ވަޒީފާއާ ބެހޭ ގާނޫނާ އެއްގޮތަށް މި ރޯދަ މަހު މުވައްޒަފުންނަށް ދޭންޖެހޭ ފައިސާގެ އިނާޔަތް ބައެއް ކުންފުނިތަކުން ނުދޭ ކަމަށް ލޭބާ ރިލޭޝަންސް އޮތޯރިޓީ (އެލްއާރްއޭ) އިން މިއަދު ބުނެފި އެވެ.
އެލްއާރުއޭގެ އެސިސްޓެންޓް ޑިރެކްޓަރު ހޫދު އައްބާސް އަހުމަދު ވިދާޅުވީ ރޯދަ މަހުގެ އިނާޔަތް ނުދީގެން އިއްޔެގެ ނިޔަލަށް 53 މީހަކު މައްސަލަ ހުށަހަޅައިފައިވާ ކަމަށެވެ. މިދިޔަ ރޯދަ މަހު އިނާޔަތް ނުދީގެން މައްސަލަ ހުށަހެޅީ ޖުމުލަ 54 މީހުންނެވެ.
ވަޒީފާއާ ބެހޭ ގާނޫނު ބުނާ ގޮތުން ރޯދަމަހުގެ އިނާޔަތުގެ ގޮތުގައި ދިވެހި ކޮންމެ މުވައްޒަފަކަށް 3،000ރ. މަސް ފެށުމުގެ ކުރިން ދޭންޖެހޭނެ އެވެ. އަދި ބިދޭސީ މުވައްޒަފުންގެ ތެރެއިން މުސްލިމް މުވައްޒަފުންނަށް އެ އިނާޔަތް ދިނުމަކީ އިހްތިޔާރުގައި އޮންނަ ކަމެކެވެ.
ހޫދު ވިދާޅުވީ ރޯދަ އިނާޔަތް ނުދޭނަމަ އެ މައްސަލަ އެ އޮތޯރިޓީއަށް ހުށަހަޅަން އެދޭ ކަމަށެވެ. މުވައްޒަފުން އެދޭނަމަ އެ މުވައްޒަފެއްގެ ނަން ހާމަ ނުކޮށް ވެސް މައްސަލަ ބަލައިދޭ ކަމަށް އޭނާ ވިދާޅުވި އެވެ.
އެ އޮތޯރިޓީއަށް މައްސަލަ ހުށަހެޅުމުން ވަޒީފާ ދޭ ފަރާތަށް އިނާޔަތް ދިނުމަށް އެ އޮތޯރިޓީން އަންގާނެ އެވެ.
"އިނާޔަތާ ގުޅިގެން ހުށަހެޅޭ މައްސަލަތަކުގައި، އެލްއާރްއޭ އިން އެންގުމުން، ވަޒީފާދޭ ގިނަ ފަރާތްތަކުން އާންމުކޮށް އިނާޔަތް ދޭ،" ހޫދު ވިދާޅުވި އެވެ.
މިދިޔަ އަހަރު ރޯދަ އިނާޔަތް ނުދީގެން މައްސަލަ ހުށަހެޅި މީހުންގެ ތެރެއިން 41 މީހަކަށް ވަނީ އިނާޔަތް ހޯދައިދީފައި ކަމަށް އެލްއާރުއޭން ބުނެ އެވެ.
