ކުރީގެ ރައީސް މުހައްމަދު ނަޝީދު ދިރިއުޅުއްވާ ގ. ކެނެރީގެ ހުންނަ ނީލޯފަރުހިނގުން ހަނިކަމުން އެމަނިކުފާނުގެ ކާރުކޮޅެއް ނުވެއްދެ އެވެ. އެހެންވެ އާއްމުކޮށް ކާރުކޮޅަށް އަރާވަޑައިގަންނަވަނީ ސެކިއުރިޓީންނާ އެކު އެ މަގުން ހިންގަވާފައި ވަޑައިގެން ނީލޯފަރުހިނގުމާއި މަޖީދީމަގު ގުޅޭ ކަންމަތިންނެވެ.
ކުރުނބާ މޯލްޑިވްސްގައި އޮތް ބައްދަލުވުމަކަށް ވަޑައިގަތުމަށް މިރޭ ގެއިން ނުކުމެވަޑައިގެން ކާރުކޮޅާ އަރާ ހަމަވިތަނާ ސައިކަލެއްގައި އެއްޗެއް ގޮއްވާލައިގެން އެމަނިކުފާނުގެ ހަށިކޮޅަށް ވަނީ ގެއްލުންދީފަ އެވެ. ސީރިއަސް ޒަހަމެއް ނެތް ނަމަވެސް ބޭރުފުށުން ލިބުނު ޒަހަމްތަކަށް އޭޑީކޭގައި ހޭނައްތައިގެން އަންނަނީ ސާޖަރީއެއް ކުރަމުންނެވެ. އެކުގައި ތިއްބެވި ތިން ބޮޑީގާޑުންނަށް ވެސް އަނިޔާވި އެވެ.
ފުލުހުން ބުނީ ބާރުގަދަ އެ ގޮއްވާލުމުގައި ޖުމްލަ ފަސް މީހަކަށް އަނިޔާވި ކަމަށެވެ. ސައިކަލުގެ މަޑި ވެސް ދުރަށް ވިއްސައިގެން ގޮސްފައިވާ އިރު ފިހާރަތަކުގެ ބިއްލޫރި ތެޅި، އެ ގޮވުމުގެ އަސަރުން މަގަށް ވެސް ވަނީ ގެއްލުން ލިބިފަ އެވެ.
ނީލޯފަރުހިނގުމާއި މަޖީދީ މަގު ކަންމަތީގައި ހުރި ސައިކަލެއްގައި އެއްޗެއް ގޮއްވާލައި ނަޝީދުގެ ހަށިކޮޅަށް ގެއްލުންދިނުން ސިފައިންގެ ކުރީގެ އޮފިސަރަކު ސިފަކުރެއްވި ގޮތުގައި އެ "ހަމަލާ ދިނީ ދުރާލައި ވަރަށް ބޮޑަށް ޕްލޭންކޮށްގެން" ކަމަށް ބެލެވެ އެވެ. ސިފައިންގެ ހިދުމަތުގައި ހުންނެވިއިރު ކުރެއްވުނު އެފަދަ ތަޖުރިބާތަކާއި މިރޭގެ ހާދިސާ އޭނާ އަށް ފެނުނު ގޮތް އެކްސްޕާޓް "އަދަދު" އަށް ކިޔައިދެއްވަމުން ވިދާޅުވީ ނަޝީދު ނުކުމެވަޑައިގެން ކާރުކޮޅަށް އަރާ ހިސާބުގައި ސައިކަލެއް ބަހައްޓައިގެން ގޮއްވާލީ ވަރަށް ބޮޑަށް ލޮކޭޝަން ބަލައިގެން ކަމަށެވެ.
"ބޮޑަށް ލަފާކުރެވެނީ ރިމޯޓް އޮޕަރޭޓްކޮށް ނޫނީ މޮބައިލް ފޯނެއް ކަހަލަ އެއްޗެއް ބޭނުންކޮށްގެން ދުރުގައި ހުރެގެން ސީދާ އެ ލޮކޭޝަން ހަމަލާ ދިން މީހާއަށް ފެންނަ ގޮތަށް ހުރެ ރައީސް ނަޝީދު އެ ހިސާބަށް އަރާ ހަމަވި ގަޑިއަށް އޭތި އޮޕަރޭޓް ކޮށްފައި އިން ކަމަށް،" އޭނާ ވިދާޅުވި އެވެ.
"އެކަން ކުރި މީހާއަށް ވަރަށް ރަނގަޅަށް ލޮކޭޝަން އާއި ހުރިހާ ތަނެއް އެނގޭ."
އޭނާ ވިދާޅުވި ގޮތުގައި ގޮއްވާލަން ތައްޔާރުކުރި ސައިކަލް ބަހައްޓާފައި ހުރީ އޭތި ގޮއްވާލުމުން ނަޝީދަށް އެންމެ ބޮޑަށް އަނިޔާވާނެ ދިމާ ބަލައިފަ އެވެ.
ޕްލާންޓްކޮށްފައި އިން އެއްޗާ ރައީސް ނަޝީދު އަރާ ހަމަވި ވަގުތު އެ އިނީ ގޮއްވާލާފައި. ވަަރަށް ކައިރިން ބަރާބަރަށް ހުރިހާ މަންޒަރުތަކެއް ފެންނަ ހިސާބުން ގޮއްވާލި ކަމަށް ބެލެވެނީ.
އޭނާ ލަފާކުރައްވާ ގޮތުގައި ގޮއްވާލީ ރިމޯޓުން އޮޕަރޭޓް ކުރާ ޑިވައިސް އެކެވެ. އެ ގޮވުމާއެކު އެ ސަރަހައްދަށް ކޮށްފައިވާ ގެއްލުންތަކަށް ބަލާއިރު އެއީ "ހައި އެކްސްޕްލޯސިވް" ކަހަލަ އެއްޗެއް ބޭނުންކޮށްގެން ކަމަށް ވިދާޅުވި އެވެ. އޭތި ގޮއްވާލަން ބޭނުންކުރަނީ ޑިޓޮނޭޓަރު ކަމަށް ވިދާޅުވި އެވެ. އޭގެތެރެއަށް، އިންޖަރީކުރަން މޮހޮރު ފަދަ އެއްޗެހި އަޅާފައި ހުރި ނަމަ އެ ސަރަހައްދުން ފެންނަން ހުރެދާނެ ކަަމަށް އޭނާ ލަފާކުރައްވަ އެވެ.
ބާރުގަދަ އެ ގޮވުމާ އެކު ފިހާރައިގެ ބިއްލޫރިތައް ވެސް ވަނީ ފުނޑުފުނޑުވެފަ އެވެ.
އެކްސްޕާޓް ވިދާޅުވީ އެ ގެއްލުންތަކަށް ބަލާއިރު ބެލެވެނީ "މިލިޓަރީ އެކްސްޕްލޯސިވްއެއް" ބޭނުންކޮށްގެން ގޮއްވާލާފައިވާ ކަމަށެވެ.
އޭނާ މިގޮތަށް ލަފާކުރެއްވި ނަމަވެސް މިކަން ހިނގި ގޮތް ފުލުހުން އަދި އާއްމެއް ނުކުރެ އެވެ. ސީރިއަސް މައްސަލައެއްގެ ގޮތުގައި މިކަން އަންނަނީ ތަހުގީގު ކުރަމުންނެވެ.
މި ތަހުގީގަށް ރާއްޖެ އިން ބޭރުގެ މާހިރުންގެ އެހީ ހޯދަން ސަރުކާރުން ވަނީ ނިންމައިފަ އެވެ.
