ޝައުބާން މަހުގެ 30 ވަނަ ދުވަހަކީ މާދަމާ ކަމާއި ރަމަޟާން މަހުގެ ފުރަތަމަ ދުވަހަކީ އަންނަ އަންގާރަ ދުވަސް ކަމުގައި ސަރުކާރުން ކަނޑައަޅައިފި އެވެ.
ހަނދު ސާބިތު ކުރުމަށް މިރޭ ބޭއްވި ޖަލްސާއަށް ފަހު އިސްލާމިކް މިނިސްޓަރު ޑރ. އަހުމަދު ޒާހިރު ވިދާޅުވި ގޮތުގައި ރަމަޟާން މަހުގެ ހަނދު މިރޭ އިރުއޮއްސޭއިރު ރާއްޖޭގެ އެއްވެސް ސަރަހައްދަކަށް އަދި އިސްލާމީ އެއްވެސް ގައުމަކަށް ވެސް ފެނިފައިނުވާކަން އިތުބާރުހުރި ފަލަކީ ހިސާބުތަކުން ކަށަވަރުވާ ކަމަށެވެ.
އެހެންވެ، ރަމަޟާން މަސް ފެށޭނީ އަންގާރަ ދުވަހު ކަމަށް ކަނޑައަޅާފައިވާ ކަމަށް ވިދާޅުވެ، މިނިސްޓަރު ވަނީ ރަމަޟާން މަހުގެ ބޭނުން ހެޔޮ ގޮތުގައި ހިފުމަށް ނަސޭހަތްތެރިވެވަޑައިގެންފަ އެވެ.
އަންނަ އަންގާރަ ދުވަހު ރަމަޟާން މަސް ފެށޭއިރު، މިއީ ކޮވިޑްގެ ހާލަތުގެ ތެރޭގައި ބައްދަލު ކުރާ ދެވަނަ ރޯދަ މަހެވެ. މިދިޔަ އަހަރުގެ ރޯދަ މަހުގައި މާލެ ސަރަހައްދު އޮތީ ފުލް ލޮކްޑައުންގަ އެވެ. ޖަމާއަތުގައި ނަމާދު ކުރުން މެދުކަނޑާލާފައި އޮތްއިރު، ތަރާވީސް ނަމާދެއް ވެސް ނުކުރެ އެވެ.
ނަމަވެސް، އިސްލާމިކް މިނިސްޓްރީއިން ނިންމާފައިވާ ގޮތުގައި މި އަހަރުގެ ރަމަޟާން މަހު މިސްކިތްތަކުގައި ތަރާވީސް ނަމާދު ކުރާނެ އެވެ.
