ގާތްގަނޑަކަށް 60 ޓަނުގެ ތެލާއަކު މާލެއިން ލާމު އަތޮޅަށް ދަތުރު ކުރަނިކޮށް ރޯވެ، އަޑިއަށް ދިޔަ ބޯޓު އޮތީ 1000 މީޓަރު އަޑީގައި ކަމަށާއި ބޯޓުން ތެޔޮ ލީކުވުމުގެ ފުރުސަތު ކުޑަ ކަމަށް އެންވަރަމަންޓް ޕްރޮޓެކްޝަން އެޖެންސީ އިން ބުނެފި އެވެ.
އީޕީއޭގެ ޑިރެކްޓާ ޖެނެރަލް އިބްރާހިމް ނައީމް ސިފައިންގެ ޑައިވް ޓީމަކާ ހަވާލާދީ "އަދަދު" އަށް ވިދާޅުވީ ފުޅި އަޅައި ފީނައިގެން ބެލިއިރު "ބްރޯ ފިއުލް" ކުންފުނީގެ އެ ތެޔޮ ބޯޓު އޮތީ އެނބޫދޫ ފިނޮޅު ކައިރިން ގާތްގަނޑަކަށް 1000 މީޓަރު އަޑީގައި ކަމަށެވެ.
"އެހާ ފުނުގައި އޮތީމަ ވާ ގޮތަކީ މިހާރު އޮންނާނީ ވަރަށް ބޮޑަށް ކޮމްޕްރެސްވެފަ. އެހެންވީމަ ތެޔޮ ލީކުވުމުގެ ފުރުސަތު ކުޑަވާނެ. އެކަމަކު މޮނީޓާ ކުރަމުން ދާނީ،" އޭނާ ވިދާޅުވި އެވެ.
ރޯވި ވަގުތު ތެޔޮ ބޯޓުގައި ހަތަރު މީހުން ތިއްބެވެ. އެ މީހުން ސަލާމަތް ކުރީ އެ ހިސާބުން ދަތުރު ކުރި ލޯންޗަކުންނެވެ.
އަޑިއަށް ދިޔަ ބޯޓުން ތެޔޮ ލީކުވި ނަމަވެސް އެ ސާފު ކުރުމުގެ ގާބިލްކަން ރާއްޖެއަށް ލިބިފައިވާ ކަމަށް ނައީމް ވިދާޅުވި އެވެ.
"ބޯޓުގަ ހުރީ ޑީސަލް. އެއީ ލުއި ތެލެއް. އެހެންވީމަ ސާފު ކުރަން ވެސް ފަސޭހަ ވާނެ،" އޭނާ ވިދާޅުވި އެވެ.
ތެޔޮ ބޯޓު އަޑިއަށް ދިޔަ މައްސަލަ ރައީސުލްޖުމްހޫރިއްޔާގެ އޮފީހުން މޮނީޓާ ކުރަމުންދާ ކަމަށް އެ އޮފީހުގެ ތަރުޖަމާނު މަބްރޫކް އަޒީޒް ވަނީ ވިދާޅުވެފަ އެވެ.
