ރާއްޖޭން ފުރަތަމަ ފަހަރަށް ޖައްވަށް ސެޓެލައިޓެއް ފޮނުވުމުގެ މަސައްކަތް ފަށަން އިންސްޓިޓިއުޓް ފޯ ގްލޯބަލް ސަކްސެސް (އައިޖީއެސް) އިން ތައްޔާރުވެއްޖެ އެވެ.
މިއީ ދުނިޔެ ހޫނުވުމާއި މޫސުމަށް އަންނަ ބަދަލާ ގުޅޭ ސައިންޓިފިކް ދިރާސާ ކުރުމަށް ފޮނުވާ ސެޓެލައިޓެކެވެ.
އައިޖީއެސް ގެ ޗެއާމަން އަދި ސީއީއޯ ރިފްއަތު މުހައްމަދު ވިދާޅުވީ މި މިޝަންއަށް ބޭނުންވާ ފައިސާ ހަމަޖެހިފައިވާ ކަމަށާއި އަމަލީ މަސައްކަތް ފެށުމަށް ތައްޔާރުވެފައިވާ ކަމަށެވެ.
"މިޝަން ގައި ބައިވެރިވާން ބޭނުންވާ ޒުވާނުންނަށް ވަރަށް އަވަހަށް އެ ފުރުސަތު ހުޅުވާލާނަން. ސެޓެލައިޓް އުފައްދާނީ ވެސް އަދި މުޅި މިޝަން ލީޑް ކުރާނީ ވެސް ދިވެހި ޒުވާނުން. އެކަމަށް ބޭނުންވާ ތަމްރީނު އަޅުގަނޑުމެން ފޯރުކޮށްދޭނަން" ރިފްއަތު ވިދާޅުވިއެވެ.
މި މަސައްކަތް ކުރަން އެމެރިކާގެ ތަޖުރިބާކާރު ޓީމަކުން 12 ދިވެހިން ތަމްރީނު ކުރާނެ ކަމަށް އައިޖީއެސް އިން ނެރެފައިވާ ބަޔާނުގައި ބުނެފައިވެ އެވެ.
މި ސެޓެލައިޓަށް ބޭނުންވާ ހާޑްވެއާ ސަޕްލައިކޮށް ސެޓެލައިޓް ލޯންޗް ކުރުމުގައި ފަންނީ ގޮތުން އެހީތެރިވެދިނުމަށް އައިޖީއެސް އާއި އެމެރިކާގެ ކޭއެސްއެފް ސްޕޭސް ފައުންޑޭޝަނާ އެކު މިދިޔަ މަހު ވަނީ އެއްބަސްވުމެއްގައި ސޮއި ކޮށްފަ އެވެ.
މި މިޝަން ކުރިއަށްގެންދަން ހަމަޖެހިފައިވަނީ އެމެރިކާގެ ޖައްވީ އިދާރާ ނާސާ އާއި ޔޫރަޕިއަން ސްޕޭސް އެޖެންސީ އާދި މަޝްހޫރު ސްޕޭސް ކުންފުނި ސްޕޭސް އެކްްސްގެ އިލްމުވެރިންނާއި ތަޖުރިބާކާރުންގެ ޓީމަކުންނެވެ.
