ކުރިން ހުއްދަ ހޯދުމަކާ ނުލައި ރާއްޖޭގެ ހާއްސަ އިގްތިސޯދީ ސަރަހައްދަށް އެމެރިކާގެ މަނަވަރެއް ވަދެފި އެވެ.
ރާއްޖޭގެ ސަރަހައްދަށް މިދިޔަ ބުދަ ދުވަހު ވަދެފައި ވަނީ ޔޫއެސްއެސް ޖޯން ޕޯލް ޖޯންސް (ޑީޑީޖީ-53) އެވެ. މިއީ ކަނޑުމަތިން މިސައިލު ފޮނުވައިގެން މަތިންދާ ހަނގުރާމަމަތީ ބޯޓު ވައްޓާލުމަށް ހާއްސަކޮށް ހަދާފައިވާ މަނަވަރެކެވެ.
އެމެރިކާ މަނަވަރުން ނެރެފައިވާ ބަޔާނެއްގައި ބުނެފައި ވަނީ ރާއްޖޭގެ ހާއްސަ އިގްތިސޯދީ ސަރަހައްދަށް ބޯޓު ވަދެ "މައުސޫމް ދަތުރެއްކޮށް"، "އާންމު އޮޕަރޭޝަނެއް" ހިންގާފައިވާ ކަމަށެވެ.
ކުރިން ހުއްދަ ހޯދުމަކާ ނުލައި ބޭރު ގައުމެއްގެ ހަނގުރާމަމަތީ އުޅަނދެއް ރާއްޖޭގެ ސަރަހައްދަށް ވަނުން ރާއްޖޭގެ ގާނޫނުތަކުން މަނާ ނަމަވެސް، މަނަވަރު އަމަލުކޮށްފައި ވަނީ ބައިނަލްއަގްވާމީ ގާނޫނުތަކާ ހިލާފަށް ނޫން ކަމަށް އެމެރިކާއިން ބުނެ އެވެ.
"ރާއްޖޭގެ ބޭރު ކަނޑުގެ ސަރަހައްދަށް އެހެން ގައުމުތަކުގެ ހަނގުރާމަ މަތީ އުޅަނދުތައް ވަނުން އަދި ހާއްސަ އިގްތިސޯދީ ސަރަހައްދަށް އެއްވެސް އުޅަނދެއް ހުއްދަ ނުހޯދައި ވަނުމަކީ މަނާ ކަމެއް. ނަމަވެސް މިއީ ބައިނަލްއަގްވާމީ ގާނޫނުތަކާ ފުށުއަރާ ކަމެއް،" މަނަވަރުން ނެރުނު ބަޔާނުގައިވެ އެވެ.
އެމެރިކާގެ މަނަވަރުން ނެރެފައިވާ ބަޔާން:
ރާއްޖޭގެ ކަނޑުގެ ސަރަހައްދަށް ހުއްދަ ނުހޯދައި ވަނުން މަނަވަރުން އެ ބަޔާނުގައި ސިފަ ކޮށްފައި ވަނީ ބައިނަލްއަގްވާމީ ގާނޫނުތަކުން ލިބިދޭ ފްރީޑަމް އޮފް ނެވިގޭޝަންގެ ދަށުން ހިންގި އޮޕަރޭޝަނެއްގެ ގޮތުގަ އެވެ.
"މި ފްރީޑަމް އޮފް ނެވިގޭޝަން އޮޕަރޭޝަނުން، ރާއްޖޭގެ އެކްސެސިވް މެރިޓައިމް ކްލެއިމްސަށް އަށް ގޮންޖަހައި، އަހަރުމެން މި ވަނީ ބައިނަލްއަގްވާމީ ގާނޫނުތަކުން ލިބިދޭ ހައްގުތަކާއި މިނިވަންކަމާއި ގާނޫނާ އެއްގޮތަށް ކަނޑުގައި ހަރަކާތްތެރިވުމުގެ ހައްގު ކަށަވަރުކޮށްފައި،" މަނަވަރުން ބުންޏެވެ.
ޔޫއެސްއެސް ޖޯން ޕޯލް ޖޯންސްއިން ބުދަ ދުވަހު ވަނީ ކުރިން ހުއްދަ ހޯދުމަކާ ނުލައި އިންޑިއާގެ ސަރަހައްދަށް ވެސް ވަދެ މަލިކު ކައިރިން ދަތުރުކޮށްފަ އެވެ. އަދި އެކަމާ ގުޅިގެން ވެސް މަނަވަރުން ވަނީ ބަޔާނެއް ނެރެފަ އެވެ.
ރާއްޖޭގެ ކަނޑުގެ ސަރަހައްދުތަކާ ބެހޭ ގާނޫނުގައި ބުނެފައި ވަނީ "އެއްވެސް ބޭނުމަކު ބޭރު ގައުމެއްގެ ހަނގުރާމަމަތީ އުޅަނދެއް" ރާއްޖޭގެ ސަރަހައްދަށް ވަންނަން ވާނީ "ދިވެހި ސަރުކާރުގެ ހުއްދަ ކުރިން ލިބިގެން" ކަމަށެވެ.
އިންޑިއާގެ ނޫސްތަކުން ބުނެފައި ވަނީ ޔޫއެސްއެސް ޖޯން ޕޯލް ޖޯންސް އިން އިންޑިއާ އަދި ރާއްޖޭގެ ސަރަހައްދަށް ވަދެފައި މި ވަނީ ޗައިނާއަށް މެސެޖެއް ދިނުމުގެ ގޮތުން ކަމަށެވެ.
މިކަމާ ގުޅިގެން ދިވެހި ސިފައިންގެ ބަހެއް އަދި ނުލިބެ އެވެ.
