"އަށް ރޭ ވާހަކަ ދެއްކެވި މައުލޫމާތު އެނގިވަޑައިގަންނަވާ ބޭފުޅަކު ވިދާޅުވެފައި ވަނީ ބޭރުފުށުން ލިބިވަޑައިގެންނެވި ޒަހަމްތައް ގިނަ ކަމަށާއި ފަރުވާ ދެމުން އަންނަނީ ހޭނައްތައިގެންނެވެ. އެމަނިކުފާނުގެ އެއް އަތަށް ފުން ޒަހަމެއް ލިބިފައިވާ ކަމަށް ވެ އެވެ.
ސާޖަރީތަކަށް ހޭނެއްތުމުގެ ކުރިން އެމަނިކުފާނު ހަރަކާތް ކުރައްވައި ވާހަކަދެއްކެވި ކަމަށް ވެ އެވެ.
ނަޝީދަށް ހަމަލާދިނީ އެމަނިކުފާނު ދިރިއުޅުއްވާ ގ. ކެނެރީގެ އިން ނުކުމެވަޑައިގެން ކާރަށް އަރާވަޑައިގަންނަވާ ވަގުތުކޮޅާ ދިމާކޮށް ނީލޯފަރުމަގުގައި، ސައިކަލްގައި އެއްޗެއް ގޮއްވާލައިގެންނެވެ. އެ ސައިކަލް ހުރީ ކެނެރީގޭ ހުންނަ ނީލޯފަރުހިނގުން، މަޖީދީ މަގާ ވީ ކަންމަތީގަ އެވެ.
ބާރު ގަދަ އެ ގޮއްވާލުމުގައި ނަޝީދު ހިމެނިވަޑައިގަންނަވާ ގޮތުން ހަ މީހަކަށް ވަނީ އަނިޔާވެފަ އެވެ. އެއީ ތިން ސިފައިންނާއި އާއްމު މީހެއްގެ އިތުރުން ބިދޭސީއަކަށެވެ.
މި ހަމަލާ ސީރިއަސްކޮށް ތަހުގީގު ކުރަން ފަށައި، މާލެ ތެރޭގެ ސަލާމަތީ ކަންކަން ވަނީ ވަރުގަދަކޮށްފަ އެވެ.
