މިދިޔަ އަހަރުގެ ހިއްސާގެ ފައިދާގެ ގޮތުގައި ހިއްސާއަކަށް 15ރ. މަގުން ޖުމްލަ 80.7 މިލިއަން ރުފިޔާ ބެހުމަށް ހުށަހަޅަން ބޭންކް އޮފް މޯލްޑިވްސް (ބީއެމްއެލް) ގެ ޑިރެކްޓަރުންގެ ބޯޑުން ނިންމައިފި އެވެ.
މިއީ 2019 ވަނަ އަހަރު އެ ބޭންކުން ހިއްސާގެ ފައިދާގެ ގޮތުގައި ބެހި 129.17 މިލިއަން ރުފިޔާ އަށް ވުރެ 60 އިންސައްތަ ދަށް އަދަދެކެވެ. އެ އަހަރު ހިއްސާއަކަށް 26ރ. ގެ މަގުން ބޭންކުން ވަނީ ފައިސާ ދޫކޮށްފަ އެވެ. މި އަދަދަކީ ހިއްސާގެ ފައިސާއަށް ބަލާއިރު ރެކޯޑް އަދަދެކެވެ.
ޑިވިޑެންޑްގެ ގޮތުގައި ބަހާ ފައިސާގެ އަދަދު ދަށަށް ދިޔައީ، ކޮވިޑް-19ގެ ސަބަބުން ބޭންކުގެ ވިޔަފާރިއަށާއި އާމްދަނީއަށް އަސަރުކުރުމާ ގުޅިގެންނެވެ. ބޭންކުން ބުނީ މިދިޔަ އަހަރުގެ އޮޑިޓްކޮށްފައިވާ މާލީ ނަތީޖާ ދައްކާ ގޮތުން ޓެކްސް އަށް ކެނޑުމަށްފަހު ފައިދާގެ ގޮތުގައި ލިބުނީ 325 މިލިއަން ރުފިޔާ ކަމަށެވެ. މިއީ 2019 ވަނަ އަހަރާ އަޅާބަލާއިރު 68 އިންސައްތަ އަށްވުރެ ބޮޑު ދަށްވުމެކެވެ.
"މަސައްކަތް ކުރަމުން ދަނީ މި އަހަރު ހަރުދަނާ މާލީ ނަތީޖާއެއް ހޯދުމަށް"
ބޭންކުގެ މިދިޔަ އަހަރުގެ މާލީ ޕާފޯމަންސާ ގުޅޭ ގޮތުން ބީއެމްއެލްގެ ސީއީއޯ އަދި މެނޭޖިން ޑިރެކްޓަރު ޓިމް ސޯޔާ ވިދާޅުވީ އާމްދަނީ ދަށަށް ދިޔައީ ކޮވިޑް-19 ގެ ސަބަބުން ބޭންކުގެ ވިޔަފާރިތައް ހުއްޓި، ބޭންކުގެ އާމްދަނީ ދަށަށް ދިޔުމުގެ ސަބަބުން ކަމަށެވެ.
"ކޮވިޑް-19 ގެ ސަބަބުންނާއި އަންދާޒާ ކުރެވިފައި ނުވާނެހެން ވިޔަފާރި ހުއްޓުމަކަށް އައުމުން 2020 ވަނަ އަހަރުގެ އާމްދަނީ ވަނީ ވަރަށް ބޮޑަަށް ދަށްވެފަ. މިކަމުން އަރައިގަތުމުގައި ހެޔޮ ބަދަލުތަކެއް ފެންނަމުންދާއިރު އަޅުގަނޑުމެންވެސް ގަދައަޅައި މަސައްކަތްކުރަމުންދާނީ މިއަހަރު ހަރުދަނާ މާލީ ނަތީޖާއެއް ހޯދުމަށް"، ސޯޔާ ވިދާޅުވި އެވެ.
ސޯޔާ ވަނީ ބޭންކުގެ މުވައްޒަފުންނަށާއި ހިއްސާދާރުންނަށް ޝުކުރު އަދާކުރަމުން، ބޭންކުގެ ކަސްޓަމަރުން އެދޭފަދަ ހިދުމަތްތަކެއް ފޯރުކޮށްދިނުމަށާއި ޕްރޮޑަކްޓްތަކުގެ ފެންވަރު އިތުރަށް ރަނގަޅު ކުރުމަށް ކެނޑިނޭޅި މަސައްކަތް ކުރުމަން ދާނެ ކަމުގެ ޔަގީންކަން ބީއެމްއެލްގެ ކަސްޓަމަރުންނަށް އަރުވާފަ އެވެ.
ބީއެމްއެލް އިން ބުނި ގޮތުގައި ހިއްސާގެ ފައިދާ ބަހާނީ ބުކް ކްލޯޝާ ޑޭޓުގެ ކުރިން ކުންފުނީގެ ހިއްސާދާރުންގެ ދަފްތަރުގައި ލިސްޓުކޮށްފައިވާ ހުރިހާ ހިއްސާދާރުންނަށެވެ. ބުކް ކްލޯޝާ ޑޭޓު އިއުލާނުކުރާނީ އަހަރީ އާންމު ޖަލްސާގެ ނޯޓިހާއެކުގައެވެ.
