ސެކްސް ޓްރެފިކިން ރިންގެއް ހިންގި އެމެރިކާގެ ޖެފްރީ އެޕްސްޓީންއާއެކު ގާތް ގުޅުމެއް ބޭއްވި ކުރީގެ ރައީސް މުހައްމަދު ވަހީދު ހަސަން މަނިކު، ރައީސް މުހައްމަދު މުއިއްޒުގެ ހާއްސަ މުޝީރުގެ މަގާމުން މިއަދު އިސްތިއުފާ ދެއްވައިފި އެވެ.
ވަހީދު އިސްތިއުފާ ދެއްވިއިރު، ރައީސުލްޖުމްހޫރިއްޔާގެ މަގާމުގައި ހުންނަވައިގެން ރާއްޖެއާ ގުޅޭ އެތައް ކަމެއް އެޕްސްޓީންއާ ހިއްސާކޮށް، އޭނާގެ ލަފާ ހޯއްދަވާފައިވާކަން ވަނީ ފަޅާއަރައިފަ އެވެ. އަދި އެޕްސްޓީންގެ އަތުން ބައެއް ކަންކަމަށް ފަންޑު ހޯދުމަށް ވެސް ވަހީދު މަސައްކަތް ކުރެއްވި އެވެ.
ވަހީދުގެ އޮފީހުން މިއަދު ނެރުނު ބަޔާނެއްގައި ބުނެފައި ވަނީ، އެޕްސްޓީންއާއެކު ބޭއްވުނު ގުޅުމަށް ހިތާމަ ކުރައްވާ ކަމަށާއި ނަމަވެސް އެއްވެސް ކުށެއްގައި ބައިވެރިވެވަޑައިގެންފައިނުވާނެ ކަމަށެވެ. އަދި ވިދާޅުވީ އެޕްސްޓީންއާއެކު ބޭއްވެވީ ރަސްމީ ގުޅުމެއް ކަމަށެވެ.
"އެޕްސްޓީންއާއެކު ރައީސް ވަހީދު އަދި އެމަނިކުފާނުގެ އާއިލާއިން އެއްވެސް ސޯޝަލް [ނުރަސްމީ] ބައްދަލުވުމެއްގައި ނުވަތަ ޕާޓީއެއްގައި ބައިވެރިވެވަޑައިގެންފައި ނުވޭ،" އެ ބަޔާނުގައި ބުނެފައިވެ އެވެ.
ވަހީދުގެ ބަޔާނުގައި ވިދާޅުވެފައި ވަނީ އެޕްސްޓީންއާ ބައްދަލު ކުރީ ރާއްޖެއަށް މާލީ އެހީ ހޯދޭނެ މަގެއް ތަނަވަސް ކުރަން ކަމަށެވެ. އެޕްސްޓީންގެ ލަފާ ހޯދި ނަމަވެސް އޭނާއާއެކު އެއްވެސް ފައިސާގެ މުއާމަލާތެއް ހިނގާފައިނުވާ ކަމަށް ވެސް ވަހީދު ވިދާޅުވެފައިވެ އެވެ.
އުމުރުން އެންމެ 14 އަހަރުގެ ކުޑަކުއްޖަކާ ބެހުނު މައްސަލައެއް 2008 ވަނަ އަހަރު ސާބިތުވެ އެޕްސްޓީން ވަނީ އެ އަހަރު ޖަލަށްލައިފަ އެވެ. އެކަމަކު، ވަހީދު ވިދާޅުވީ އެޕްސްޓީން ޖަލަށްލިކަން އެމަނިކުފާނަށް ނޭނގޭ ކަމަށް ވިދާޅުވެފަ އެވެ. އަދި ވިދާޅުވީ އެޕްސްޓީންއަކީ "އެހާ މުޑުދާރު" މީހެއްކަން ކުރިން އެނގިފައި އޮތް ނަމަ އެއްވެސް ގުޅުމެއް ނުބޭއްވީސް ކަމަށެވެ.
ވަހީދުގެ ބަޔާނުގައި އިތުރަށް ބުނެފައި ވަނީ އެމަނިކުފާނު އެޕްސްޓީންއާ ބައްދަލު ކުރެއްވީ ސެޕްޓެމްބަރު، 2012، އަދި މެއި، 2014، ގައި ކަމަށެވެ. ނަމަވެސް އެ ދެ ބައްދަލުވުމުގެ އިތުރުން ވެސް އެޕްސްޓީންއާއެކު އިތުރު ބައްދަލުވުމެއް ބޭއްވިކަން ވަނީ ހާމަވެފަ އެވެ.
