ޓީސީން މާޒިޔާގެ ސައްތަ އިން ސައްތަ ރެކޯޑަށް ނިމުން ގެނެސްފި

Dec 18, 2025, 1:16 PM
ޓީސީގެ ލަނޑު ޖެހި މާއި (ކ) އާއި އެ ޓީމުގެ އިޒާން އުފާފާޅުކުރަނީ.---- ފޮޓޯ: ރާއިފް ޔޫސުފް/ އަދަދު ސްޕޯޓްސް

ޓީސީގެ ލަނޑު ޖެހި މާއި (ކ) އާއި އެ ޓީމުގެ އިޒާން އުފާފާޅުކުރަނީ.---- ފޮޓޯ: ރާއިފް ޔޫސުފް/ އަދަދު ސްޕޯޓްސް

ދިރާގު ދިވެހި ޕްރިމިއާ ލީގު ތާވަލުގެ ފުލުގައި އޮތް ޓީސީ ސްޕޯޓްސް ކްލަބުން 1-1 އިން އެއްވަރުކޮށް، ލީގުގެ އެއް ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަނުން ހުރިހާ މެޗަކުން މޮޅުވެ، ދަމަހައްޓަމުން އައި ސައްތަ އިން ސައްތަ ރެކޯޑަށް ނިމުން ގެނެސްފި އެވެ.

މާޒިޔާ އިން ވަނީ މި ފަހަރުގެ ޗެރިޓީ ޝީލްޑް މެޗާ އެކު، ލީގުގައި މި މެޗުގެ ކުރިން ކުޅުނު 10 މެޗުން ވެސް މޮޅުވެފަ އެވެ. އެކަމަކު، ޓީސީ އަތުން މޮޅުނުވެވި، މާޒިޔާ އަށް ލީގުގެ އެއް ވަަނައިގައި ނެގުނީ ހަ ޕޮއިންޓުގެ ލީޑެކެވެ. އެއް ވަނައިގައި އޮތް މާޒިޔާ އަށް 11 މެޗުން 31 ޕޮއިންޓް ލިބިފައިވާއިިރު، ދެ ވަނައިގައި އޮތް އޮޑި ސްޕޯޓްސް ކްލަބަށް ވަނީ 10 މެޗުން 25 ޕޮއިންޓް ލިބިފަ އެވެ. އޮޑިން މާދަމާ ހަވީރު ޔުނައިޓެޑް ވިކްޓަރީ ބަލިކޮށްފިނަމަ، މާޒިޔާގެ ލީޑު ތިން ޕޮއިންޓަށް ކުޑަވާނެ އެވެ.

މިއަދު ހަވީރު ކުޅުނު މި މެޗަށް މާޒިޔާ އިން ޓީމު ލިސްޓު ހުށަހެޅި ފަހުން މެޗު ފެށުމުގެ ކުރިން، ދެ ބަދަލެއް ގެންނަން ޖެހުނެވެ. އެ ގޮތުން، އާއިލީ ޒިންމާގެ ކަމެއްގައި، އަހުމަދު އައިހަމް (ފަތޯ) ގެ ބަދަލުގައި، ހަސަން ޝިފާޒް (ޑުންގާ) ފުރަތަމަ އެގާރަ އަށް ލާން ޖެހުނުއިރު، ސްޕެއިނުގެ ފޯވާޑް، ސާޖިއޯ މެންޑީ އަށް ދިމާވި އަނިޔާއަކާ ހެދި އޭނާގެ ބަދަލުގައި، މުހައްމަދު އިލާން އިމްރާން ވަނީ މެޗު ފަށަން ޖެހިފަ އެވެ.

ވިއްސާރައިގެ ތެރޭގައި ކުޅުނު މި މެޗުގެ ފުރަތަމަ ހާފުގައި މާޒިޔާ އާއި ޓީސީން ވެސް ގޯލާ ސީދާކޮށް ހަމަލާ ފޮނުވާލައިފައިވެ އެވެ. އެ ގޮތުން، ޓީސީގެ ގާނާ ފޯވާޑް، ޕްރިންސް ބޯޑު ފޮނުވާލި ބޯޅަ މާޒިޔާގެ ކީޕަރު ހުސެއިން ޝަރީފް މަތަކުރި އެވެ. އަނެއްކޮޅުން، މާޒިޔާގެ ހަމްޒާ މުހައްމަދު (ހަމްޕު) ދިން ބޯޅައަކަށް ހުސްކޮށް އަރައި، އިލާން ފޮނުވާލި ބޯޅަ ޓީސީގެ ކީޕަރު، ނައިޖީރިއާގެ އެމަނުއަލް ޑެނިއަލް ވަނީ މަތަކޮށްފަ އެވެ.

މެޗުގައި މާޒިޔާ އަށް އުނދަގޫ ހާލަތެއް ދިމާވީ ފުރަތަަމަ ހާފުގެ އިތުރު ވަގުތުގެ ތެރޭގައި، އެ ޓީމުގެ އިބްރާހިމް އައިސަމް އަށް ސީދާ ރަތެއް ދެއްކުމުންނެވެ. އައިސަމް އަށް ރަތެއް ދެއްކީ ޓީސީގެ ހުސެއިން ޝަރީފް (ހުސީ) އަށް ނުރައްކާތެރި ފައުލެއް ކުރުމުންނެވެ.

ކުޅުންތެރިއަކު މަދުކޮށް ކުޅެ ވެސް ދެ ވަަނަ ހާފުގައި މާޒިޔާ އިން އެޓޭކަށް އިސްކަންދިނެވެ. ނަތީޖާ އަކަށްވީ މެޗުގެ 57 ވަނަ މިނިޓްގައި މާޒިޔާ އިން ލަނޑެއް ޖަހައި، ލީޑުނެގުމެވެ. އެ ގޮތުން، ހަމްޕު އޭރިއާތެރެއިން ހުސްކޮށްލާފައި ދިން ބޯޅައަކަށް އަރައި، މާޒިޔާ އަށް މި ލަނޑު ޖަހައިދިނީ، ނާއިޒު ހަސަން (ދާދު) އެވެ.

އޭގެ ފަހުން މާޒިޔާ އިން ދެ ވަަނަ ލަނޑެއް ޖަހަން ކުރި މަސައްކަތުގައި ހަމްޕު އަށް ދެ ފުރުސަތެއް ލިބުނެވެ. އެ ގޮތުން، ހަމްޕު ފޮނުވާލި އެއް ހަމަލާ ޓީސީ ޑިފެންޑަރުން ބްލޮކްކުރިއިރު، އަނެއް ޝޮޓް އަމާޒުވީ ކީޕަރު ޑެނިއަލް އަތަށެވެ.

މާޒިޔާ މޮޅުވާން ދަނިކޮށް ޓީސީން އެއްވަރުކުރީ އިތުރު ވަގުތުގެ ފަސް ވަނަ މިނިޓްގަ އެވެ. އެ ގޮތުން، މާޒިޔާގެ އޭރިއާތެރެއިން ޓީސީގެ ނައިޖީރިއާ ފޯވާޑް، އިބްރާހިމް ޖިމޯ، ފޮނުވާލި ބޯޅަ ކީޕަރު ހުސެއިން އަތުގައި ޖެހިފައި ރީބައުންސަށް ނުކުތް ވަގުތު ހުސްކޮށް އޮތް ގޯލުގެ ތެރެއަށް ބޯޅަ ފޮނުވާލައިގެން ޓީސީގެ ލަނޑު ޖެހީ، އަހުމަދު މާއިޝް ރަޝީދު (މާއި) އެވެ.

ޓީސީން މިއަދުގެ މެޗަށް ނުކުތްއިރު އޮތީ 10 ޓީމު ވާދަކުރާ ލީގުގެ ފުލުގަ އެވެ. އެކަމަކު، މި މެޗުން ލިބުނު ޕޮއިންޓާ އެކު، 11 މެޗުން ހަ ޕޮއިންޓް ހޯދައި ޓީސީ ވަނީ ލީގުގެ ނުވަ ވަނަ އަށް ޖެހިލައިފަ އެވެ. މިއީ، ދެ ވަނަ ފަހަރަށް ޓީސީގެ ކޯޗުކަމާ ހަވާލުވި މުހައްމަދު އާތިފް (އާތީ)ގެ ކޯޗުކަމުގައި އެ ޓީމުން ކުޅުނު ތިން މެޗުގެ ތެރެއިން ހޯދި ފުރަތަމަ ޕޮއިންޓެވެ.

ކޮމެންޓް

ފަހުގެ ޚަބަރު

ނެޓްބޯޅަ ކޮމްޕްލެކްސް އިން ކުޅިވަރުގެ ދުރުރާސްތާ ޕްލޭނަށް ފައިދާ

ސަރުކާރުގެ ކުޅިވަރުގެ ދުރުރާސްތާ ޕްލޭންގެ ދަށުން ހުޅުމާލޭގައި ބިނާކުރާ ނެޓްބޯޅަ ކޮމްޕްލެކްސްގެ ބިންގާ އަޅައިފި. މި ކޮމްޕްލެކްސްގައި ފަސް ޕިޗު ހިމެނޭއިރު، މިއީ ނެޓްބޯޅައިގެ އިތުރުން އެހެނިހެން އިންޑޯ ކުޅިވަރުތަކާއި ބައިނަލްއަގުވާމީ މުބާރާތްތައް ބޭއްވޭނެހެން ފަރުމާކުރެވިފައިވާ ތަނެއް.

އެފްއޭއެމް ވިމެންސް ލީގު: މާޒިޔާ އާއި ނިއު ފެށީ ބޮޑު މޮޅަކުން

އެފްއޭއެމް ވިމެންސް ލީގުގެ ފުރަތަމަ މެޗުތަކުން މާޒިޔާ އާއި ނިއު ރޭޑިއަންޓް ބޮޑު ތަފާތަކުން މޮޅުވެއްޖެ. މާޒިޔާއިން އެމްއެސް މޭޓްސް އަތުން 8-0 އިން މޮޅުވިއިރު، ނިއު ރޭޑިއަންޓުން ވަނީ ދަ ގްރާންޑޭ އަތުން 15-0 އިން ކުރިހޯދާފައެވެ. ހަތަރު ޓީމު ވާދަކުރާ މި މުބާރާތުގެ ދެވަނަ މެޗުތައް ކުޅުމަށް ހަމަޖެހިފައިވަނީ އަންނަ ބުދަ ދުވަހު.

ޖޭޖޭ ސްޕޯޓްސް ކްލަބުން ކޮޅުނބު ފުޓްސަލް ކަޕް ތަށި ދިފާއުކޮށްފި

ސްރީ ލަންކާގައި ބޭއްވި ކޮޅުނބު ފުޓްސަލް ކަޕްގެ ފައިނަލުގައި ލާސްޓް ވޯނިން އެފްސީ 3-0 އިން ބަލިކޮށް، ޖޭޖޭ ސްޕޯޓްސް ކްލަބުން މުބާރާތުގެ ތަށި ދިފާއުކޮށްފި. މި މުބާރާތުގައި ކުޅުނު ހުރިހާ މެޗަކުން ޖޭޖޭ މޮޅުވެފައިވާއިރު، މުބާރާތުގެ އެންމެ މޮޅު ފަސް ކުޅުންތެރިންގެ ތެރޭގައި އެ ޓީމުގެ ތިން ކުޅުންތެރިއަކު ހިމެނޭ

އިޓަލީ ކަޓުވާލައި ބެލްޖިއަމުން ނޭޝަންސް ލީގު ކުއާޓާ އަށް

ޔުއެފާ ނޭޝަންސް ލީގުގައި ރޭ ކުޅުނު މެޗުން 4-1 ގެ ބޮޑު ތަފާތަކުން އިޓަލީ ބަލިކޮށް، ބެލްޖިއަމުން މުބާރާތުގެ ކުއާޓާ ފައިނަލުން ޖާގަ ހޯދައިފި. އިޓަލީން ފުރަތަމަ ލަނޑު ޖަހައި ކުރިހޯދާފައިވަނިކޮށް، ބެލްޖިއަމުން ފަހަތުން އަރައި ފަސް ލަނޑު ޖެހިއިރު، މި ނަތީޖާއާއެކު އިޓަލީ ވަނީ މުބާރާތުން ކަޓާފައި

އިންގްލެންޑް އަތްދަށުވެ ސްޕެއިންގެ ބަލިނުވުމުގެ ރެކޯޑް ނިމިއްޖެ

ޔުއެފާ ނޭޝަންސް ލީގުގައި ރޭ އިންގްލެންޑް އަތުން 3-2 އިން ބަލިވެ، ސްޕެއިން މެޗަކުން ބަލިނުވެ ދަމަހައްޓަމުން އައި 43 މެޗުގެ ރެކޯޑް ނިމުމަކަށް އަތުވެއްޖެ. މި މެޗުގައި އިންގްލެންޑުން ތިން ލަނޑުގެ ލީޑެއް ނަގާފައިވަނިކޮށް، ސްޕެއިނުން ދެ ލަނޑު ޖެހި ނަމަވެސް މެޗުން މޮޅުވެވޭ ގޮތެއް ނުވި

އުންމީދަކީ 18 މަސް ދުވަސް ތެރޭ ފުޓްސަލް އެރީނާ ނިންމުން: ރާފިއު

ހުޅުމާލޭގައި ބިނާކުރާ ފުޓްސަލް އެރީނާގެ މަސައްކަތް 18 މަސްދުވަހުގެ ތެރޭގައި ނިންމުމަކީ އުންމީދެއް ކަމަށް ސްޕޯޓްސް މިނިސްޓަރު އަބްދުﷲ ރާފިއު (ރާއްޕެ) ވިދާޅުވެއްޖެ. ލިއޯ ޓްރޭޑިންއާ ހަވާލުކޮށްގެން ކުރިއަށްގެންދާ މި މަޝްރޫއަކީ ފުޓްސަލް ކުޅުންތެރިންނަށް ބޭނުންވާ އިންޑޯ ވަސީލަތްތައް ގާއިމުކުރުމަށް ފެށި މުހިންމު މަސައްކަތެއް

ނެޝަނަލް ފުޓްސަލް އެރީނާގެ އަމަލީ މަސައްކަތް ފަށައިފި

ހުޅުމާލޭގެ ތިންވަނަ ފިޔަވަހީގައި ބައިނަލްއަގުވާމީ ފެންވަރުގެ ނެޝަނަލް ފުޓްސަލް އެރީނާ އެޅުމުގެ އަމަލީ މަސައްކަތް ލިއޯ ޓްރޭޑިންއާ ހަވާލުކޮށްގެން ވަނީ ފަށާފައި. ދެ އަހަރު ދުވަހުގެ ތެރޭގައި ނިންމުމަށް ހަމަޖެހިފައިވާ މި މަލްޓި-ލެވެލް އެރީނާގައި ފަސް ކޯޓާއި، ކުޅުންތެރިންނަށް ބޭނުންވާ ޒަމާނީ ވަސީލަތްތައް ގާއިމުކުރަން ވަނީ ހަމަޖެހިފައި.

Newsletter

Get the latest news delivered straight to your inbox