ޕީޕަލްސް ނެޝަނަލް ފްރަންޓް (ޕީއެންއެފް) ގެ މެންބަރުންނަށް ނޭނގި އެ ޕާޓީން ވަކިކޮށް، ސަރުކާރު ހިންގާ ޕީޕަލްސް ނެޝަނަލް ކޮންގްރެސް (ޕީއެންސީ) އަށް ވައްދަމުންދާ ކަމަށް ކުރާ ތުހުމަތުތައް އިލެކްޝަންސް ކޮމިޝަން (އީސީ) އިން މިއަދު ދޮގުކޮށްފި އެވެ.
ކޮމިޝަނުން ނެރުނު ނޫސް ބަޔާނެއްގައި ބުނީ މިހާރު ޕާޓީތަކަށް ވަންނަނީ އަދި ވަކިވަނީ އީ-ފާސް މެދުވެރިކޮށް ކަމަށްވާތީ އެކަމުގައި އިލެކްޝަންސް ކޮމިޝަނަށް އަދި އެހެން ޕާޓީއަކަށް ވެސް މަކަރު ނުހެދޭނެ ކަމަށެވެ.
"ޕާޓީއަކަށް ވަނުމާއި ޕާޓީން ވަކިވުމަކީ ހަމައެކަނި އެ ފަރާތަކާއި އެ ޕާޓީއަކާ ދެމެދު ހިނގާ މުއާމަލާތެއް. މިއީ އިތުރުފަރާތެއްގެ ބައިވެރިވުމެއްނެތް، ފަރުދީ މިނިވަންކަމާއި އިހްތިޔާރުގެ ތެރެއިން ނިމޭ ނިންމުމެއް. މިފަދަ ރައްކާތެރި ނިޒާމެއްގެ ތެރެއިން ކަންކަން ހަމަޖެހިފައިވާއިރު، އެއްވެސް ފަރާތަކަށް ނޭނގި ޕާޓީން ވަކިކުރުމަކީ ނުވަތަ ޕާޓީއަކަށް ބަދަލުކުރުމަކީ މި ކޮމިޝަނަށް އަދި އެހެން އެއްވެސް ފަރާތަކަށް ކުރެވޭ ގޮތަށް އޮތް ކަމެއް ނޫން،" އީސީން ބުންޏެވެ.
އީސީން ބުނީ ހަގީގަތް އޮޅޭގޮތަށް، އާންމުންގެ މެދުގައި އިލެކްޝަންސް ކޮމިޝަނަށާއި ޕާޓީތަކުގެ މެންބާޝިޕް ނިޒާމަށް އޮތް އިތުބާރު ގެއްލޭ ގޮތަށް ޕީއެންއެފް އިން ކުރަމުންދާ ދޮގު ތުހުމަތުތަކާއި ދައްކަމުންދާ ވާހަކަތައް ހަރުކަށި އިބާރާތުން ކުށްވެރިކުރާ ކަމަށެވެ.
ޕީއެންއެފްއިން 2،500 މެންބަރުން ވަކިކުރި ކަމުގެ ތުހުމަތާއެކު ޝަކީލުގެ މައްސަލަ ފުލުހަށް
ޕީއެންއެފްގެ 2،500 މެންބަރުންނަށް ނޭނގި އަދި ވަޒީފާގެ ބިރުދައްކައިގެން ޕާޓީން ވަކިކޮށްފައިވާ ކަމަށް ބުނެ، އިލެކްޝަންސް ކޮމިޝަންގެ ރައީސް ފުއާދު ތައުފީގުގެ މައްޗަށް ޖިނާއީ ތަހުގީގެއް ހިންގުމަށް އެދި ފުލުހަށް މައްސަލަ ހުށަހަޅައިފިއެވެ. އެ ޕާޓީން ތުހުމަތުކުރާ ގޮތުގައި މެންބަރުންގެ ދަފްތަރު އޮޅުވާލައިގެން ޕީއެންސީއަށް މެންބަރުން އިތުރުކުރަމުންދާތީ، އީސީގެ ޑޭޓާބޭސްގެ ފޮރެންސިކް އޮޑިޓެއް ހަދަން ޖެހެއެވެ.
މީގެއިތުރުން ހަގީގަތާ ހިލާފު ވާހަކަތައް ނުފެތުރުމަށާއި ހުރިހާ އެންމެންވެސް ޒިންމާދާރުކަމާއެކީ ސިޔާސީ ހަރަކާތްތައް ހިންގުމަށް އީސީން ވަނީ ނަސޭހަތްތެރިވެ އިލްތިމާސްކޮށްފަ އެވެ.
ޕީއެންއެފް އިން 2،500 އެއްހާ މެންބަރުން ވަކިކޮށްފައިވާކަމުގެ ތުހުމަތާއެކު އީސީގެ ރައީސް މުހައްމަދު ޝަކީލްގެ މައްޗަށް ޖިނާއީ ތަހުގީގެއް ހިންގައިދިނުމަށް އެދި ފުލުހަށް އިއްޔެ ހުށަހެޅި އެވެ.
ޕީއެންއެފްގެ ސެކްރެޓަރީ ޖެނެރަލް އަދި ކުރީގެ މިނިސްޓަރު މުހައްމަދު މަލީހު ޖަމާލު ވިދާޅުވީ ޕީއެންއެފް އިން ވަކިކުރި 2،500 މެންބަރުންގެ ތެރެއިން ގިނަ ބަޔަކު ވަޒީފާގެ ބިރުދައްކައިގެންނާއި މެންބަރުންނަށް ނޭނގި ވަކިކޮށްފައިވާ ކަމަށެވެ.
އީސީގެ ޑޭޓާ ބޭސްގެ ސައްހަކަމާމެދު ސުވާލު އުފެދިފައިވާތީ ޕީއެންއެފް އިން ހުށަހެޅި މައްސަލައިގައި ވަނީ ޑޭޓާ ބޭސްގެ ފޮރެންސިކް އޮޑިޓެއް ހައިދިނުމަށް އެދިފަ އެވެ.
ޕީއެންސީއަށް ވަގަށް މެންބަރުން ވައްދާފައިވާ ކަމަށް މީގެ ކުރިން ވެސް ތުހުމަތު ކުރެވިފައިވާއިރު، އެ މައްސަލަތައް ބަލައި، ފިޔަވަޅު އަޅާފައެއް ނުވެ އެވެ.
