އިންތިހާބު: ސިޓީތަކުން ވެސް ފެންނަނީ ހިމޭންކަން

އިންތިހާބުތަކުގައި، މާލެ ފިޔަވައި އަބަދުވެސް އެންމެ ހަލަބޮލިކަން ފެންނަނީ ސިޓީ ކައުންސިލްތަކުގެ ވޯޓުލާ މަރުކަޒުތަކުންނެވެ. ދިގު ކިޔޫތައް ދަމާލާފައި އޮންނައިރު، ޕާޓީތަކުގެ އޮބްޒާވަރުން މީހުން ނެރުމަށް ވެސް ހަރަކާތްތެރިވެ އެވެ. އެކަމަކު މި އިންތިހާބުގައި އެ މަންޒަރެއް ނުފެނެ އެވެ.

އަތޮޅުތަކުގެ ތިން ސިޓީގެ ވޯޓުލާ މަރުކަޒުތައް އޮތީ ހިމޭންވެފަ އެވެ. ކިއޫގައި މަޑުކުރުމެއް ނެތި ގޮސް ވޯޓުލައި ނިންމާލަންވީ އެވެ.

އައްޑު އާއި ފުވައްމުލަކުގެ އިތުރުން ކުޅުދުއްފުށީ ކައުންސިލަށް ކެންޑިޑޭޓުން އިންތިހާބުކުރަން މެންދުރާ ހަމައަށް ވޯޓުލާފައި ވަނީ މަދު ބައެއް ކަމަށް އެ ކައުންސިލްތަކުން ބުންޏެވެ.

އައްޑޫ ސިޓީގެ މޭޔަރު އަބްދުﷲ ސޯދިގު ވިދާޅުވީ އެ ސިޓީގެ ހުރިހާ ރަށެއްގައި ވެސް ވޯޓުލާން ނިކުތް މީހުންގެ އަދަދު "ވަރަށް މަދު" ކަމަށެވެ.

ފުވައްމުލަކު ސިޓީގެ އިންތިހާބު މޮނީޓާކުރާ ފަރާތަކުން ވެސް ބުނިގޮތުގައި އެ ރަށުގައި ވެސް ވޯޓުލާން ނިކުންނަ މީހުން މަދެވެ. ކިއުތައް ވެސް ކުޑައިރު ވޯޓުލާން އެއްވެސް ދަތިކަމެއް ނެތް ކަމަށް އޭނާ ބުންޏެވެ.

"މިހާރުގެ ޓާންއައުޓަށް ބަލާފަ ލަފާ ކުރެވެނީ ވޯޓުލާން ނިކުންނާތީ ގާތްގަނޑަކަށް 50 ނޫނީ 60 ޕަސެންޓު މީހުން ކަމަށް،" އޭނާ ބުންޏެވެ.

މިފަހަރު އަލަށް ސިޓީ ކައުންސިލްގެ އިންތިހާބެއް ބާއްވާ ކުޅުދުއްފުށި ކައުންސިލްގެ ރައީސް އަބްދުއްލަތީފް ވިދާޅުވީ މެންދުރު ކުރީގެ ވަގުތުގައި އެ ސިޓީގައި ވެސް ވޯޓުލާން ނިކުތް މީހުންގެ މަދު ކަމަށެވެ.

"ކިއުތަކުގައި ވެސް ވަރަށް މަދު މީހުން ތިބީ. ބައެއް ތަންތަނުގައި ކިއުއެއް ނެތް. އެކަމަކު މި ފަހަރު ރަށުގައި ބެހެއްޓި ވޯޓު ފޮށީގެ އަދަދު ވެސް ގިނަ. އެހެންވީމަ އެކަމާ ހެދި އަދަދު މަދު ކަމަށް ވެސް ދަށްކަފާނެ،" އޭނާ ވިދާޅުވި އެވެ.

އިލެކްޝަންސް ކޮމިޝަނުން ވެސް ލަފާކުރަނީ މި އިންތިހާބުގައި ވޯޓުލާ އަދަދު މަދުވާނެ ކަމަށެވެ. އެ ކޮމިޝަނުން ބުނީ ވޯޓުލާން ނިކުންނާނީ ހައްގު ލިބޭ 273،128 މީހުންގެ ތެރެއިން އެންމެ 40 ޕަސެންޓު ކަމަށް ބެލެވޭ ކަމަށެވެ.

އެންމެ ފުރަތަމަ ރާއްޖޭގައި ބޭއްވި ލޯކަލް ކައުންސިލްތަކުގެ އިންތިހާބުގައި ވޯޓު ދިނުމުގެ ހައްގު ލިބިގެންވާ 223،975 މީހުންގެ ތެރެއިން 161،510 މީހަކު ވަނީ ވޯޓު ލައިފަ އެވެ. އެއީ ވޯޓުލުމުގެ ހައްގު ލިބުނު މީހުންގެ ތެރެއިން 72 ޕަސެންޓެވެ.

އޭގެ ފަހުން 2014 ގައި ބޭއްވި އިންތިހާބުގައި ވޯޓުލާފައި ވަނީ ހައްގު ލިބޭ 240،220 މީހުންގެ ތެރެއިން 154،942 މީހުންނެވެ. އެއީ ވޯޓުލުމުގެ ހައްގު ލިބޭ މީހުންގެ ތެރެއިން 64.5 ޕަސެންޓު މީހުންނެވެ. އެހެންކަމުން ފުރަތަމަ އިންތިހާބަށްވުރެ މި އިންތިހާބުގައި ވޯޓުލީ މީހުންގެ ނިސްބަތް 7.5 ޕަސެންޓު ދަށްވި އެވެ.

އެންމެ ފަހުން 2017 ގައި ބޭއްވި އިންތިހާބުގައި އިންތިހާބުގައި 255،987 މީހުންނަށް ވޯޓު ދިނުމުގެ ހައްގު ލިބުނު އިރު އޭގެ ތެރެއިން ވޯޓުލާފައި ވަނީ 168،951 މީހުންނެވެ. އެއީ ހައްގު ލިބުނު މީހުންގެ ތެރެއިން 65.9 ޕަސެންޓު މީހުންނެވެ.