ބަލިމަޑުކަމުގެ ހާލަތުގައި މިއަދު ކުރިއަށް ގެންދާ ލޯކަލް ކައުންސިލްތަކުގެ އިންތިހާބުގައި އިލެކްޝަންސް ކޮމިޝަނުގެ އޮފިޝަލުން އާންމު ގޮތެއްގައި ރައްކާތެރިކަމުގެ ފިޔަވަޅުތައް އަޅަމުންދާ ކަމަށް ޓްރާންސްޕޭރަންސީ މޯލްޑިވްސްއިން މިއަދު ބުނެފި އެވެ.
ރާއްޖޭގައި ބާއްވާ ހުރިހާ އިންތިހާބެއް ވެސް މޮނީޓާ ކުރުމުގެ މަސައްކަތް ކުރާ ޓްރާންސްޕޭރަންސީ އިން ބުނެފައި ވަނީ، 19 އަތޮޅެއްގައި 55 އޮބްޒާވަރުންނާއެކު އެ ޖަމިއްޔާއިން ބެލި ބެލުމުގައި، ކޮވިޑް-19 އިން ރައްކާތެރިވުމަށް މާސްކު އެޅުމާއި އަތް ދޮވުމާއި ކިޔުތައް ބެލެހެއްޓުމާއި ހުން ބެލުމުގެ ކަންކަން އިލެކްޝަންސް ކޮމިޝަނުން ގެންގޮސްފައި ވަނީ ރަނގަޅަށް ކަމަށެވެ.
އެގޮތުން އެ ޖަމިއްޔާއިން ބުނެފައި ވަނީ އިލެކްޝަންސްގެ އޮފިޝަލުންގެ ތެރެއިން 85 ޕަސެންޓު މީހުން ހަރަކާތްތެރިވަމުން ދިޔައީ މާސްކު އަޅައިގެން ކަމަށެވެ. އަދި ވޯޓުލާ މަރުކަޒުތަކުގެ ތެރެއިން 91 މަރުކަޒުން ހުން ބަލާފައިވާއިރު 79 މަރުކަޒުތަކުގައި ކިޔު ހަދާފައި ވަނީ ގައިދުރުކޮށެވެ. މީގެ އިތުރުން ހުރިހާ ވޯޓުލާ މަރުކަޒެއްގައި ވެސް އަތް ދޮވުމުގެ އިންތިޒާމް ހުރީ ހަމަޖައްސައިފަ އެވެ.
ވޯޓުލާ މަރުކަޒަށް މީހަކު ވަނުމުގެ ކުރިން ހުން ބަލަނީ: ރައްކާތެރިކަމުގެ ފިޔަވަޅު ހުރީ ރަނގަޅަށް -- ފޮޓޯަަ: ހުސެއިން ވަހީދު/އަދަދު
މިއަދު ކުރިއަށްދާ އިންތިހާބުގައި 273،128 ވޯޓުލުމުގެ ހައްގު ލިބިފައިވެ އެވެ. މިހާތަނަށް އޭގެ ތެރެއިން 50 ޕަސެންޓަށްވުރެ ގިނަ މީހުން ވަނީ ވޯޓު ލައިފަ އެވެ.
އެންމެ ފުރަތަމަ ރާއްޖޭގައި ބޭއްވި ލޯކަލް ކައުންސިލްތަކުގެ އިންތިހާބުގައި ވޯޓު ދިނުމުގެ ހައްގު ލިބިގެންވާ 223،975 މީހުންގެ ތެރެއިން 161،510 މީހަކު ވަނީ ވޯޓު ލައިފަ އެވެ. އެއީ ވޯޓުލުމުގެ ހައްގު ލިބުނު މީހުންގެ ތެރެއިން 72 ޕަސެންޓެވެ.
އޭގެ ފަހުން 2014 ގައި ބޭއްވި އިންތިހާބުގައި ވޯޓުލާފައި ވަނީ ހައްގު ލިބޭ 240،220 މީހުންގެ ތެރެއިން 154،942 މީހުންނެވެ. އެއީ ވޯޓުލުމުގެ ހައްގު ލިބޭ މީހުންގެ ތެރެއިން 64.5 ޕަސެންޓު މީހުންނެވެ. އެހެންކަމުން ފުރަތަމަ އިންތިހާބަށްވުރެ މި އިންތިހާބުގައި ވޯޓުލީ މީހުންގެ ނިސްބަތް 7.5 ޕަސެންޓު ދަށްވި އެވެ.
އެންމެ ފަހުން 2017 ގައި ބޭއްވި އިންތިހާބުގައި އިންތިހާބުގައި 255،987 މީހުންނަށް ވޯޓު ދިނުމުގެ ހައްގު ލިބުނު އިރު އޭގެ ތެރެއިން ވޯޓުލާފައި ވަނީ 168،951 މީހުންނެވެ. އެއީ ހައްގު ލިބުނު މީހުންގެ ތެރެއިން 65.9 ޕަސެންޓު މީހުންނެވެ.
