ލާމަރުކަޒީ ނިޒާމާ މެދު ހޭލުންތެރިކޮށް، ރައްޔިތުންގެ އިތުބާރާއި ޔަގީންކަން އުފައްދަން ގިނަ މަސައްކަތްތަކެއް ރޭވިފައިވާ ކަމަށް ލޯކަލް ގަވަމެންޓް އޮތޯރިޓީގެ ސީއީއޯ އަފްޝަން ލަތީފް މިއަދު ވިދާޅުވެއްޖެ އެވެ.
ކައުންސިލްތަކުގެ ބެލެނިވެރި ފަރާތްކަމަށްވާ، އެލްޖީއޭ އިން ލާމަރުކަޒީ ނިޒާމާ ގުޅޭ 101 ސުވާލާއި ޖަވާބު ހިމެނޭ ފޮތެއް ނެރުމުގެ ރަސްމިއްޔާތުގައި ވާހަކަ ދައްކަވަމުން އަފްޝަން ޔަގީންކަން ދެއްވީ އަލަށް އިންތިހާބުވި ހުރިހާ ކައުންސިލްތަކަކަށް ވެސް އެލްޖީއޭއިން ފުރިހަމަ އެއްބާރުލުން ދޭނެ ކަމަށެވެ.
އޭނާ އެދިވަޑައިގަތީ ގާނޫނުން ބޮޑެތި ބާރުތަކެއް ކައުންސިލްތަށް މިފަހަރު ދީފައިވާތީއާ އެކު ކައުންސިލަރުން ޒިންމާދާރުކަމާއި ތެދުވެރިކަމާ އެކު ރައްޔިތުންގެ ހައްގުގައި މަސައްކަތްކޮށްދެއްވުމަށެވެ.
އަފްޝަން ވިދާޅުވީ ލާމަރުކަޒީ ނިޒާމް ރާއްޖެ ތައާރަފްކުރި ފަހުން ވޭތުވެދިޔަ 10 އަހަރުގެ ތެރޭގައި އެތައް ތަޖުރިބާތަކެއް ކުރެވިފައިވާ ކަމަށެވެ. އުއްމީދުތަކަކާ އެކު މަސައްކަތް ފެށި ނަމަވެސް އެކި ގޮންޖެހުންތައް ކުރިމަތިވެ ލާމަރުކަޒީ ނިޒާމް ހީނަރުވި ކަމަށް ވިދާޅުވި އެވެ.
އެކަމަކު މި ސަރުކާރުގައި ގާނޫނަށް ގެނައި އިސްލާހުތަކާ އެކު ލާމަރުކަޒީ ނިޒާމުން އަނެއްކާވެސް އުއްމީދީ މަންޒަރެއް ފެންނަން ފަށާފައިވާ ކަމަށް ވިދާޅުވި އެވެ. ލާމަރުކަޒީ ނިޒާމް ހަރުދަނާކުރަން ރައީސް އިބްރާހިމް މުހައްމަދު ސޯލިހާއި ރައްޔިތުންގެ މަޖިލީހުގެ މެމްބަރުން ކޮށްދެއްވާ މަސައްކަތަށް އަފްޝަން ޝުކުރު އަދާކުރެއްވި އެވެ.
"އެލްޖީއޭ އިން ކުރަން ޖެހޭ އެންމެ މުހިއްމު ކަމަކީ މި ނިޒާމާ މެދު ރައްޔިތުންގެ މެދުގައި އޮތް އިތުބާރާއި ޔަގީންކަން އިތުރުކުރުން. މި ނިޒާމާ މެދު ހޭލުންތެރިކަން އިތުރުކުރަން އަޅުގަނޑުމެން ވަރަށް ގިނަ މަސައްކަތްތަކެއް ކުރަން ރޭވިފައި ހުރިކަން އުފަލާ އެކު ފާހަގަކުރަން،" އަފްޝަން ވިދާޅުވި އެވެ.
ކައުންސިލްތަކުން 33 ޕަސެންޓް އަންހެނުންނަށް ހާއްސަކުރާ ގޮތަށް ލާމަރުކަޒީ ގާނޫނަށް ގެނެވުނު 8 ވަނަ އިސްލާހާ އެކު މިފަހަރު ކައުންސިލްތަކުގައި އަންހެނުންގެ ހިއްސާ ބޮޑު ކަން އަފްޝަން ފާހަގަކުރެއްވި އެވެ.
އަންހެނުންގެ ބައިވެރިވުން އިތުރުކޮށް، އަންހެނުން ބާރުވެރިކުރުވާ އިލްމީގޮތުންނާއި، ފަންނީގޮތުން އަދި ސިޔާސީގޮތުން ގާބިލް ބަޔަކަށް ހެދުމުގެ އަޒުމުގައި އެލްޖީއޭ އިން ވަނީ މިދިޔަ މަހު ކިޔެވެނި ޕޯޓަލް ތައާރަފް ކޮށްފަ އެވެ.
އެލްޖީއޭ އިން މިއަދު ނެރުނު ފޮތުގައި ލާމަރުކަޒީ ނިޒާމާއި ދިވެހިރާއްޖޭގައި ލާމަރުކަޒީ ނިޒާމް ބައްޓަންވެފައިވާ ގޮތާއި ކައުންސިލްތަކާއި އެ ކައުންސިލްތަކަށް އިންތިހާބުކުރެވޭ ކައުންސިލަރުންނާއި އަދި މިނިޒާމާއި ރައްޔިތުންނާ ހުރި ގުޅުމާއި ގުޅޭގޮތުން މުހިއްމު މައުލޫމާތުތަކެއް ހިމެނެ އެވެ.
މި ފޮތް ނެރެދެއްވީ ހުޅުމާލެ ދާއިރާގެ މެންބަރު އަދި ލާމަރުކަޒީ ކޮމިޓީގެ މުގައްރިރު އަލީ ނިޔާޒެވެ.
އޭނާ ވިދާޅުވި ގޮތުގައި ކުރިން އެލްޖީއޭ ލޭބަލްކުރެވިފައި އޮންނަނީ ކައުންސިލްތައް ހަމައެކަނި ސަސްޕެންޑްކޮށް އަދަބު ދިނުމަށެވެ. އެކަމަކު އެކަން ބަދަލުވެފައިވާ ކަމަށް ނިޔާޒް ވިދާޅުވި އެވެ.
ނިޔާޒް ވިދާޅުވި ގޮތުގައި ލާމަރުކަޒީ ނިޒާމު ހިންގަން އޭރެއްގައި އޮންނަ ސަރުކާރުން ހުރަސްތައް ކުރިމަތިކުރުވިޔަސް މި ސަރުކާރުގެ ވިސްނުމަކީ ބާރުތައް ދީ ކައުންސިލްތައް މިނިވަންކަމާ އެކު ހިންގަން ޖާގަ ދިނުން ކަަމަށެވެ.
"މި ނިޒާމުން ރައްޔިތުންނަށް ފައިދާވާނެ ގޮތަށް ކުރިއަށް އޮތް ތަނުގައި ވެސް ގެންނަން ޖެހޭ ކޮންމެ އިސްލާހެއް، ކޮންމެ ބަދަލެއް އިރާދަކުރެއްވިޔާ ގެންނާނަން،" ނިޔާޒް ވިދާޅުވި އެވެ.
