އަހަރުގެ މިހާތަނަށް ދައުލަތަށް ލިބުނު އާމްދަނީ އާއި ހޭދައިގެ ފަރަގު 1.7 ބިލިއަން ރުފިޔާ އަށް އަރައިފި ކަމަށް ފިނޭންސް މިނިސްޓްރީގެ ހިސާބުތަކުން ދައްކައިފި އެވެ.
ފިނޭންސް މިނިސްޓްރީން ކޮންމެ ހަފްތާއަކު ނެރޭ ފިސްކަލް ޑިވެލޮޕްމަންޓް ރިޕޯޓަށް ބަލާއިރު، މި އަހަރުގެ ފުރަތަމަ 12 ހަފުތާގެ ތެރޭގައި ދައުލަތަށް އާމްދަނީގެ ގޮތުގައި 4.1 ބިލިއަން ރުފިޔާ ލިބުނު އިރު، ހަރަދު ކުރީ 5.9 ބިލިއަން ރުފިޔާ އެވެ.
އާމްދަނީގެ ތެރެއިން ޓެކުހުގެ ގޮތުގައި ލިބުނީ 3.3 ބިލިއަން ރުފިޔާ އެވެ. އަދި ޓެކްސް ނޫން އާމްދަނީގެ ގޮތުގައި ލިބުނީ 741 މިލިއަން ރުފިޔާ އެވެ.
ޓެކްސް އާމްދަނީގެ ތެރެއިން 1.7 ބިލިއަން ރުފިޔާ ލިބުނީ ޖީއެސްޓީ އިންނެވެ. އަދި ބިޒްނަސް އެންޑް ޕްރޮޕަޓީ ޓެކްސްގެ ގޮތުގައި 1.02 ބިލިއަން ރުފިޔާ ލިބުނެވެ. އޭގެ އިތުރުން އިމްޕޯޓް ޑިއުޓީގެ ގޮތުގައި 379 މިލިއަން ރުފިޔާ އަދި ގްރީން ޓެކްސްގެ ގޮތުގައި 160 މިލިއަން ރުފިޔާ ލިބުނެވެ.
ހޭދައަށް ބަލާއިރު، ރިކަރަންޓް ހަރަދުތަކަށް 4.4 ބިލިއަން ރުފިޔާ އަދި ކެޕިޓަލް ހަރަދުތަކަށް 1.4 ބިލިއަން ރުފިޔާ ވަނީ ހަރަދު ކޮށްފަ އެވެ. އެގޮތުން މުސާރަ އާއި އިނާޔަތްތައް ދިނުމަށް އެކަނި ވެސް 2.2 ބިލިއަން ރުފިޔާ ވަނީ ހަރަދު ކޮށްފަ އެވެ. ބާކީ ހޭދައިގެ ބޮޑު ބައެއް ކުރީ ކޮވިޑް-19 އާ ގުޅޭ ހަރަދުތަކަށާއި، ސަރުކާރުގެ ވެލްފެއާ އަދި ސަބްސިޑީ ހަރަދުތަކަށެވެ.
ފިނޭންސް މިނިސްޓްރީ ނޫން އެހެން ވުޒާރާތަކުގެ މިހާތަނަށް އެންމެ ބޮޑު ހޭދައެއް ކުރީ އެޑިއުކޭޝަން މިނިސްޓްރީ، ޕްލޭނިން މިނިސްޓްރީ އަދި ހެލްތް މިނިސްޓްރީންނެވެ. ދައުލަތުގެ އެހެނިހެން އިދާރަތަކުގެ ތެރެއިން އެންމެ ބޮޑު ހޭދައެއް ކުރީ އެންސްޕާ، އެމްއެންޑީއެފް އަދި ފުލުހުންގެ ހިދުމަތަށެވެ.
މި މުއްދަތުގެ ތެރޭގައި ލޯނު އަނބުރާ ދެއްކުމަށް 237 މިލިއަން ރުފިޔާ ހަރަދު ކޮށްފައިވާ އިރު، ސޮވަރިން ޑިވެލޮޕްމަންޓް ފަންޑަށް އިތުރު 62.2 މިލިއަން ރުފިޔާ ވަނީ ޖަމާ ކޮށްފަ އެވެ.
ސަރުކާރުން މި އަހަރަށް ލަފާކޮށް ފާސްކުރީ 34.9 ބިލިއަން ރުފިޔާގެ ބަޖެޓެކެވެ. އަދި އާމްދަނީ އާއި ހިލޭ އެހީގެ ގޮތުގައި ދައުލަތަށް ލިބޭނެ ކަމަށް ލަފާ ކުރީ 21.1 ބިލިއަން ރުފިޔާ އެވެ. މި ބަޖެޓުގެ 17 އިންސައްތަ ހޭދަ ކޮށްފައިވާ އިރު، ދައުލަތަށް ލިބޭނެ ކަމަށް އަންދާޒާ ކުރި އާމްދަނީގެ 20 އިންސައްތަ ވަނީ ލިބިފަ އެވެ.
