ހޮނިހިރު ދުވަހު ބޭއްވި ލޯކަލް ކައުންސިލް އިންތިހާބުގައި ބާތިލު ވޯޓުތައް އާދަޔާ ހިލާފަށް ގިނަ ވެފައިވާތީ އެ ވޯޓްތައް އަލުން ގުނުމަށް އިދިކޮޅު ކޯލިޝަނުން، އިލެކްޝަންސް ކޮމިޝަން (އީސީ) ގައި މިއަދު އެދިއްޖެ އެވެ.
އިދިކޮޅު ކޯލިޝަނުން ބޭއްވި ނޫސްވެރިންގެ ބައްދަލުވުމުގައި އެ ކޯލިޝަންގެ ތަރުޖަމާން ހީނާ ވަލީދު ވިދާޅުވީ ބައެއް ފޮށިތަކުން 500 އާއި 1،000އާ ދެމެދުގެ އަދަދަކަށް ވޯޓު ބާތިލު ކަމަށް ނިންމާފައިވާ ކަމަށެވެ.
"މިފަދަ ބާތިލް ވޯޓު ހުރި ދިމާދިމާ އަލުން ރީ ކައުންޓްކޮށް އަލުން ރީޗެކް ކުރުމަށް ގޮވާލަން. މި ނަތީޖާތައް ސައްހަ ނަތީޖާތަކެއްތޯ އަޅުގަނޑުމެން ބަލަން ބޭނުންވޭ،" ހީނާ ވިދާޅުވި އެވެ.
"ދުނިޔޭގެ ނިސްބަތަށް ބަލާއިރު ވެސް މިހާ ބާތިލު ވޯޓް ގިނަ ވެއްޖެ ނަމަ މިއީ އެ ދާއިރާއެއްގެ ރައްޔިތުން ވެސް ނުވަތަ ފަރުދީ ގޮތުން ވެސް ބަލަން ޖެހޭނެ ކަމެއް ކަންނޭނގެ."
ގިނަ ވޯޓުތަކެއް ބާތިލުވެފައިވާއިރު އަންހެނުންނަށް ހާއްސަ ކޮށްފައިވާ ގޮނޑިތަކަށް ވަކި މެމްބަރުން އިންތިހާބު ކުރުމާއި ކައުންސިލްގެ ރައީސް ވަކިން ހޮވުން ފަދަ ކުރިއާ ތަފާތު ބަދަލުތަކެއް މިފަހަރުގެ ވޯޓު ކަރުދާހުގައި ހިމެނެ އެވެ.
ވޯޓްގެ ނަތީޖާ ބަދަލު ކުރަން ސަރުކާރުން މަސައްކަތް ކުރާ ކަމަށް ވިދާޅުވެ ހީނާ ވަނީ ރައްޔިތުންގެ ނިންމުމަށް އިހުތިރާމު ކުރުމަށް ގޮވާލައިފަ އެވެ. ވޯޓުގެ ނަތީޖާ ބަދަލު ކުރުމަށް ސަރުކާރުން އީސީއަށް ނުފޫޒު ފޯރުވާނަމަ އެފަދަ މައްސަލަތައް ކޯޓަށް ހުށަހަޅާނެ ކަމަށް ވެސް ހީނާ ވިދާޅުވި އެވެ.
"އަތޮޅު ކައުންސިލްގެ ބައެއް ގޮނޑިތައް ވެސް ނުފޫޒު ބޭނުންކޮށްގެން ކަޓުވާލުމަށް ސަރުކާރުން އެބަ މަސައްކަތް ކުރޭ،" ހީނާ ވިދާޅުވި އެވެ.
ކުދިކުދި ތަފާތުން އިދިކޮޅުން ކާމިޔާބު ކޮށްފައި ހުރި ދާއިރާތައް ސަރުކާރާ އެއްކޮޅަށް ބަދަލު ކުރުމުގެ މަސައްކަތް ކުރަމުން ދާ ކަމަށް ވެސް ހީނާ ތުހުމަތު ކުރި އެވެ. އެފަދަ ކަންކަން ފާހަގަވާތީ އެ މައްސަލަތައް ބަލަމުން ދާ ކަމަށް ވިދާޅުވި އެވެ.
ބައެއް ފޮށިތަކުގެ ނަތީޖާ އަލުން ގުނައި ދިނުމަށް އެމްޑީޕީން ވަނީ އެދިފަ އެވެ. އިދިކޮޅުން ތުހުމަތު ކުރަނީ އެއީ ވޯޓު އޮޅުވާލަން ކުރާ ކަމެއް ކަމަށެވެ. އީސީން މިއަދު ބުނީ އެއްވެސް ފޮއްޓެއްގެ ވޯޓު އަލުން ގުނަން ނުނިންމާ ކަމަށެވެ.
