ކުޑަކުދިން ހިމެނޭ ޖިންސީ ގޯނާގެ މައްސަލަތަކުގައި އެއްވެސް ކުއްޖެއްގެ ކަރާމާތަށް ގެއްލުންވާ ގޮތަށް އެއްވެސް މައުލޫމާތެއް އާންމު ނުކުރުމަށް ހެލްތު މިނިސްޓްރީން މިއަދު އަންގައިފި އެވެ.
ހެލްތުން މިހެން އެންގީ މީޑިއާގެ އެކި މަންސަތަކުގައި ކުއްޖެއްގެ ޒާތީ މައުލޫމާތު ހާމަކުރަމުންދާތީ، އެކަން ހުއްޓުވައި ކުއްޖާގެ މަސްލަހަތު ހިމާޔަތްކުރުމަށް ކަމަށް މި ބަޔާނުގައި ބުނެފައިވެ އެވެ.
މި ބަޔާނުގައި ވަނީ ގާނޫނުއަސާސީގައި ކުޑަކުދިންނަށް ހާއްސަ ރައްކާތެރިކަން ދިނުމާ ގުޅޭ މާއްދާގައި، އާއިލާ އާއި، ޖަމާއަތާއި، އަދި ދައުލަތުގެ ފަރާތުން ކުޑަކުދިންނަށް އެހީތެރިކަން ދޭންޖެހޭނެ ކަމަށް ބަޔާންކުރާ ބަޔާންކުރާ ކަމަށެވެ. އަދި ރާއްޖެއިން ބައިވެރިވެފައިވާ ބައިނަލްއަގުވާމީ މުއާހަދާތަކަށް ރިއާޔަތްކޮށް ގާނޫނުތައް ހެދިފައިވާކަން ވެސް އެ މިނިސްޓްރީން ހަނދާންކޮށްދިނެވެ.
މީގެ އެއް ގާނޫނަކީ ކުޑަކުދިންގެ ހައްގުތައް ރައްކާތެރިކުރުމުގެ ގާނޫނެވެ. އެ ގާނޫނާ ހަވާލާދީ ހެލްތު މިނިސްޓްރީން ބުނީ ކުޑަކުދިންގެ ޒާތީ އެއްވެސް މައުލޫމާތެއް ހާމަކުރުމަކީ މަނާކަމެއް ކަމަށެވެ. މި ގާނޫނުގެ ދަށުން ކުށުގެ ތުހުމަތުވާ ކުދިންނާއި، ކުށުގެ ޝިކާރައަކަށްވާ ކުދިން އަދި ރައްކާތެރިކަން ބޭނުންވާ ހުރިހާ ކުދިން ވެސް ހިމެނެ އެވެ.
"ކުޑަކުދިންގެ ކަރާމާތަށް އެއްވެސް އުނިކަމެއް އަންނާނެގޮތަށް އެކުދިންގެ ޒާތީ އެއްވެސް މައުލޫމާތެއް އެއްވެސް ފަރާތަކުން ހާމަކޮށްގެން ނުވާނެ،" ހެލްތުގެ ބަޔާނުގައި ބުންޏެވެ.
އެ ގޮތުން ކުދިންގެ ނަމާއި، އެޑްރެހާއި، ތައުލީމު ހާސިލުކުރާ ތަނުގެ މައުލޫމާތު ފަދަ ޒާތީ މައުލޫމާތެއް ނުވަތަ ކުއްޖާއަކީ ކާކުކަން ދެނެގަނެވޭނެ ފަދަ އެއްވެސް މައުލޫމާތެއް ނުވަތަ އެކުދިންގެ ތަސްވީރެއް އެއްވެސް މީޑިއާއެއްގައި ޝާއިއުކޮށްގެން ނުވާނެ ކަމަށް ހެލްތުން ބުންޏެެވެ. މިއީ އެކުދިންގެ މަސްލަހަތު ރައްކާތެރިކޮށްދިނުމުގެ ބޭނުމުގައި ކަނޑައަޅާފައިވާ ހަމަތަކެކެވެ.
ހެލްތު މިނިސްޓްރީން ފާހަގަކުރި ގޮތުގައި އާންމުން ދެކޭގޮތަށް ނުފޫޒު ފޯރުވުމަށް ނުވަތަ އެނޫން ވެސް ބޭނުމަކަށް ކުއްޖާގެ މައުލޫމާތު ހާމަކުރުމަކީ ހައްގަކަށް އަރައިގަތުމެވެ.
ބަޔާން ނިންމާލަމުން ހެލްތުން ވަނީ ކުޑަކުދިންގެ ހައްގުތައް ރައްކާތެރިކުރުމަކީ މުޅި މުޖުތަމައުގެ މައްޗަށް އޮތް ގާނޫނީ ބޮޑު ޒިންމާއެއް ކަމަށް ހަނދާންކޮށްދީފަ އެވެ. މިހެންކަމުން އެފަދަ އެއްވެސް މައުލޫމާތެއް މީޑިއާގެ އެއްވެސް މަންސައެއްގައި އެއްވެސް ފަރާތަކުން އާންމު ނުކުރުމަށް އެ މިނިސްޓްރީން ވަނީ އަންގައިފަ އެވެ.
ހެލްތު މިނިސްޓްރީގެ ބަޔާނުގައި މިއީ ސީދާ ކޮން މައްސަލައެއް ކަމެއް ހާމަކޮށްފައެއް ނުވެ އެވެ. ނަމަވެސް ބެލެވޭ ގޮތުގައި މިއީ ކުރީގެ ފޮރިން މިނިސްޓަރު އަބްދުﷲ ޝާހިދުގެ މައްސަލަގައި ސޯޝަލް މީޑިއާގައި ބައެއް އެކައުންޓުތަކުން ދައުރުކުރަމުންދާ ޕޯސްޓުތަކާ ގުޅިގެން ނެރުނު ބަޔާނެކެވެ. އެ ޕޯސްޓުތަކުގައި ކުއްޖާގެ ކަރާމާތަށް ގެއްލުންވާ ފަދަ ވާހަކަތައް ވަނީ ފަތުރައިފަ އެވެ.
