މިދިޔަ ހަފުތާގެ ތެރޭގައި ދައުލަތަށް ޓެކުހާއި އެހެނިހެން އާމްދަނީގެ ގޮތުގައި 855 މިލިއަން ރުފިޔާ ލިބުނު ކަމަށް ފިނޭންސް މިނިސްޓްރީގެ ހިސާބުތަކުން ދައްކައިފި އެވެ.
ފިނޭންސް މިނިސްޓްރީީ ގެ އެންމެ ފަހުގެ ފިސްކަލް ޑިވެލޮޕްމަންޓް ރިޕޯޓަށް ބަލާއިރު، މި އަހަރުގެ ފުރަތަމަ ތިން މަސް ދުވަހުގެ ތެރޭގައި ޖުމްލަ އާމްދަނީގެ ގޮތުގައި ލިބުނު އަދަދު ވަނީ 5 ބިލިއަން ރުފިޔާ އަށް އަރައިފަ އެވެ. އޭގެ ތެރެއިން 80 ޕަސެންޓާ ގާތް ކުރާ އަދަދެއް ލިބުނީ ޓެކްސް އާމްދަނީންނެވެ.
ޓެކްސް އާމްދަނީ އަށް ލިބުނު 3.9 ބިލިއަން ރުފިޔާގެ ތެރެއިން ބޮޑު ބަޔެއް ލިބުނީ ޖީއެސްޓީ އަދި ބިޒްނަސް އެންޑް ޕްރޮޕަޓީ ޓެކުހުންނެވެ.
ޓެކްސް ނޫން އާމްދަނީގެ ގޮތުގައި ދައުލަތަށް ލިބުނީ 955 މިލިއަން ރުފިޔާ އެވެ. އަދި އަހަރުގެ މިހާތަނަށް ހިލޭ އެހީގެ ގޮތުގައި ލިބުނީ 55 މިލިއަން ރުފިޔާ އެވެ.
ޖެނެރަލް ޖީއެސްޓީ އާމްދަނީ އާދަޔާ ހިލާފަށް ރަނގަޅު
މި އަހަރުގެ ފުރަތަމަ ތިން މަސް ދުވަހުގެ ތެރޭގައި ޖެނެރަލް ޖީއެސްޓީ ގެ ގޮތުގައި ލިބުނު އާމްދަނީ ހީކުރީ ވަރަށް ވުރެ ރަނގަޅެވެ. އެގޮތުން ތިން މަސް ދުވަހުގެ ތެރޭގައި މި ދާއިރާ އިން 1.5 ބިލިއަން ރުފިޔާ ލިބިފައިވާ އިރު، މުޅި އަހަރު ލިބޭނެ ކަމަށް އަންދާޒާ ކުރީ ދެ ބިލިއަން ރުފިޔާ އެވެ.
މިއާ އެކު ތިން މަސް ދުވަހުގެ ތެރޭގައި، އާމްދަނީ ގެ ގޮތުގައި އަންދާޒާ ކުރި އަދަދުގެ 78 ޕަސެންޓް ވަނީ ލިބިފަ އެވެ.
އަހަރުގެ ޖުމްލަ އާމްދަނީގެ ގޮތުގައި ލިބޭނެ ކަމަށް އަންދާޒާ ކުރީ 21.2 ބިލިއަން ރުފިޔާގެ ތެރެއިން މިހާތަނަށް ލިބުނީ 23 ޕަސެންޓެވެ.
