މާލޭ ސިޓީ ކައުންސިލްގެ އަޣުލަބިއްޔަތު ފުރަތަމަ ފަހަރަށް އެމްޑީޕީއަށް ނުދީ މި އިންތިހާބުގައި މާލޭ ރައްޔިތުން ދިން މެސެޖް ބަލައިގަންނަ ކަމަށް ރައީސް އިބްރާހިމް މުހައްމަދު ސޯލިހް މިއަދު ވިދާޅުވެއްޖެ އެވެ.
މާލޭ ސިޓީ ކައުންސިލްގެ މޭޔަރުގެ ގޮނޑިއާ އެކު ކައުންސިލްގެ އަޣުލަބިއްޔަތު މިފަހަރު ދިނީ ޕީޕީއެމަށެވެ. މާލެ ގެއްލުމަކީ އެމްޑީޕީ އަށް ލިބުނު ވަރަށް ބޮޑު ނާކާމިޔާބެކެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް ވިދާޅުވީ މާލޭ ސިޓީ ރައްޔިތުންގެ ކަންބޮޑުވުންތައް އެބަހުރިކަން ނަތީޖާ އިން އެނގޭ ކަމަށެވެ. އެކަމަކު ތަފްސީލް އެނގޭނީ ދިރާސާތަކެއް ހެދުމަށް ފަހުގައި ކަމަށް ވިދާޅުވި އެވެ.
އެކަމަކު އެންމެ ބޮޑު މައްސަލައެއްގެ ގޮތުގައި ބޯހިޔާވަހިކަން ފާހަގަކުރެއްވިފައިވާ ކަަމަށާއި އެކަމަށް ހައްލު ހޯދަން ޖެހިފައިވާ ވިދާޅުވި އެވެ.
އެމަނިކުފާނު ވިދާޅުވީ މީގެއިތުރުން ކޮވިޑް-19އާ ގުޅިގެން އެޅި ފިޔަވަޅުތަކުގެ ތެރޭގައި މާލޭގެ ރައްޔިތުންނަށް އަސަރުކުރި ކަމަށެވެ. އޭގެތެރޭގައި ރެސްޓޯރަންޓްތަކުގެ ވިޔަފާރިއަށް ހުރަސްއެޅުމާއި ޓެކްސީ ދަތުރުތައް ހުއްޓި އާމްދަނީ ދަށްވުން ހިމެނޭ ކަމަށް ވިދާޅުވި އެވެ.
"އަޅުގަނޑުމެން އޭރު އެކަންތައްތައް ކުރަމުން ގެންދިޔައީ މުޅި ރާއްޖޭގެ ހުރިހާ ރައްޔިތުންނަށާއި މުޅި ގައުމަށް ފައިދާހުރި ކަމެއްގެ ގޮތުގައި ދެކިގެން. އެހެން ނަމަވެސް އޭގެ [ކޮވިޑުގެ] އިކޮނޮމިކް އިމްޕެކްޓްކުރި ވަރު މި ވޯޓުގައި ފެނިގެން ދިޔަ،" ރައީސް ވިދާޅުވި އެވެ.
"އޭގެ އިތުރުން ކޮރަޕްޝަނާއި ހާއްސަކޮށް އެމްއެމްޕީއާރުސީ މައްސަލަ ތަހުގީގުކުރަން ނަގާ ވަގުތު ހޭދަވަމުންދާ ދިއުން އަދި މަރާލެވިފައިވާ މީހުންނާއި ގެއްލުވާލާފައި ތިބި މީހުންގެ މައްސަލަތައް ބެލުމުގައި ލަސްވަމުންދާ ދިއުން މާލޭގެ ރައްޔިތުންގެ ކަންބޮޑުވުންތަކުގެ ތެރޭގައި ހިމެނޭ."
ރައީސް ވިދާޅުވި ގޮތުގައި އެމްޑީޕީގައި ތިބީ މައްސަލަތައް ހައްލުކުރަން ބޭނުންވާ ބައެކެވެ. އެއީ ހިޔާލުފާޅުކުރުމާއި މިނިވަންކަމާއި އެއްކޮޅަށް ވަކާލާތުކުރާ އަދި ވައްކަމާއި ކޮރަޕްޝަނާ ދެކޮޅު ގަބޫލުކުރުންތަކެއްގެ މަތީގައި ތިބި ބައެއް ކަމަށް ވިދާޅުވި އެވެ.
މިހެން ގޮސް ހުރި ވެލިއުސްތަކެއް އެބަހުރި އެމްޑީޕީ މެމްބަރުން ގަބޫލުކުރާ. މިކަންތައްތައް މިހާރަށް ވުރެން ރަނގަޅުކުރަން ދިން މެސެޖެއް ކަމުގައި އަޅުގަނޑު ގަބޫލުކުރަނީ. --ރައީސް
މިކަންކަން ހައްލުކުރައްވާނެ ކަމުގެ ޔަގީންކަން ރައީސް ދެއްވި އެވެ.
ރައީސް ވިދާޅުވީ އެމްޑީޕީ އިސްކޮށް އޮވެ ރިޔާސީ އިންތިހާބު ކާމިޔާބުކޮށްދީ ރައްޔިތުންގެ މަޖިލީހުގެ ބޮޑު އަޣުލަބިއްޔަތެއް ރައްޔިތުން ދީފައިވާ އިރު މިހާތަނަށް ރަނގަޅު ނުކުރެވި ހުރި މައްސަލަތަކަކީ ކޮބައިތޯ ބަލަން ޖެހޭ ކަަމަށެވެ. ބަދަލުކުރަން ކަމެއް ހުރި ނަމަ އެކަމެއް ކުރަން ޖެހޭ ކަމަށް ވިދާޅުވި އެވެ.
"ސަރުކާރުގެ ތެރޭގައި ހުރީ ކޮން މައްސަލަތަކެއްތޯ؟ ކޮންކޮން ކަންތައްތަކެއްތޯ ބަދަލުކުރަން ޖެހެނީ. މަޖިލިސް ތެރޭގައި ކޮން މައްސަލަތަކެއްތޯ ހުރީ. ހުރިއްޔާ އަޅުގަނޑުމެން ބަދަލުކުރާނެ،" ރައީސް ވިދާޅުވި އެވެ.
ސަރުކާރުގައި އެމްޑީޕީ އޮވެ މަޖިލީހުގެ އަޣުލަބިއްޔަތު އޮވެ މާލެ ގެއްލުން އެއީ ރައީސް ސިފަކުރެއްވި ގޮތުގައި އިސްލާހުކުރަން ޖެހޭ ކަމެކެވެ.
ރައީސް ވިދާޅުވީ މާލޭ ރައްޔިތުންގެ މެސެޖާ އެކު ކަންކަން ބަދަލުކުރަން ހުރި ނަމަ އެކަމަށް އެމަނިކުފާނު ތައްޔާރު ކަމަށެވެ.
"މި ފަހަރު ލިބުނު ނާކާމިޔާބީގައި އޮންނާނެ ސަރުކާރުން ބަދަލުކުރަން ޖެހޭ ކަންކަން ވެސް،" ރައީސް ވިދާޅުވި އެވެ.
މައްސަލަތަކެއް ހުރެ އެކަން ހައްލު ނުވެ އިންތިހާބެއް ގެއްލިގެން ދިޔައިރު ކުރިން އެ ކަންކަމަށް ފިޔަވަޅު ނޭޅީ ކީއްވެތޯ ނޫސްވެރިއަކު އެހުމުން ވިދާޅުވީ ކޮރަޕްޝަނަކަށް ޖާގައެއް ނުދެއްވާ ކަމަށެވެ. ކޮރަޕްޝަނާ ގުޅޭ ގޮތުން އުފެދޭ ކޮންމެ ސުވާލަކަށް ވެސް ޖަވާބު ހޯދަން ކުރަން ޖެހޭ ކަންކަން ކުރައްވާނެ ކަމަށް ވިދާޅުވި އެވެ.
އެމަނިކުފާނު ވިދާޅުވި ގޮތުގައި މާލޭގެ ރައްޔިތުންގެ އިތުބާރު އަނބުރާ ހޯދޭނެ އެވެ. އެކަން އޮތީ އިސްލާހު ނުވާ ހިސާބުގައި ނޫން ކަަމަށް ވިދާޅުވި އެވެ.
ޕީޕީއެމް ކައުންސިލަކަށް ވާތީ އެއްބާރުލުން ސަރުކާރުގެ ނުދޭނެ ކަމުގެ ތުހުމަތަށް ވިދާޅުވީ ކުރިއެކޭ އެއްގޮތަށް ކައުންސިލް ނުހިންގައި ހުރަސް އަޅައިގެން ސަރުކާރު ނޯންނާނެ ކަމަށެވެ.
ލާމަރުކަޒީ ނިޒާމަކީ އެމްޑީޕީގެ ތަސައްވަރެއްކަން ފާހަގަކުރައްވައި ވިދާޅުވީ އެ ނިޒާމުގެ ދަށުން ދޭން ޖެހޭ ބާރުވެރިކަން ދޭން ޖެހޭ ކަމަށެވެ. ކައުންސިލްގައި ކޮންމެ ޕާޓީއަކަށް ނިސްބަތްވާ ބައެއް ތިއްބަސް ރައްޔިތުންނަށް ހިދުމަތް ފޯރުކޮށްދިނުމުގައި އެއްބާރުލުން ދޭނެ ކަމުގެ ޔަގީންކަން ދެއްވި އެވެ.
