ކުރީގެ ރައީސް މައުމޫން އަބްދުލްގައްޔޫމް މާފުށީ ޖަލުގައި ބަންދުކޮށްފައި ހުރިއިރު އެކަށީގެންވާ ސިއްހީ ފަރުވާ ލިބުމުގެ ހައްގު ގެއްލުނު ކަމަށް ހިއުމަން ރައިޓްސް ކޮމިޝަނުން ތިން އަހަރު ފަހުން ނިންމައިފި އެވެ.
ކޮއްކޯފުޅު ކުރީގެ ރައީސް އަބްދުﷲ ޔާމީންގެ ވެރިކަމުގައި މައުމޫން ހައްޔަރުކޮށް ޖަލަށް ލީ އިދިކޮޅު ފަރާތްތަކާ އެކު ވެރިކަން ވައްޓާލަން ރޭވި ކަމުގެ ތުހުމަތަށެވެ.
ޖަލު ބަލަހައްޓާ ކަރެކްޝަންސްއާ ދެކޮޅަށް މައުމޫންގެ ފަރާތްޕުޅުން ޖޫން 26، 2018 ގައި ހުށަހެޅި މައްސަލަ ބަލައި ސާބިތުވާ ކަމަށް ނިންމީ މިދިޔަ މަހުގެ 23ގަ އެވެ. މިކަން މައުމޫންގެ ވަކީލުންނަށް އެޗްއާރުސީއެމުން ވަނީ އަންގައިފަ އެވެ.
ޖަލުގައި ބަންދުކޮށް ބޭސްފަރުވާގެ ހައްގުން މަައުމޫން މަހްރޫމްކުރި ކަން ކަރެކްޝަންގެ މައްޗަށް ސާބިތުވިޔަސް އެ މައްސަލައިގައި އެޗްއާރުސީއެމުން އަމަލުކުރާނެ ގޮތެއް އަންގައިފައެއް ނުވެ އެވެ.
އެޗްއާރުސީއެމަށް މައްސަލަ ހުށަހެޅީ މައުމޫންގެ އުމުރުފުޅާއި ސިއްހީ ހާލަތަށް ރިއާޔަތްކޮށް އެމަނިކުފާނުގެ ފުރާނަފުޅަށް ނުރައްކާވާ ފަދަ ހާލަތެއް ކުރިިމަތިވުމުގެ ފުރުސަތު ވީހާވެސް ކުޑަކުރުމަށްޓަކައި ކަމާގުޅުން ހުރި ޑޮކްޓަރުންގެ އިރުޝާދުތަކާ އެއްގޮތަށް އަމަލުނުކޮށް ދޫނިދޫ ކަސްޓޯޑިއަލުން މާފުށީ ޖަލަށް ބަދަލުކުރުމުންނެވެ.
މި މައްސަލަ އެޗްއާރުސީއެމުން ނިންމި ގޮތުގެ ރިޕޯޓުގައި ވަނީ މައުމޫނަށް އޭރު ކުރިމަތިވެވަޑައިގަތް ސިއްހީ ހާލަތަކީ ރިސްކު ހިމެނިގެންވާ ހާލަތެއް ކަަމަށެވެ. ވީހާވެސް ގާތުން މޮނިޓަކުރަން އެކި ފަހަރުމަތިން ޑޮކްޓަރުން އިރުޝާދު ދީފައިވާ ކަމަށް ވެސް ރިޕޯޓުގައި އޮތެވެ.
މައުމޫނަށް ކުރިމަތިވެފައިވާ ހާލަތަކީ ހޮސްޕިޓަލްގައި ފަރުވާދޭން ޖެހޭ ފަދަ އަދި އާއިލާގެ އެހީތެރިކަމާއި އެއްބާރުލުން ލިބެންޖެހޭ ފަދަ ހާލަތެއް ކަމަށާއި އެ ހާލަތުގައި ކަނޑުދަތުރުކުރުމަކީ ބަލި ހާލަތު އިތުރަށް ގޯސްވެދާނެ ކަމެއް ކަން ޑޮކްޓަރުން އިރުޝާދު ދީފައިވާ ކަމަށް އެޗްއާރުސީއެމްގެ ރިޕޯޓުގައިވެ އެވެ.
ކޮމިޝަނުން ބުނީ ޖަލުގައި ފަރުވާ ނުދެވޭނެ މީހުންނަށް ޖަލުން ބޭރުގައި ފަރުވާ ދޭން ޖެހޭނެ ކަމަށް ކަނޑައަޅާފައިވާ ގާނޫނުތަކާއި ގާނޫނުއަސާސީ އާއި ޑޮކްޓަރުންގެ ލަފަޔާ އެއްގޮތަށް މައުމޫނަށް ސިއްހީ ހިދުމަތް ފޯރުކޮށްދީފައި ނުވާ ކަން މައްސަލައިގައި ހުށަހެޅި ލިއުންތަކުންސާބިތުވާ ކަނޑައަޅައި މައްސަލަ ނިންމީ ކަމަށެވެ.
މައުމޫން ޖަލަށް ލީ ސިޔާސީ ކަންކަން ހަލަބޮލިވެ އޭރުގެ އިދިކޮޅު ޕާޓީތަކާ ގުޅިވަޑައިގެން މައުމޫން މަސައްކަތް ކުރައްވަމުން ގެންދަވަނިކޮށެވެ. ކޮއްކޯފުޅު ޔާމީންގެ ވެރިކަމުގައި ގާނޫނާ ހިލާފަށް ގެންދިޔަ ބައެއް ކަންކަމާ ފާޅުގައި ދެކޮޅަށް މައުމޫން އަޑު އުފުއްލެވި އެވެ. މި މައްސަލައިގައި އެމަނިކުފާނު ޕީޕީއެމްގެ ރައީސްގެ މަގާމުން ވެސް ވަކިކުރީ އެވެ.
މައުމޫން ވިދާޅުވަމުން ގެންދަވަނީ އެމަނިކުފާނު ޖަލަށް ލީ ނުހައްގުން ކަމަށެވެ.
