ޕޯސްޓާއި ކޫރިއާ މެދުވެރިކޮށް ރާއްޖެ އެތެރެކުރަން އުޅުނު ތިން ކިލޯއަށް ވުރެ ގިނަ މަސްތުވާތަކެތި މޯލްޑިވްސް ކަސްޓަމްސް ސާވިސް އިން އަތުލައިގެންފި އެވެ.
މި ތަކެތި އަތުލައިގަތީ ރާއްޖެ ގެނެސްފައިވާ ޕާރުސަލްތަކެއް ބަލައިފާސްކުރުމުގެ ތެރޭގަ އެވެ. އެގޮތުން ވަކިވަކިން ގެނައި ދެ ޕެކޭޖަކުން އެއް ބާވަތެއްގެ ޖުމްލަ 3.15 ކިލޯގެ މަސްތުވާތަކެތި ވަނީ ފެނިފަ އެވެ.
މި ދެ މައްސަލައިގައި ވެސް އަތުލައިގެންފައި ވަނީ ސިންތެޓިކް ކެތިނޯން ކަމަށް ކަސްޓަމްސް އިން މައުލޫމާތު ދެ އެވެ. މިއީ "މިއައު މިއައު" ގެ ނަމުން ރާއްޖޭގައި މަޝްހޫރުވެގެން އުޅޭ ބާރުގަދަ ޑްރަގުގެ ބާވަތެކެވެ.
ކަސްޓަމްސްއިން ފުރަތަމަ ޕެކޭޖު އަތުލައިގަނެފައި ވަނީ މިދިޔަ މަހުގެ 29 ވަނަ ދުވަހު އެވެ. އެއީ ޕޯސްޓް މެދުވެރިކޮށް ރާއްޖެ ގެނެސްފައިވާ ޕެކޭޖެއް ބަލައިފާސްކުރުމުގެ ތެރޭގަ އެވެ. އޭގެ ތެރޭގައި މަސްތުވާތަކެތި ފޮރުވާފައި ހުރި ކަމަށް ޝައްކުކުރެވިގެން އިތުރަށް ބެލިއިރު 2.12 ކިލޯގެ ސިންތެޓިކް ކެތިނޯން ވަނީ ފެނިފަ އެވެ.
ދެވަނަ ޕެކޭޖު ފެނުނީ އޭގެ ދެ ދުވަސް ފަހުން އޮކްޓޯބަރު 31 ވަނަ ދުވަހު އެވެ. އެ ތަކެތި ރާއްޖެ އެތެރެކުރަން އުޅުނީ ކޫރިއާ މެދުވެރިކޮށް ގެނައި ޕެކޭޖެއްގަ އެވެ. ޝައްކުކުރެވިގެން އެ ޕެކޭޖު ފާސްކުރިއިރު 1.03 ކިލޯގެ ސިންތެޓިކް ކެތިނޯން ވަނީ އަތުލައިގެންފަ އެވެ.
މި ޕެކޭޖުތައް އަތުލައިގަތުމުގެ ފަސް ދުވަސް ކުރިން ކަސްޓަމްސްއިން ވަނީ އެއާ ފްރައިޓް ޝިޕްމަންޓެއްގެ ތެރެއިން ހަމަ މި ބާވަތުގެ 6.7 ކިލޯގެ ޑްރަގު އަތުލައިގެންފަ އެވެ. މިހެންކަމުން ހަފުތާއެއްހާ ދުވަހުގެ ތެރޭގައި ކަސްޓަމްސްއިން އަތުލައިގަތް މިވަނީ މި ބާވަތުގެ ގާތްގަނޑަކަށް 10 ކިލޯ ހިފަހައްޓާފަ އެވެ.
މި މައްސަލަތަކާ ގުޅިގެން އެއްވެސް މީހަކު ހައްޔަރުކުރި ކަމެއް ފުލުހުން އަދި ނުބުނެ އެވެ.
