މި ސަރުކާރުން ފުރަތަަމަ 100 ދުވަސް ތެރޭގައި ގާއިމްކުރި ރާއްޖޭގެ ކުޅިވަރުގެ ދުރުރާސްތާ ޕްލޭންގައި ހިމެނޭ މުހިންމު ކަންތައްތަކަކަށް އިއްޔެ ބިންގާ އެޅި ނެޓްބޯލް ކޮމްޕްލެކްސްގެ ސަބަބުން ހައްލު ލިބިގެންދާނެ ކަމަށް ސްޕޯޓްސް މިނިސްޓަރު، އަބްދުﷲ ރާފިއު (ރާއްޕެ) ވިދާޅުވެއްޖެ އެވެ.
ނެޓްބޯޅަ ކޮމްޕްލެކްސްގެ ބިންގާ އަޅާފައިވަނީ، ހުޅުމާލޭ ފޭސް އެކެއްގެ ގާޒީ ސްކޫލް ކުރިމަތީގައި އޮންނަ ހުސް ބިމުގަ އެވެ.
މިނިސްޓަރު ރާފިއު ވިދާޅުވީ، ނެޓްބޯޅަ ކޮމްޕްލެކްސްގައި ފަސް ޕިޗު ހިމެނޭނެ ކަމަށާއި، އޭގެ ތެރޭގައި، ހަތަރު ޕްރެކްޓިސް ޕިޗާއި އެއް ޓޯނަމަންޓް ޕިޗް (މުބާރާތް ބާއްވ ޕިޗް) ހިމެނޭ ކަމަށެވެ.
"މި ޓޯނަމަންޓް ޕިޗަކީ މަލްޓި ސްޕޯޓްސް ގޮތަށް ފަރުމާ ކުރެވިގެންދާނެ ތަނެއް، މި ތަނަކީ ރާއްޖޭގައި ބާއްވާ އަދި އިންޓަނޭޝަނަލް އަދި ރީޖަނަލް ގޭމްސްއެއް ބޭއްވިޔަސް ކުޅިވަރުތައް ބަހާލައިގެން، އެކި ކުޅިވަރުތަކަށް ފޯކަސް ކޮށްގެން، އޭގެއިން ބައެއް ކުޅިވަރުތައް ލޮކޭޓް ކުރެވޭނެ އެއް ބިލްޑިން އަށް ވެގެންދާނެ،" ރާފިއު ވިދާޅުވި އެވެ.
"މިއީ، ލޯންގްޓާމް ސްޕޯޓްސް ޑިވެލޮޕްމަންޓް ޕްލޭނާ އެއްގޮތަށް ކުރިއަށް އޮތް ހަތް ވަރަކަށް އަހަރު ތެރޭ ރީޖަނަލް ގޭމްސް އެއް ހޯސްޓްކުރުމަކީ އަޅުގަނޑުމެންގެ ތަސައްވުރެއް، އެކަން އަޅުގަނޑުމެންނަށް ފަހިވުމަށްޓަކައި މި އިމާރާތަކީ މުހިންމު އިމާރާތެއް. އެއީ، އިންޑޯ ފުޓްސަލް ކަމަށް ވިޔަސް، ވޮލީ ކަމުގައި ވިޔަސް، ނެޓްބޯލް ކަމުގައި ވިޔަސް، ހޭންޑްބޯލް ކަމުގައި ވިޔަސް، މި އިމާރާތުގެ ތެރޭގައި އެ ކުޅިވަރުގެ މުބާރާތްތައް އަޅުގަނޑުމެންނަށް ކުރިއަށްގެންދެވޭނެ،"
މައިގަނޑު ގޮތެއްގައި، ނެޓްބޯޅަ އަށް ހާއްސަކޮށްފައިވާ މި ކޮމްޕްލެކްސް، ރައީސް ޑރ. މުހައްމަދު މުއިއްޒުގެ ތަސައްވުރާ އެއްގޮތަށް "ގާތްގަނޑަކަށް 15 މަސް ދުވަސް، ގިނަވެގެން 18 މަސް ދުވަސް ތެރޭގައި،" މި އިމާރާތް ނިންމާލެވޭނެ ކަަމަށް ކޮންޓްރެކްޓަރުގެ ފަރާތުން މައުލޫމާތު ލިބިފައިވާ ކަމަށް ރާފިއު ވިދާޅުވި އެވެ.
މި ޕްރޮޖެކްޓް ކުރިއަށްގެންދަނީ، ޖިއޯ ވޭވްއާ ހަވާލުކޮށްގެންނެވެ.
ނެޓްބޯޅަ ކޮމްޕްލެކްސް އެޅުމުގެ މަސައްކަތް ލަސްވި ސަަބަބާ ގުޅޭގޮތުން ވެސް މިނިސްޓަރު ރާފިއު ވާހަކަ ދެއްކެވި އެވެ. އެ ގޮތުން، ރާފިއު ވިދާޅުވީ، ނެޓްބޯޅަ ކޮމްޕްލެކްސް އަޅަން ލިބިފައިވާ ބިމުގައި މި އިމާރާތް ޑިޒައިން ކުރުމުގައި ދިމާވި ގޮންޖެހުންތަކާ ހެދި ޑިޒައިން ބަދަލުކުރަން ޖެހުމާ އެ ފަދަ ކަންކަމަށް ވަރަށް ގިނަ ދުވަސް ނެގި ކަމަށެެވެ. މި ކޮމްޕްލެކްސް ފުރިހަމަަވާއިރު، ވަށައިގެން ތިން މަގު އޮތް މި ކޮމްޕްލެކްސް އަށް ވަނުމުގެ ކަންކަމާއި ޕިޗުގެ ތެރެއަށް ސަޕޯޓަރުން ވަދެވޭ އަދަދާއި ހުރިހާ ކަމެއް ބައިނަލްއަގުވާމީ މިންގަނޑަށް ގެނައުމަށްޓަކައި ޗެލެންޖްތަކެއް ދިމާވެ އެ އަށް ހައްލު ހޯދުމަށް ވަަގުތުތަކެއް ދިޔަ ކަމަށް ވެސް ރާފިއު ފާހަގަކުރެއްވި އެވެ.
މި ކޮމްޕްލެކްސްގެ ސަބަބުން މާލެ ސަރަަހައްދުގައި އިތުރުވަމުން އަންނަ އާބާދީ އަށް ބޭނުންވާނެ ކުޅިވަރު އިންފްރާސްޓްރަކްޗާގެ ޑިމާންޑަށް ހައްލެއް ލިބޭނެކަމަށް ވިދާޅުވުމަށް ފަހު، ރާފިއު ދެން ފާހަގަކުރެއްވީ، މުބާރާތްތައް ބާއްވަން ކަނޑައަޅާ ޝެޑިއުލަށް މޫސުމާ ހެދި ބަދަލު ގެންނަން ޖެހޭ ކަންކަން މަދުވެގެން ދާނެ ކަމަށެވެ. އަދި، މަތީ ފެންވަރުގެ އެތުލީޓުން ބިނާކުރުމަށް ބޭނުންވާ ޕްްރެކްޓިސްް ކުރުމުގެ ވަގުތު އިތުރު ކުރަން ވެސް މި ކޮމްޕްލެކްސްގެ ސަބަބުން މަގުފަހިވެގެންދާނެ ކަަމަށެވެ.
ކުޅިވަރުގެ އެކިއެކި އިލްމީ ކަންކަމުގެ މަސައްކަތަށް ވެސް މި އިންޑޯ ކޮމްޕްލެކްސްގެ އެހީތެރިކަން ބޮޑުަކަމަށް ރާފިއު ފާހަގަކުރެއްވި އެވެ.
ލިއޯ ޓްރޭޑިންއާ ހަވާލުކޮށްގެން، ސަރުކާރުން ކުރިއަށްގެންދާ ފުޓްސަލް އިންޑޯ އެރީނާގެ މަސައްކަތް ފަށައި، އިއްޔެ ވަނީ ބިންގާ އަޅައިފަ އެވެ. އެ މަސައްކަތް 18 މަސް ދުވަސް ތެރޭ ނިންމަން ވަނީ އަމާޒުހިފައިފަ އެވެ.







