ކުރީގެ ރައީސް މުހައްމަދު ނަޝީދުގެ ގެކޮޅުގެ ކައިރީގައި އެއްޗެއް ގޮއްވާލައިގެން މިރޭ ދިން ހަމަލާ ސިފައިންނާއި ފުލުހުންނާއި އަދި އެހީތެރިވެދޭ ބޭރު ގައުމުތަކުގެ މުއައްސަސާތަކާ ގުޅިގެން ތަހުގީގު ކުރަމުންދާ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެ އެވެ.
ހަމަލާގެ ސައިޓަށް ވަޑައިގެން، ނޫސްވެރިންގެ ސުވާލުތަކަށް ޖަވާބުދެއްވަމުން އިމްރާން ވިދާޅުވީ، ރައީސް ނަޝީދަށް ދިން ހަމަލާ އަކީ ލުއި ކަމެއްގެ ގޮތުގައި ސަރުކާރުން ނުނަގާނެ ކަމަށެވެ. ސަރުކާރުގެ ހުރިހާ ވަސީލަތެއް ބޭނުންކޮށްގެން އެ ހަމަލާ ތަހުގީގުކޮށް، އެކަން ކުރި މީހުން އިންސާފުގެ ކުރިމައްޗަށް ގެންނާނެ ކަމަށާއި އެ މަސައްކަތް މިހާރު ފަށާފައިވާ ކަމަށް ވެސް ވިދާޅުވި އެވެ.
"މައްސަލަ ތަހުގީގާ ބެހޭގޮތުން ވާހަކަ ދައްކަން އަދި ވަރަށް އަވަސް، އެހެން ނަމަވެސް އެ އަމަލު ހިންގި ފަރާތްތައް އިންސާފުގެ ކުރިމައްޗަށް ގެނައުމުގެ މަސައްކަތް މިދަނީ ކުރަމުން،" އިމްރާން ވިދާޅުވި އެވެ.
މިނިސްޓަރު ވިދާޅުވީ، އެ މައްސަލަ ތަހުގީގުކުރަން ފުލުހުންނާއި ސިފައިންގެ އިތުރުން އެހީތެރިވާ އެހެން ގައުމުތަކުގެ މުއައްސަސާތައް ވެސް ގުޅިގެން މައްސަލަ ތަހުގީގުކުރުމުގެ މަސައްކަތް ކުރިއަށްދާ ކަމަށެވެ. އަދި ތަހުގީގަށް މުހިއްމު މައުލޫމާތުތަކެއް ފުލުހުންގެ އިންޓެލިޖެންސަށް ލިބެމުންދާ ކަމަށާއި އެ މައުލޫމާތުތައް އެނަލައިޒްކޮށް ބަލަންޖެހޭ ކަންކަން ބަލަމުންދާ ކަމަށް ވެސް އިމްރާން ވިދާޅުވި އެވެ.
މިރޭގެ ހަމަލާގައި ރައީސް ނަޝީދުގެ ހަށިކޮޅަށް ވަނީ ޒަހަމްތަކެއް ލިބިވަޑައިގެންފަ އެވެ. އެހެން ނަމަވެސް އޭގެ ތަފްސީލެއް އަދި ނުލިބެ އެވެ.
